ନୀଳଗିରି, ୨୯/୩ : ବିଜେପିରୁ ଇସ୍ତଫା ଦେଲେ ବାଲେଶ୍ଵର ଜିଲ୍ଲା ନୀଳଗିରି ବିଧାୟକ ଇଂ ସୁକାନ୍ତ କୁମାର ନାୟକ। ଶୁକ୍ରବାର ସେ ବିଧିବଦ୍ଧ ଭାବେ ଦଳ ଛାଡିଛନ୍ତି। ସାମ୍ବାଦିକ ସମ୍ମିଳନୀ ଜରିଆରେ ଏନେଇ ସୂଚନା ଦେଇଛନ୍ତି।
ଇଂ ସୁକାନ୍ତ ନାୟକ ଗତ ୨୦୧୯ ମସିହାରେ ବିଜେଡି ଜିଲ୍ଲା ସଭାପତି ରବୀନ୍ଦ୍ର ଜେନାଙ୍କ ସହିତ ମନୋମାଳିନ୍ୟ କାରଣରୁ ବିଜେଡି ଛାଡି ବିଜେପିରେ ମିଶିଥିଲେ। ବିଜେପି ଦଳରୁ ବିଧାୟକ ପ୍ରାର୍ଥୀ ହୋଇ ଜିତିଥିଲେ। ପରେ ସାଂସଦ ପ୍ରତାପ ଷଡ଼ଙ୍ଗୀ ଓ ସହକର୍ମୀମାନଙ୍କ ମଧ୍ୟରେ ତାଳମେଳ ରହୁ ନଥିବାରୁ ସର୍ବଦା ବିବାଦ ଲାଗି ରହୁଥିଲା। ଯାହାଫଳରେ ସେ ଆଜି ରାଜ୍ୟ ସଭାପତିଙ୍କୁ ଇସ୍ତଫା ଦେଇଛନ୍ତି। ତେବେ ସେ କେଉଁ ଦଳରେ ଯୋଗଦେବେ ବୋଲି କିଛି କହି ନଥିବା ବେଳେ ଆଗକୁ ସୂଚନା ଦେବେ ବୋଲି କହିଛନ୍ତି। ଗତ ନିର୍ବାଚନରେ ବିଜେଡି ଦଳରୁ ସନ୍ତୋଷ ଖଟୁଆ ଟିକେଟ ପାଇ ମାତ୍ର ୧୫୭୭ ଖଣ୍ଡ ଭୋଟରେ ପରାଜିତ ହୋଇଥିଲେ। ଯଦି ସୁକାନ୍ତ ବିଜେଡିରେ ଯୋଗଦେବେ ତାହେଲେ ବିଜେଡି ସୁପ୍ରିମୋ କାହା ଉପରେ ଆସ୍ଥା ରଖୁଛନ୍ତି ତାହା ଉପରେ ନଜର ରହିଛି। ସେପଟେ ଯାହାର ଟିକେଟ କଟେ ହୁଏତ ତାଙ୍କୁ ବାଲେଶ୍ଵର ସାଂସଦ ଭାବେ ଟିକେଟ ମିଳିପାରେ ବୋଲି ମଧ୍ୟ ଚର୍ଚ୍ଚା ହେଉଛି।