ରାଇରଙ୍ଗପୁର, ୩୦/୦୬: କେନାଲକୁ ଶୌଚ ପାଇଁ ଯାଇଥିଲେ ଯୁବକ । ପାଣିରେ ଭାସିଯିବାରୁ ଚାଲିଗଲା ଜୀବନ । ମୃତକ ହେଲେ ଏକ ତାଳି ଗ୍ରାମର ପରେଶ ମୁର୍ମୁର ପୁତ୍ର ଭୋଗଲା ମୁର୍ମୁ ବୋଲି ଜଣାପଡ଼ିଛି । ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ବଣକାଠି ଗ୍ରାମ ପଞ୍ଚାୟତର ଏକତାଳି ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଏକତାଳି ଗାଁର ଭୋଗଲା ମୁର୍ମୁ ସୋମବାର ସକାଳୁ ଶୌଚ ପାଇଁ କେନାଲକୁ ଯାଇଥିଲେ । ହେଲେ ସେଠାରେ ତାଙ୍କ ଗୋଡ଼ ଖସି ଯାଇଥିଲା । ଫଳରେ ସେ ପାଣିରେ ଭାସି ଯାଇଥିଲେ । ଏହା ଦେଖି ପାଖରେ ଥିବା ଗ୍ରାମବାସୀ ତୁରନ୍ତ ତାଙ୍କୁ ଉଦ୍ଧାର କରି ରାଇରଙ୍ଗପୁର ଉପଖଣ୍ଡ ସରକାରୀ ଡାକ୍ତରଖାନା ନେଇଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏସମ୍ପର୍କରେ ଖବର ପାଇ ମୃତଦେହ ଜବତ କରି ଏକ ଅପମୃତ୍ୟୁ ମାମଲା ରୁଜୁ କରିଛି ପୁଲିସ ।
