ସମ୍ବଲପୁର, ୦୧/୦୬: ମର୍ତ୍ତ୍ୟରେ ସ୍ୱର୍ଗର ନୀତିକାନ୍ତି । ଦେବତା, ଦାନବ, ଗନ୍ଧର୍ବ, କିନ୍ନରଙ୍କ ସମାଗମରେ ସାରା ସମ୍ବଲପୁର ଦେବଭୂମି ପାଲଟିଛି । ସଂହାରକର୍ତ୍ତା ଦେବ ଦେବ ମହାଦେବ ଏବଂ ମାତା ପାର୍ବତୀଙ୍କ ଲୌକିକ ବିବାହର ସେହି ଇପ୍ସିତ ମୁହୂର୍ତ୍ତ ପାଇଁ ସଚରାଚର ସୃଷ୍ଟି ଏକାକାର ହୋଇଛି । ଆକର୍ଷଣୀୟ ପରଭା ସମ୍ମୁଖରେ ସୁନା-ରୁପାରେ ବିମଣ୍ଡିତ ହୋଇ ବରବେଶରେ ଶୋଭାଯାତ୍ରାରେ ବାହାରି ଡମ୍ବରୁଧର ପହଞ୍ଚିଛନ୍ତି ମା’ ପାର୍ବତୀଙ୍କ ଘରେ । ବ୍ରହ୍ମ ମୁହୂର୍ତ୍ତରେ ପଡ଼ିଛି ଶମ୍ଭୁ ଏବଂ ଶୈଳପୁତ୍ରୀଙ୍କ ହାତଗଣ୍ଠି । ବିଶ୍ୱ ପ୍ରସିଦ୍ଧ ସମ୍ବଲପୁର ଶୀତଳଷଷ୍ଠୀର ପବିତ୍ର ବିବାହ ନୀତି ସମ୍ପନ୍ନ ହୋଇଛି ।
ଦେବଦମ୍ପତିଙ୍କ ବିବାହକୁ ନେଇ ଶନିବାର ଦିନତମାମ ଚଳଚଞ୍ଚଳ ହୋଇଉଠିଥିଲା ବର ଓ କନ୍ୟା ଘର । ସକାଳେ ଗତବର୍ଷର କନ୍ୟା ପିତାମାତାଙ୍କ ଗଣ୍ଠାଳ ଫିଟା ପରେ ଏ ବର୍ଷର କନ୍ୟା ପିତାମାତାଙ୍କୁ ପାର୍ବତୀଙ୍କ ବିଗ୍ରହ ହସ୍ତାନ୍ତର କରାଯାଇଥିଲା । କନ୍ୟା ଘରେ ହଳଦୀ ଖେଳ, ଗନ୍ଧଷଣ, ତୈଳାଭିଷେକ ଆଦି ସମସ୍ତ ନୀତି ସମ୍ପନ୍ନ ହେବା ପରେ ସନ୍ଧ୍ୟାରେ ମାତା ପାର୍ବତୀଙ୍କୁ ବିଭିନ୍ନ ଅଳଙ୍କାର ଆଭୂଷଣରେ ଭୂଷିତ କରି କନ୍ୟା ବେଶରେ ସଜ୍ଜିତ କରାଯାଇଥିଲା । ସବୁ ମନ୍ଦିରରେ ମହାଦେବଙ୍କ ରୁଦ୍ରାଭିଷେକ, ତୈଳାଭିଷେକ ଆଦି ସମସ୍ତ ନୀତି ସମ୍ପନ୍ନ ହୋଇ ରାତିରେ ବରବେଶରେ ସଜ୍ଜିତ କରାଯାଇଥିଲା ।
ରାତିରେ ମହାଦେବ ଆକର୍ଷଣୀୟ ପରଭା ସମ୍ମୁଖରେ ବିରାଜମାନ କରିଥିଲେ । ଏହାପରେ ମହାଆଳତୀ ଅନୁଷ୍ଠିତ ହୋଇ ବରଯାତ୍ରୀ ଶୋଭାଯାତ୍ରା କନ୍ୟା ଘର ଅଭିମୁଖେ ବାହାରିଥିଲା । ଘଣ୍ଟ, ଘଣ୍ଟା, ଦୁଲଦୁଲି, ସଂପ୍ରଦା, ଯୋଡ଼ିଶଙ୍ଖ ସମେତ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ସାଂସ୍କୃତିକ ଦଳ ଏବଂ ଆଧୁନିକ ନୃତ୍ୟ ଦଳ ଏଥିରେ ସାମିଲ ହୋଇଥିଲେ । ନନ୍ଦପଡ଼ାର ବଂ ବରାଡ଼ ବାଲୁଙ୍କେଶ୍ୱର ବାବାଙ୍କ ଶୋଭାଯାତ୍ରା ମନ୍ଦିର ପରିସରରୁ ବାହାରି ନାରୀସେବା ସଦନସ୍ଥିତ କନ୍ୟା ପିତାମାତା ପ୍ରତାପ ନନ୍ଦ ଓ ଲିପିକା ନନ୍ଦଙ୍କ ବାସଭବନରେ ପହଞ୍ଚିଥିଲା । ବାବା ବାଲୁଙ୍କେଶ୍ୱର (ଚନ୍ଦ୍ରଶେଖରଙ୍କ ଚଳନ୍ତି ପ୍ରତିମା) ଦଲେଇପଡ଼ା, ହାଟପଡ଼ା, ନନ୍ଦପଡ଼ା, ମହାନ୍ତିପଡ଼ା, କଂସାରୀପଡ଼ା, ବୈଦ୍ୟନାଥ ଛକ, ଶକ୍ତି ସଙ୍ଘ ଛକ, ମ୍ୟୁନିସିପାଲିଟି ଛକ ଦେଇ ନାରୀ ସେବା ସଦନରେ ପହଞ୍ଚିଥିଲା ।
ସେହିପରି ଝାଡୁଆପଡ଼ାର ଲୋକନାଥ ବାବାଙ୍କ ଶୋଭାଯାତ୍ରା କୁଞ୍ଜେଲପଡ଼ାରୁ ବାହାରି ଝାଡୁଆପଡ଼ା, ଗୌରମଠ ଗଳି, ଗୁରୁପଡା, ମହାନ୍ତିପଡ଼ା, କଂସାରୀପଡ଼ା, ବୈଦ୍ୟନାଥ ଛକ, ଶକ୍ତି ଛକ, ମ୍ୟୁନିସିପାଲଟି ଛକ, କଚେରି ଛକ ଦେଇ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଓ ପଦ୍ମିନୀ ନାୟକଙ୍କ ଦ୍ୱାରା ଆୟୋଜିତ ମହାନଦୀ କ୍ଲବ୍ସ୍ଥିତ ବିବାହ ମଣ୍ଡପରେ ପହଞ୍ଚିଥିଲା । ସେଠାରେ ସମ୍ପୂର୍ଣ୍ଣ ଲୋକାଚାରରେ ବିବାହ ନୀତି ଅନୁଷ୍ଠିତ ହୋଇଛି । ଦୁଲଦୁଲି, ଢେମସା ନାଚ, କଳସୀ ନାଚ, ମୟୂର ଦଣ୍ଡ ନାଚ, କରମା ନାଚ ସହ ଆଧୁନିକ ନୃତ୍ୟ କଳାକାର ଏଥିରେ ସାମିଲ ହୋଇ ନୃତ୍ୟକଳା ପ୍ରଦର୍ଶନ କରିଥିଲେ ।
ମୁଦିପଡ଼ାର ଜାଗେଶ୍ୱର ବାବାଙ୍କ ଶୋଭାଯାତ୍ରା ପାଣିଟାଙ୍କି ଛକ, ମୁଦିପଡ଼ା ଛକ ଦେଇ କୁଞ୍ଜେଲପଡ଼ା, ବାଲିବନ୍ଧା, ରାମଜୀଗୁଡ଼ି ଦେଇ ପାଟଣେଶ୍ୱରୀ କଲ୍ୟାଣ ମଣ୍ଡପରେ ପହଞ୍ଚିଥିଲା । କନ୍ୟା ପିତାମାତା ମୃତ୍ୟୁଞ୍ଜୟ ଦାସ ଓ ମଧୁସ୍ମିତା ପଣ୍ଡାଙ୍କ ଦ୍ୱାରା ବିବାହ କାର୍ଯ୍ୟକ୍ରମ ଆୟୋଜିତ ହୋଇଛି । ଶୁଭ ମୁହୂର୍ତ୍ତରେ ଶିବ-ପାର୍ବତୀଙ୍କ ବିବାହ ସମ୍ପନ୍ନ ହୋଇଛି
