ଅଯୋଧ୍ୟା,୨୮/୦୪: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆସନ୍ତା ମାସ ୧ ତାରିଖରେ ରାମ ନଗରୀ ଅଯୋଧ୍ୟା ଯାତ୍ରା କରିବେ । ସେ ଅଯୋଧ୍ୟା ରାମ ମନ୍ଦିରରେ ପ୍ରଭୁ ରାମଲଲାଙ୍କୁ ଦର୍ଶନ କରିବେ । ହନୁମାନଗଡ଼ି ବି ଯିବେ । ଏହାବ୍ୟତୀତ ସରଜୁ ନଦୀ ତଟରେ ହେବାକୁ ଥିବା ଆଳତି କାର୍ଯ୍ୟକ୍ରମରେ ମଧ୍ୟ ରାଷ୍ଟ୍ରପତି ସାମିଲ ହେବେ । ତେବେ ବର୍ତ୍ତମାନ ସୁଦ୍ଧା ଏ ନେଇ ଅଫିସିଆଲ୍ ପ୍ରୋଟୋକଲ୍ ଜାରି ହୋଇନାହିଁ । ରାମଲଲାଙ୍କ ପ୍ରାଣ ପ୍ରତିଷ୍ଠା ପରେ ରାଷ୍ଟ୍ରପତିଙ୍କର ଏହା ପ୍ରଥମ ଅଯୋଧ୍ୟା ଗସ୍ତ ହେବ ।
ଖବର ମୁତାବକ ରାଷ୍ଟ୍ରପତିଙ୍କ ଗସ୍ତକୁ ନେଇ ରାଷ୍ଟ୍ରପତି ଭବନର ଅଧିକାରୀମାନେ ଉତ୍ତର ପ୍ରଦେଶ ସରକାର ଏବଂ ଅଯୋଧ୍ୟା ପ୍ରଶାସନ ସହ ଯୋଗାଯୋଗରେ ଅଛନ୍ତି । ରାଷ୍ଟ୍ରପତି ଅଯୋଧ୍ୟାରେ ୩ ଘଣ୍ଟା ରହିବେ । ମେ ୧ ସନ୍ଧ୍ୟାରେ ସେ ଅଯୋଧ୍ୟା ବିମାନବନ୍ଦରରେ ପହଞ୍ଚିବେ । ସୂତ୍ର ମୁତାବକ ଉପ ରାଷ୍ଟ୍ରପତି ଜଗଦୀପ ଧନଖଡ଼ ମଧ୍ୟ ଏପ୍ରିଲ ୩୦ରୁ ମେ ୩ ମଧ୍ୟରେ ଅଯୋଧ୍ୟା ଗସ୍ତ କରିପାରନ୍ତି । ଜିଲ୍ଲା ପ୍ରଶାସନ ରାଷ୍ଟ୍ରପତି ଓ ଉପ ରାଷ୍ଟ୍ରପତିଙ୍କ ଆଗମନକୁ ନେଇ ପ୍ରସ୍ତୁତିରେ ଲାଗିପଡ଼ିଛି ।
