ନାଚୁଣୀରେ ଯୋଗୀ: ରାଜ୍ୟ ସରକାରଙ୍କୁ ଟାର୍ଗେଟ୍ କଲେ, କହିଲେ ରାଜ୍ୟବାସୀଙ୍କୁ ଧୋକା ଦେଉଛନ୍ତି

ନାଚୁଣୀ ୨୦/୨: ଭବାନୀପାଟଣା ପରେ ଖୋର୍ଦ୍ଧା ନାଚୁଣୀରେ ଦଳୀୟ କର୍ମୀଙ୍କୁ ଉଦବୋଧନ ଦେଲେ ୟୁପି ମୁଖ୍ଯମନ୍ତ୍ରୀ ଯୋଗୀ ଆଦିତ୍ୟନାଥ । ନାଚୁଣୀରେ ରାଜ୍ଯ ସରକାରଙ୍କୁ ଟାର୍ଗେଟ୍ କଲେ ଯୋଗୀ । କହିଲେ ନବୀନ ସରକାର ଓଡିଶାବାସୀଙ୍କୁ ଧୋକା ଦେଉଛନ୍ତି ।

ଯୋଗୀ କହିଲେ ପ୍ରଧାନମନ୍ତ୍ରୀ ଦେଶର ବିକାଶ ଚାହୁଁଛନ୍ତି । ସବୁ ଗରିବକୁ ଘର ମିଳିବ, ସ୍ୱଚ୍ଛ ଭାରତ ମିଶନରେ ସମସ୍ତଙ୍କ ଘରେ ଶୌଚାଳୟ ଏବଂ ଘରେ ଘରେ ବିଦ୍ଯୁତ୍ ମିଳିବ । ଯେଉଁଠି ବିଜେପି ସରକାର ଅଛନ୍ତି ସେଠି କେନ୍ଦ୍ର ଓ ରାଜ୍ଯ ମିଶି ଏହି ଯୋଜନାକୁ ଆଗକୁ ବଢାଉଛନ୍ତି କିନ୍ତୁ ଯେଉଁଠି ବିଜେପି ସରକାର ନାହିଁ ସେଠି ରାଜ୍ଯବାସୀ ଲୋକ କଲ୍ୟାଣ ଯୋଜନାରୁ ବଞ୍ଚିତ ହେଉଛନ୍ତି । ଏପରି କହି ନବୀନ ସରକାରଙ୍କୁ ଟାର୍ଗେଟ୍ କଲେ ଯୋଗୀ । କହିଲେ ୟୁପିରେ ୨ ବର୍ଷରେ ବିଜେପି ସରକାର ୨ କୋଟି ୬୦ ଲକ୍ଷ ପରିବାରକୁ ଶୌଚାଳୟ ପ୍ରଦାନ କରିଛି କିନ୍ତୁ ଓଡିଶାରେ ସରକାର ଏହା କରିବାରେ ବିଫଳ ।

ୟୁପିରେ ୧ କୋଟି ପରିବାରକୁ ବିଦ୍ଯୁତ୍ ଯୋଗାଇ ଦିଆଯାଇଛି । କିନ୍ତୁ ଓଡିଶାରେ ଓଡିଶାର ମହାପୁରୁଷଙ୍କ ପ୍ରତି ବି ସମ୍ମାନ ଦେଖାଉନାହାନ୍ତି ନବୀନ ସରକାର । ପାଇକ ବିଦ୍ରୋହର ୨ ଶହ ବର୍ଷ ସ୍ମାରକୀ ନିର୍ମାଣ ପାଇଁ କେନ୍ଦ୍ର ପ୍ରସ୍ତୁତ । କିନ୍ତୁ ଓଡିଶା ସରକାର ସ୍ମାରକୀ ପାଇଁ ଜମି ଦେଉନାହାନ୍ତି । ଓଡିଶାର ଏହି ସରକାରଙ୍କ ମୁଖା ଖୋଲିବାକୁ ପଡିବ ବୋଲି କହିଲେ ଯୋଗୀ ।

ଆହୁରି କହିଛନ୍ତି ଯୋଗୀ । ପ୍ରଧାନମନ୍ତ୍ରୀ ମୋଦି ସେପ୍ଟେମ୍ବର ୨୦୧୮ରେ ଆୟୁଷ୍ମାନ ଭାରତ ନାଁରେ ଏକ ଯୋଜନା ଚଲାଇଛନ୍ତି । ଏହି ଯୋଜନାରେ ଦେଶରେ ପ୍ରତି ଗରିବ ପରିବାରକୁ ବର୍ଷକରେ ୫ ଲକ୍ଷ ଟଙ୍କାର  ନିଶୁଳ୍କ ସ୍ୱାସ୍ଯସେବା ପ୍ରଦାନ କରାଯାଉଛି । ୟୁପିରେ ୬ କୋଟି ଏହି ଯୋଜନାରେ ଲାଭାନ୍ୱିତ ହୋଇଛନ୍ତି । କିନ୍ତୁ ଓଡିଶାରେ ନବୀନ ଏହାକୁ ଲାଗୁ କରୁନାହାନ୍ତି । ନବୀନଙ୍କୁ ଯଦି ପ୍ରକୃତରେ ଗରିବ, ଦଳିତ ଓ ମହିଳାଙ୍କ ଚିନ୍ତା ଥାନ୍ତା ତେବେ ସେ ଏହି ଯୋଜନାକୁ ରାଜ୍ୟରେ ଲାଗୁ କରିଥାନ୍ତେ । ଆୟୁଷ୍ମାନ ଭାରତ ଯୋଜନାକୁ ଓଡିଶାରେ ଲାଗୁ କରାଯାଉନାହିଁ । ଗରିବ, ଅନଗ୍ରସରଙ୍କ ପ୍ରତି ନବୀନ ସରକାରଙ୍କ ଆଦୌ ଦରଦ ନାହିଁ । ନିଜସ୍ୱ ଏଜେଣ୍ଡାରେ ଏଠି ନବୀନ, ସରକାର ଚଳାଇଛନ୍ତି । ନବୀନ ସରକାର ଓଡିଶା ଲୋକଙ୍କ ସହ ଧୋକା କରୁଛନ୍ତି । ଏଠିକାର ସରକାର ଆପଣଙ୍କ ଭାବନା ସହ ଖେଳୁଛି । ଓଡିଶାରେ ବିଜେପି ଆସିଲେ ସୁଶାସନ ହେବ, ବିକାଶ ହେବ । ଏଥିପାଇଁ ଆମକୁ ମିଶନ ୨୦୧୯ ପାଇଁ ପ୍ରସ୍ତୁତ ହେବାକୁ ପଡିବ ବୋଲି ଦଳୀୟ କର୍ମୀଙ୍କୁ ଉଦବୋଧନ ଦେଇଥିଲେ ଯୋଗୀ ଆଦିତ୍ଯନାଥ ।