ନୂଆଦିଲ୍ଲୀ: ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ ମସ୍କ ତାଙ୍କୁ ହତ୍ୟା କରିବା ଏବଂ ତାଙ୍କ ଇଲେକ୍ଟ୍ରିକ୍ ଯାନ କମ୍ପାନୀ ଟେସଲାକୁ ଧ୍ୱଂସ କରିବାର ଷଡ଼ଯନ୍ତ୍ର ସଂପର୍କରେ ଖୋଲାଖୋଲି କହିଛନ୍ତି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଜଣେ ଘନିଷ୍ଠ ସହଯୋଗୀ, ଟେସଲା ସିଇଓ ଏବଂ ସରକାରୀ ଦକ୍ଷତା ବିଭାଗ (DOGE)ର ମୁଖ୍ୟ ମସ୍କ, ତାଙ୍କ ପ୍ରତି ବଢ଼ୁଥିବା ବିପଦ ସଂପର୍କରେ ଖୁଲସା କରିଛନ୍ତି । ଫକ୍ସ ନ୍ୟୁଜର ସିଆନ୍ ହାନିଟିଙ୍କ ସହ ସାକ୍ଷାତକାର ସମୟରେ ମସ୍କ କହିଛନ୍ତି ଯେ, କିଛି ଲୋକ ତାଙ୍କୁ ହତ୍ୟା କରିବାକୁ ଚାହାଁନ୍ତି। କାରଣ ସେ ସରକାରୀ ଅପଚୟ ଏବଂ ଠକେଇକୁ ହ୍ରାସ କରିବା ପାଇଁ ପ୍ରୟାସ କରୁଛନ୍ତି।
ଯେତେବେଳେ ଆପଣ ଲୋକଙ୍କଠାରୁ ଠକେଇ କରି ଉପାର୍ଜନ କରୁଥିବା ଟଙ୍କା ଛଡ଼େଇ ନିଅନ୍ତି, ସେମାନେ ବହୁତ ବିରକ୍ତ ହୁଅନ୍ତି ବୋଲି ମସ୍କ କହିଛନ୍ତି। ସେମାନେ ମୋତେ ହତ୍ୟା କରିବାକୁ ଚାହାଁନ୍ତି କାରଣ ମୁଁ ସେମାନଙ୍କର ଠକେଇକୁ ବନ୍ଦ କରୁଛି। ସେମାନେ ଟେସଲାକୁ କ୍ଷତି ପହଞ୍ଚାଇବାକୁ ଚାହାଁନ୍ତି, କାରଣ ଆମେ ଭୟଙ୍କର ଅପଚୟ ଏବଂ ଦୁର୍ନୀତିକୁ ବନ୍ଦ କରୁଛୁ । ମସ୍କ କହିଛନ୍ତି, ମୁଁ ଭାବୁଛି ସେମାନେ ଖରାପ ଲୋକ। ଖରାପ ଲୋକମାନେ ଖରାପ କାମ କରନ୍ତି ।
ସୂଚନାଯୋଗ୍ୟ, ଆମେରିକାରେ ଥିବା ବିଭିନ୍ନ ଟେସଲା ପ୍ଲାଣ୍ଟରେ ବିରୋଧ ପ୍ରଦର୍ଶନ ହୋଇଛି । କେତେକ ଟେସଲା କାରକୁ ଦୁର୍ବୃତ୍ତ ଭଙ୍ଗାରୁଜା କରିଛନ୍ତି । ମାର୍ଚ୍ଚ୧୯ ସକାଳେ ନେଭାଡାର ଲସ ଭେଗାସରେ ଏକ ଡିଲରସିପ୍ରେ ଜଣେ ବକ୍ତି ୫ଟି ଟେସଲା ଗାଡ଼ିରେ ନିଆଁ ଲଗାଇ ଦେଇଥିଲେ । ଗତ ସପ୍ତାହରେ, ନ୍ୟୁୟର୍କ ସହରର ଏକ ଟେସଲା ଶୋ’ରୁମ୍ ବାହାରେ ପ୍ରାୟ ୨୫୦ ଜଣ ପ୍ରଦର୍ଶନକାରୀ ଏକତ୍ରିତ ହୋଇ ମସ୍କ ବିରୋଧୀ ପ୍ଲାକାର୍ଡ ଧରି ବିରୋଧ ପ୍ରଦର୍ଶନ କରିଥିଲେ । ଆମେରିକା ରାଷ୍ଟ୍ରପତି ଟ୍ରମ୍ପ, ମସ୍କଙ୍କୁ ସମର୍ଥନ କରି କହିଥିଲେ ଯେ, ପ୍ରଦର୍ଶନକାରୀମାନେ ଏକ ମହାନ ଆମେରିକୀୟ କମ୍ପାନୀକୁ କ୍ଷତି ପହଞ୍ଚାଉଛନ୍ତି।
