ଭୁବନେଶ୍ୱର, ୨୯।୪: ରାଜ୍ୟବାସୀଙ୍କୁ କଲବଲ କରୁଛି ତାତି । ତତଲା ପବନ ସହ ଶୁଷ୍କ ଝାଞ୍ଜି ପବନ ଜନଜୀବନ ଅସ୍ତବ୍ୟସ୍ତ କରିପକାଉଛି । ଡହଡହ ଖରାରେ ଆଉଟୁପାଉଟୁ ହେଉଛନ୍ତି ଲୋକେ । ଗତ କିଛି ଦିନ ଧରି କ୍ରମାଗତ ଭାବେ ପାରଦ ଉପରମୁହାଁ ହେବାରେ ଲାଗିଛି । ତାତି ୪୪ ଡିଗ୍ରୀ ଡେଇଁଲାଣି । ଗତ କିଛି ଦିନ ଧରି ୪୦ ଡିଗ୍ରୀ ଉପରେ ରହୁଥିବା ଭୁବନେଶ୍ୱର ଶନିବାର ସମସ୍ତ ରେକର୍ଡ ଭାଙ୍ଗିଥିଲା । ୪୪.୬ ଡିଗ୍ରୀ ଛୁଇଁଥିଲା ପାରଦ । ତେବେ ରବିବାର ଭୁବନେଶ୍ୱରରେ ତାପମାତ୍ରା ୪୩.୨ ଡିଗ୍ରୀ ଥିଲା । ସୋମବାର ସକାଳ ୮.୩୦ ସୁଦ୍ଧା ରାଜଧାନୀରେ ୩୩.୮° ତାପମାତ୍ରା ରେକର୍ଡ ହୋଇଛି ।
ସେହିଭଳି ବାରିପଦା ଓ ବାଲେଶ୍ୱରରେ ୩୬°, ମାଲକାନଗିରି ଓ କେନ୍ଦୁଝରରେ ୩୫°, ଭବାନୀପାଟଣାରେ ୩୪.୪°, ଭୁବନେଶ୍ୱରରେ ୩୩.୮°, ଜଗତସିଂହପୁରରେ ୩୩.୪°, ଅନୁଗୁଳରେ ୩୩°, ବୌଦ୍ଧରେ ୩୩°, ଟିଟଲାଗଡ଼ରେ ୩୩° ଓ କଟକରେ ୩୨.୬° ତାପମାତ୍ରା ରେକର୍ଡ କରାଯାଇଛି ।