ବେଙ୍ଗାଲୁରୁ: ଥାଇଲାଣ୍ଡର ରାଜଧାନୀ ବ୍ୟାଙ୍କକରୁ ୧୦ଟି ଆନକୋଣ୍ଡା ନେଇ ବେଙ୍ଗାଲୁରୁ ଆସିଥିବା ବ୍ୟକ୍ତିଙ୍କୁ ଗିରଫ କରାଯାଇଛି । ବେଙ୍ଗାଲୁରୁର କେମ୍ପାଗୌଡା ଅନ୍ତର୍ଜାତୀୟ ବିମାନବନ୍ଦରେ ଓହ୍ଲାଇବା ପରେ ସଂପୃକ୍ତ ବ୍ୟକ୍ତିଙ୍କ ବ୍ୟାଗରୁ ୧୦ଟି ଆନାକୋଣ୍ଡା ମିଳିଥିଲା । କଷ୍ଟମ ବିଭାଗ ପକ୍ଷରୁ ଏକ୍ସରେ ସୂଚନା ଦିଆଯାଇଛି ଯେ, ବ୍ୟାଙ୍କକରୁ ଏକ ସିଲ୍ ବ୍ୟାଗରେ ସାପ ନେଇ ଆସିଥିବା ବ୍ୟକ୍ତିଙ୍କୁ ଗିରଫ କରାଯାଇଛି । ଘଟଣାରେ ତଦନ୍ତ ଜାରି ରହିଛି ।
ହଳଦିଆ ରଙ୍ଗର ଏହି ଆନାକୋଣ୍ଡା ବିଶେଷ କରି ପାରାଗୁଏ, ବୋଲିଭିଆ, ବ୍ରାଜିଲ, ଆର୍ଜେଣ୍ଟିନା ଏବଂ ଉରୁଗୁଏରେ ଦେଖିବାକୁ ମିଳେ । ନିୟମ ଅନୁସାରେ ଭାରତରେ ବନ୍ୟଜନ୍ତୁ ବିକ୍ରି ଏବଂ ଚୋରାଚାଲାଣ ଜଘନ୍ୟ ଅପରାଧ । ଏହା ପୂର୍ବରୁ ୨୦୨୩ରେ ବେଙ୍ଗାଲୁରୁ କଷ୍ଟମ ବିଭାଗ ଏକ ଛୋଟ କଙ୍ଗାରୁ ସମେତ ୨୩୪ଟି ବନ୍ୟଜନ୍ତୁ ଉଦ୍ଧାର କରିଥିଲା ।
ଜଣେ ବ୍ୟକ୍ତି ବ୍ୟାଙ୍କକରୁ ବନ୍ୟଜନ୍ତୁଙ୍କୁ ପ୍ଲାଷ୍ଟିକ ବ୍ୟାଗରେ ଭର୍ତ୍ତି କରି ଆଣିଥିଲେ । ପ୍ଲାଷ୍ଟିକ ବ୍ୟାଗରେ ଥିବାରୁ ଶ୍ବାସକ୍ରିୟା କରିନପାରି ଛୋଟ କଙ୍ଗାରୁଟିର ମୃତ୍ୟୁ ହୋଇଥିଲା । ଖବର ପାଇ କଷ୍ଟମ ବିଭାଗ ବେଙ୍ଗାଲୁରୁ ବିମାନବନ୍ଦରରେ ପହଞ୍ଚିଥିଲା ।ସମ୍ପୃକ୍ତ ବ୍ୟକ୍ତି ନେଇ ଆସିଥିବା ବ୍ୟାଗଗୁଡ଼ିକୁ ଯାଞ୍ଚ କରାଯାଇଥିଲା । ସେଥିରୁ ପାଇଥନ୍, ଝିଟିପିଟି, ଇଗୁଆନା, କଇଁଛ ଏବଂ ଛୋଟ ଛୋଟ କୁମ୍ଭୀର ମିଳିଥିଲା । ସେଗୁଡ଼ିକ ମଧ୍ୟରୁ କେତେକ ଜୀବ ବିଲୁପ୍ତପ୍ରାୟ ପ୍ରଜାତିର ଥିଲେ।