ଭୁବନେଶ୍ୱର,୦୯/୦୩: ଗର୍ଭ ଯନ୍ତ୍ରଣାରେ ଛଟପଟ ହୋଇ ହୃଦ୍ଘାତରେ ମାଆ ଜୀବନ ଚାଲିଗଲା । କିନ୍ତୁ ମରିଲାନି ମାତୃତ୍ୱ । କମାଲ କଲା ଚିକିତ୍ସା ବିଜ୍ଞାନ ଏବଂ ଡାକ୍ତରଙ୍କ ନିଷ୍ଠା । ମୃତ ମାଆ ପେଟରୁ ଜୀବିତ ଛୁଆ ପଦାକୁ ଆସିଲା ।
ଭୁବନେଶ୍ୱର ଜଣେ ମହିଳା ୯ ମାସର ଗର୍ଭବତୀ ଥିଲେ । ଗର୍ଭ ଯନ୍ତ୍ରଣା ହେବାରୁ ଫେବ୍ରୁଆରୀ ୧୪ ତାରିଖ ରାତି ୧୧ଟା ୨ ମିନିଟ୍ରେ କ୍ୟାପିଟାଲ ହସ୍ପିଟାଲ୍ରେ ପହଞ୍ଚିଥିଲେ । ହେଲେ କାଜୁଆଲିଟିରେ ମହିଳାଙ୍କ ଇସିଜି ପରେ ୧୧ଟା ୫ ମିନିଟ୍ରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର । ସେତେବେଳେ ସ୍ତ୍ରୀ ଓ ପ୍ରସୂତି ବିଭାଗ ଡାକ୍ତର ସମ୍ବେଦନା ପାଣିଗ୍ରାହୀ ଡ୍ୟୁଟିରେ ଥିଲେ । ସେ ଓ ତାଙ୍କ ଟିମ୍ ମୃତ ମହିଳାଙ୍କ ଅଲ୍ଟ୍ରାସାଉଣ୍ଡ କରି ଜାଣିବାକୁ ପାଇଥିଲେ ଗର୍ଭସ୍ଥ ଶିଶୁ ଜୀବିତ ରହିଛି । ଏହି ଖବର ମୃତକଙ୍କ ସ୍ୱାମୀଙ୍କୁ ଜଣାଇଥିଲେ । ସ୍ୱାମୀଙ୍କ ଅନୁମତି ପରେ ତୁରନ୍ତ ମହିଳାଙ୍କ ଅସ୍ତ୍ରୋପଚାର କରାଯାଇ ଜୀବିତ ଶିଶୁ ଉଦ୍ଧାର କରାଯାଇଥିଲା । ହେଲେ ଶିଶୁ ଅବସ୍ଥା ସଙ୍କଟାପନ୍ନ ଥିଲା । ତୁରନ୍ତ ଶିଶୁକୁ ହସ୍ପିଟାଲ ଏସ୍ଏନ୍ସିୟୁରେ ଭର୍ତ୍ତି କରାଯାଇଥିଲା ।
କ୍ୟାପିଟାଲ ହସ୍ପିଟାଲ-ପିଜିଆଇଏମ୍ଆରରୁ ମିଳିଥିବା ସୂଚନା ଅନୁଯାୟୀ, ମୃତ ମାଆ ପେଟରୁ ଜୀବନ ଅବସ୍ଥାରେ ଶିଶୁ ଉଦ୍ଧାର କରିବା କେବଳ ଡାକ୍ତରୀ ପାଠ୍ୟକ୍ରମରେ ପଢ଼ାଯାଇଥିଲା । ମୃତ ମାଆ ପେଟରେ ଶିଶୁ ପ୍ରାୟ ୨୨ ମିନିଟ୍ ବଞ୍ଚିପାରେ । ହେଲେ ଡାକ୍ତରମାନେ ୧୦ ମିନିଟ୍ ଭିତରେ ମୃତକଙ୍କ ପେଟରୁ ଶିଶୁକୁ ବାହାର କରି ଚିକିତ୍ସା ଆରମ୍ଭ କରିଥିଲେ । ହସ୍ପିଟାଲ୍ରେ ଏସ୍ଏନ୍ଏସିୟୁରେ ରହିବା ପରେ ପରିବାର ଲୋକ ଶିଶୁକୁ ଏକ ଘରୋଇ ହସ୍ପିଟାଲ୍କୁ ନେଇଥିଲେ ।
ଡାକ୍ତର ସମ୍ବେଦନା ପାଣିଗ୍ରାହୀ କହିଛନ୍ତି, ମହିଳାଙ୍କ ମୃତ୍ୟୁ ହେବାର ୧୦ ମିନିଟ୍ ଭିତରେ ମୃତକ ପେଟରୁ ଜୀବନ ଅବସ୍ଥାରେ ଛୁଆ ବାହାର କରାଗଲା । ସମୟ ନଷ୍ଟ ନକରି ମହିଳାଙ୍କୁ ୪ଜଣ କର୍ମଚାରୀ କାନ୍ଧରେ ନେଇ ଓଟିକୁ ପ୍ରବେଶ କରିଥିଲେ । ସେଠାରେ ତୁରନ୍ତ ଅଲଟ୍ରାସାଉଣ୍ଡଠାରୁ ଆରମ୍ଭ କରି ଛୁଆ ବାହାର କରିବା ପ୍ରକ୍ରିୟା ଆରମ୍ଭ କରାଯାଇଥିଲା । ଛୁଆ ବାହାରିବା ପରେ ମଧ୍ୟ ଏଚ୍ଆଇଭି ଭଳି ଟେଷ୍ଟ ମଧ୍ୟ କରାଯାଇଥିଲା । ସେଥିପାଇଁ ହସ୍ପିଟାଲ୍ର ସମସ୍ତ ଟିମ୍ଙ୍କ ସହଯୋଗ ରହିଥିଲା । ବିଶେଷ କରି ନିର୍ଦ୍ଦେଶକ ପ୍ରଫେସର ଡାକ୍ତର ସୁଜାତା ମିଶ୍ର, ଏଚ୍ଓଡି ସସ୍ମିତା ବେହୁରିଆଙ୍କ ସହଯୋଗ ଥିଲା ।
