ମୁମ୍ବାଇ : ସିନେମା ହଲରେ କମାଲ କରୁଛି ଭାରତୀୟ ସିନେମା ‘ଧୁରନ୍ଧର-୨’ ଦି ରିଭେଞ୍ଜ । ବ୍ୟବସାୟ ଦୃଷ୍ଟି କୋଣରୁ ମଧ୍ୟ ଦମଦାର ପ୍ରଦର୍ଶନ କରୁଛି ଏହି ଫିଲ୍ମ । ପ୍ରଥମ ଦିନରେ ଓ୍ବାଲ୍ଡଓ୍ବାଇଡ୍ କଲେକ୍ସନରେ ମଧ୍ୟ ରେକର୍ଡ କରିଛି । ୪ ଘଣ୍ଟାର ଏହି ଫିଲ୍ମଟି ପ୍ରଥମ ଦିନରେ ୨୦୦ କୋଟିରୁ ଅଧିକ ଟଙ୍କା ରୋଜଗାର କରିଛି । ଫିଲ୍ମରେ ଜ୍ବଳନ୍ତ ଅଭିନୟକୁ ଦର୍ଶକେ ବେଶ ଭଲପାଇବା ଦେଉଥିବାବେଳେ ଛୁଟୁଛି ପ୍ରଂଶସାର ସୁଅ । ଯେଉଁଥିରେ ସାମିଲ୍ ହୋଇଛନ୍ତି ସାଉଥ୍ ଫିଲ୍ମ ଜଗତର ଜଣାଶୁଣା ଡାଇରେକ୍ଟର ରାଜାମୌଲି । ବାହୁବଳି ଭଳି ହିଟ୍ ଫିଲ୍ମର ନିର୍ଦେ୍ଦଶନା ଭାର ସମ୍ଭାଳିଥିବା ରାଜାମୌଲି ଧୁରନ୍ଧରକୁ ନେଇ ପ୍ରଂଶସା କରିଛନ୍ତି ।

 

ରାଜାମୌଲି ଏବେ ଏକ ୧୨ଶହ କୋଟି ଟଙ୍କାର ଫିଲ୍ମର ନିର୍ଦ୍ଦେଶନା ଦେଉଛନ୍ତି । ବାରଣାସୀ ନାମରେ ଏହି ଫିଲ୍ମ ହାଇବଜେଟରେ ନିର୍ମାଣ ହେଉଛି । ଯେଉଁଥିରେ ମହେଶବାବୁଙ୍କ ସହ ପ୍ରିୟଙ୍କା ଚୋପ୍ରା ନଜର ଆସିଛନ୍ତି । ତଥାପି ଆଦିତ୍ୟ ଧରଙ୍କ ନିର୍ଦ୍ଦେଶିତ ‘ଧୁରନ୍ଧର-୨’ର ପ୍ରଂଶସା କରିଛନ୍ତି ରାଜାମୌଲି । ସେ ଏକ୍ସରେ ପୋଷ୍ଟ କରି ପ୍ରଂଶସା କରିଛନ୍ତି । ସେ ଲେଖିଛନ୍ତି କି, ପ୍ରଥମ ଭାଗକୁ ମୁଁ ବେଶ ପସନ୍ଦ କରିଥିଲି । ପ୍ରଥମ ଭାଗ ବହୁତ ଭଲ ହୋଇଥିଲା । ମାତ୍ର ଦ୍ବିତୀୟ ଭାଗର ଲେଖା, କାଷ୍ଟିଂ ସାଙ୍ଗକୁ ଅଭିନୟ ଏବଂ ଏଡିଟିଙ୍ଗ୍ ସବୁ ବେଷ୍ଟ ହୋଇଛି । ଫିଲ୍ମର ଗୀତ ବେଶ ହୃଦୟସ୍ପର୍ଶୀ ହୋଇଛି । ଶେଷ ପର୍ଯ୍ୟନ୍ତ ଦର୍ଶକଙ୍କୁ ବାନ୍ଧି ରଖିବା ପାଇଁ ସବୁ ପ୍ରକାର ପ୍ରୟାସ କରାଯାଇଛି । ୪ ଘଣ୍ଟାର ଫିଲ୍ମ ନିର୍ମାଣ ଏବଂ ରିଲିଜ୍ କରିବା ପାଇଁ ସାହସ ରହିବା ଦରକାର । ଧନ୍ୟବାଦ ଆଦିତ୍ୟ ଧର ଏବଂ ଟିମ୍ ।

ଏହାସହ ପଢ଼ନ୍ତୁ : ‘ଧୁରନ୍ଧର ଦ ରିଭେଞ୍ଜ’ ରେ ଦଶକ ପୁରୁଣା ‘କୱାଲି’ର ସ୍ମୃତି ତାଜା, ମନେ ପଡିଲେ ସୁପରଷ୍ଟାର ରାଜେଶ ଖାନ୍ନା