ବାରଙ୍ଗ, ୨୨/୦୯: ଆଜି ବିଶ୍ୱ ଗଣ୍ଡା ଦିବସ । ଗଣ୍ଡା ବଂଶ ବୃଦ୍ଧି ସହିତ ସେମାନଙ୍କ ସୁରକ୍ଷା ପାଇଁ ପ୍ରତ୍ୟେକ ବର୍ଷ ସେପ୍ଟେମ୍ବର ୨୨କୁ ଗଣ୍ଡା ଦିବସ ଭାବେ ପାଳନ କରାଯାଉଛି । ଓଡ଼ିଶାରେ ଗଣ୍ଡା ଦେଖିବାକୁ ମିଳେ ନାହିଁ । କେବଳ ନନ୍ଦନକାନନ ପ୍ରାଣୀ ଉଦ୍ୟାନ ବୁଲିବାକୁ ଆସୁଥିବା ପର୍ଯ୍ୟଟକ ଗଣ୍ଡା ଦେଖିବାର ସୁଯୋଗ ପାଉଥିଲେ । କିନ୍ତୁ ପ୍ରାୟ ୯ ବର୍ଷ ହେଲା ପ୍ରାଣୀ ଉଦ୍ୟାନ ଗଣ୍ଡା ଶୂନ୍ୟ ହୋଇଯାଇଛି । ସେହି ଖୁଆଡ଼ରେ ଏବେ ଗଣ୍ଡା ବଦଳରେ ଜଳହସ୍ତୀଙ୍କୁ ଦେଖିବାକୁ ମିଳୁଛି । କର୍ତ୍ତୃପକ୍ଷ ଗଣ୍ଡା ଆଣିବା ପାଇଁ ଉଦ୍ୟମ କରୁଥିଲେ ମଧ୍ୟ ଏପର୍ଯ୍ୟନ୍ତ ଗଣ୍ଡା ଆସିବାର ପଥ ପରିଷ୍କାର ହୋଇନାହିଁ । ନନ୍ଦନକାନନକୁ ବିଶ୍ୱସ୍ତରୀୟ କରିବା ପାଇଁ ପ୍ରାଣୀ ଉଦ୍ୟାନରେସବୁ ପ୍ରକାର ଉନ୍ନତିମୂଳକ କାର୍ଯ୍ୟ ଜୋରସୋର ଚାଲିଛି । ଏଥିପାଇଁ ରାଜ୍ୟ ଓ କେନ୍ଦ୍ର ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ ପ୍ରାଣୀ ଉଦ୍ୟାନରେ ଗଣ୍ଡାଟିଏ ନଥିବାରୁ ପର୍ଯ୍ୟଟକ ନିରାଶ ହୋଇ ଫେରୁଛନ୍ତି ।
ନନ୍ଦନକାନନକୁ ୧୯୭୯ ମସିହାରେ ଆସାମର ଗୌହାଟିରୁ ୩ବର୍ଷ ବୟସର ଅଣ୍ଡିରା ଗଣ୍ଡା ‘ନନ୍ଦ’ ଆସିଥିଲା । ପ୍ରାଣୀ ଉଦ୍ୟାନ ଜଳାଶୟ ନିକଟ ୬୨ ନଂ.ଖୁଆଡ଼ରେ ନନ୍ଦକୁ ରଖାଯାଇଥିଲା । ଦୀର୍ଘ ୩୭ ବର୍ଷଧରି ‘ନନ୍ଦ’ ପର୍ଯ୍ୟଟକଙ୍କ ମନୋରଞ୍ଜନ କରିଥିଲା । କିନ୍ତୁ ୨୦୧୬ ମସିହାରେ ଗଣ୍ଡା ଦିବସର କିଛି ମାସ ପୂର୍ବରୁ ହଠାତ୍ ଅସୁସ୍ଥ ହୋଇପଡ଼ିଥିଲା । ୬ ମାସ ଧରି ତା’ର ଚିକିତ୍ସା କରାଯାଇଥିଲା । ମାତ୍ର ସେହିବର୍ଷ ସେପ୍ଟେମ୍ବର ୨୮ ତାରିଖରେ ୪୦ ବର୍ଷ ବୟସରେ ତା’ର ମୃତ୍ୟୁ ହୋଇଥିଲା । ଜୀବଜନ୍ତୁ କଟକଣା ପରେ ଅଦଳ ବଦଳ ପ୍ରକ୍ରିୟାରେ ଗଣ୍ଡା ଆସିବା ସମ୍ଭବ ହୋଇପାରୁନି । ସରକାର ଯଦି ଏଥିପ୍ରତି ଗୁରୁତ୍ୱ ଦିଅନ୍ତି, ତେବେ ଗଣ୍ଡା ଆସିପାରନ୍ତା ବୋଲି ଜଣେ ନନ୍ଦନକାନନ ଅଧିକାରୀ କହିଛନ୍ତି ।
