ଭୁବନେଶ୍ୱର,୧୨/୧୧: ରାଜ୍ୟ କ୍ରୀଡ଼ା ଓ ଯୁବସେବା ଏବଂ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ସମର୍ଥନରେ ଆସନ୍ତା ୧୭ ତାରିଖ କଳିଙ୍ଗ ଷ୍ଟାଡିୟମରେ ସିଆଇଆଇ ୟଙ୍ଗ୍ ଇଣ୍ଡିଆନ୍ସ ପକ୍ଷରୁ ଦ୍ୱିତୀୟ ‘ୱାଇଆଇ ରନ୍’ ଭୁବନେଶ୍ୱର ଆୟୋଜିତ ହେବ । ମାରାଥନରେ ୩ଟି ବର୍ଗର ୨.୫ କି.ମି ଫନ୍ ରନ୍, ୫ କି.ମି ଓ ୧୦ କି.ମି ଦୌଡ଼ରେ ମୋଟ ୧,୦୨,୦୦୦ ଟଙ୍କା ପୁରସ୍କାର ରାଶି ରହିଛି । ସୋମବାର ମାରାଥନର ଲୋଗୋ ଉନ୍ମୋଚିତ ହୋଇଥିଲା ।
ଏହି କାର୍ଯ୍ୟକ୍ରମ ମାଧ୍ୟମରେ ମାନସିକ ସ୍ୱାସ୍ଥ୍ୟ ଓ ନିଶା ଦ୍ରବ୍ୟ ସେବନ ସମ୍ପର୍କରେ ସଚେତନତା ସୃଷ୍ଟି କରିବା, ସମସ୍ତଙ୍କ ପାଇଁ ସୁସ୍ଥ, ନିଶାମୁକ୍ତ ଜୀବନ ପାଇଁ ପ୍ରେରଣା ଦେବା ହେଉଛି ୱାଇଆଇ ଭୁବନେଶ୍ୱରର ମୁଖ୍ୟ ଉଦ୍ଦେଶ୍ୟ । ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୂରଜ ଓ ଜାତୀୟ ରଗବୀ ଖେଳାଳି ରାହୁଲ ବୋଷ ଦୌଡ଼କୁ ପତାକା ଦେଖାଇ ଶୁଭାରମ୍ଭ କରିବାର କାର୍ଯ୍ୟକ୍ରମ ରହିଛି । ନିଶାମୁକ୍ତ ଓଡ଼ିଶା ପାଇଁ ଦୌଡ଼ିବାକୁ ସମସ୍ତଙ୍କୁ ମାରାଥନରେ ଭାଗ ନେବା ପାଇଁ ଆୟୋଜକଙ୍କ ପକ୍ଷରୁ ଅନୁରୋଧ କରାଯାଇଛି ।
