କୋଲକାତା,୨୫/୦୪: ପଶ୍ଚିମବଙ୍ଗର ବହରାମପୁର ଲୋକସଭା ଆସନରୁ ଟିଏମ୍ସି ପ୍ରାର୍ଥୀ ହୋଇଥିବା ପୂର୍ବତନ କ୍ରିକେଟର ୟୁସୁଫ ପଠାନ ଇତିମଧ୍ୟରେ ନିଜ ପ୍ରାର୍ଥିପତ୍ର ଦାଖଲ କରିସାରିଛନ୍ତି । ତାଙ୍କୁ ଟିକଟ ମିଳିବା ପରେ ଏହି ଆସନ ହାଇପ୍ରୋଫାଇଲ ହୋଇଯାଇଛି । ଏହା ଉପରେ ଲୋକଙ୍କ ନଜର ରହିଛି ।
ୟୁସୁଫ୍ ନିଜ ସତ୍ୟପାଠରେ ଦର୍ଶାଇଛନ୍ତି ଯେ ତାଙ୍କ ପାଖରେ ମୋଟ ୪୫.୬୩ କୋଟି ଟଙ୍କାର ସମ୍ପତ୍ତି ରହିଛି । ୨୦୧୮-୧୯ରେ ତାଙ୍କ ଆୟ ୩.୧୦ କୋଟି ଟଙ୍କା ଥିଲା, ଯାହା ୨୦୧୯-୨୦ରେ କମି ୨.୦୬ କୋଟି ଟଙ୍କା ହୋଇଥିଲା । ୨୦୨୦-୨୧ରେ ଏହା ପୁଣି ୧.୦୨ କୋଟି ଏବଂ ୨୦୨୧-୨୨ରେ ୬୪.୧୮ ଲକ୍ଷ ଟଙ୍କାକୁ ହ୍ରାସ ପାଇଥିଲା । କିନ୍ତୁ ୨୦୨୨-୨୩ରେ ତାଙ୍କ ଆୟ ପୁଣି ୨.୯୨ କୋଟି ଟଙ୍କାକୁ ବଢ଼ିଥିଲା । ସତ୍ୟପାଠରେ ସେ କହିଥିଲେ କି ତାଙ୍କ ପାଖରେ ୧.୪୧ ଲକ୍ଷ ଟଙ୍କାର ନଗଦ ଥିଲା ବେଳେ ତାଙ୍କ ପତ୍ନୀ ଅଫରିନ୍ ପଠାନଙ୍କ ପାଖରେ ୧୫,୬୭୮ ଟଙ୍କା ଥିଲା । ତାଙ୍କ ବ୍ୟାଙ୍କ ଖାତାରେ ୨.୪୬ କୋଟି ଟଙ୍କା ଜମା ରହିଥିବା ବେଳେ ପତ୍ନୀଙ୍କ ଖାତାରେ ୩୬,୬୩୭ ଟଙ୍କା ରହିଛି । ୟୁସୁଫଙ୍କ ନାମରେ ୨୬.୩୪ ଲକ୍ଷ ଟଙ୍କାର ମ୍ୟୁଚୁଆଲ୍ ଫଣ୍ଡ ରହିଥିବା ବେଳେ ୬.୧୯ କୋଟିର ଇକ୍ୱିଟି ସେୟାର ହୋଲ୍ଡିଂ ଅଛି । ଏହାଛଡ଼ା ୨୧.୦୫ ଲକ୍ଷ ଟଙ୍କାର ହୀରା ଗହଣା, ୧.୮୫ କୋଟିର ସୁନା ଓ ରୁପା ଗହଣା, ୨୪.୦୬ କୋଟିର ଅସ୍ଥାବର ସମ୍ପତ୍ତି ରହିଛି । ୟୁଏଇରେ ତାଙ୍କର ଏକ ଘର ରହିଛି । ଏହାର ବଜାର ମୂଲ୍ୟ ୧.୬୫ କୋଟି ଟଙ୍କା । ଭଦୋଦରାରେ ତାଙ୍କର ଏକ କୋଠା ରହିଛି, ଯାହାର ମୂଲ୍ୟ ୭.୫୦ କୋଟି ଟଙ୍କା । ସମ୍ପତ୍ତିର ଏକଚତୁର୍ଥାଂଶ ମାଲିକାନା ତାଙ୍କ ପାଖରେ ରହିଛି।