ଧରାକୋଟ,୪।୮ : ଆନ୍ଧ୍ର ପ୍ରଦେଶର ବାଲିକୁରଭା ମଣ୍ଡଳର ମଲାୟାପୁଲମ ଗାଁ ନିକଟରେ ରହିଥିବା ପଥର ଖାଦାନରେ ବିସ୍ଫୋରଣ ଘଟି ପଥର ତଳେ ଚାପି ହୋଇ ଗଞ୍ଜାମ ଓ ଗଜପତି ଜିଲ୍ଲାର ୬ ଜଣ ଶ୍ରମିକଙ୍କ ରବିବାର ମୃତ୍ୟୁ ଘଟିଛି। ଏହି ଛଅ ଜଣ ଙ୍କ ମଧ୍ୟରେ ଧରାକୋଟ ବ୍ଲକର କସେଇ ଗାଁର ସନ୍ତୋଷ ଗୌଡ଼ (୩୬) ଓ ବାହାଡ଼ାଗୁଡା ଗାଁର ମୁସା ଜେନା (୪୩) ଙ୍କର ମୃତ୍ୟୁ ଘଟିଛି।
ଆନ୍ଧ୍ର ପ୍ରଦେଶ ପ୍ରଶାସନ ତରଫରୁ ଆମ୍ବୁଲାନ୍ସ ଯୋଗେ ୬ଟି ମୃତଦେହକୁ ଓଡ଼ିଶା ପଠାଇବା ପରେ ଧରାକୋଟ ତହସିଲଦାର ଲମ୍ବୋଦର ମାରାଣ୍ଡି ଓ ଭାରପ୍ରାପ୍ତ ବିଡିଓ ସୁଶିଲ ପଟ୍ଟନାୟକ ସନ୍ତୋଷ ଓ ମୁସାଙ୍କ ଶବକୁ ପରିବାରର ଲୋକଙ୍କୁ ହସ୍ତାନ୍ତର କରିଥିଲେ । ଅତିରିକ୍ତ ଜିଲ୍ଲାପାଳ ଛତ୍ରପୁର ସନ୍ତୋଷ କୁମାର ପୃଷ୍ଟି, ଭଂଜନଗର ଉପ ଜିଲ୍ଲାପାଳ ଉମା ଶଙ୍କର ବେହେରା,ସହକାରୀ ଶ୍ରମ ଅଧିକାରୀ ହୃଷୀକେଶ ରାଓ ପ୍ରମୁଖ ଉଭୟଙ୍କ ଗାଁରେ ପହଞ୍ଚିଥିଲେ। ମୃତଦେହ ଗାଁରେ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଆତ୍ମୀୟ ପରିଜନମାନେ ଗାଁ ଶ୍ମଶାନରେ ଶବ ଦାହ କରିଥିଲେ ।
ବାଣିଜ୍ୟ,ପରିବହନ ଓ ଖଣି ମନ୍ତ୍ରୀ ବିଭୁତି ଭୁଷଣ ଜେନା, ମତ୍ସ୍ୟ ଓ ପଶୁପାଳନ ମନ୍ତ୍ରୀ ଗୋକୁଳାନନ୍ଦ ମଲିକ, ଆସିକା ଜିଲ୍ଲା ବିଜେପି ସଭାପତି ବିଜୟ ସ୍ୱାଇଁ, ବିଜେପି ନେତା ଉତ୍ତମ ପାଣିଗ୍ରାହୀ ପ୍ରମୁଖ ଉଭୟ ଗାଁରେ ପହଞ୍ଚି ପରିବାରର ସଦସ୍ୟ ମାନଙ୍କୁ ସମବେଦନା ଜଣାଇଥିଲେ । ଏହି ଅବସରରେ ଆନ୍ଧ୍ର ସରକାରଙ୍କ ତରଫରୁ ୨୦ ହଜାର
ଟଙ୍କା ଓ ରେଡକ୍ରସ ତରଫରୁ ୩୦ ହଜାର ଟଙ୍କା ମୋଟ ୫୦ ହଜାର ଟଙ୍କା ଲେଖାଏଁ ଉଭୟ ପରିବାରକୁ ପ୍ରଦାନ କରାଯାଇଥିଲା । ଏହା ମଧ୍ୟରେ ରାଜ୍ଯ ସରକାରଙ୍କ ପକ୍ଷରୁ ମୃତକଙ୍କ ପରିବାରକୁ ଚାରି ଲକ୍ଷ ଟଙ୍କା ଲେଖାଏଁ ସହାୟତା ପ୍ରଦାନ ପାଇଁ ଘୋଷଣା କରାଯାଇଛି।
ସବୁଠାରୁ ଦୁଃଖଦ ଘଟଣା ସ୍ବାମୀ ମୁସା ଙ୍କୁ ହରାଇ ସ୍ତ୍ରୀ ମଞ୍ଜୁଳା, ପୁଅ ଆଲୋକ ଓ ଝିଅ ରୂପାଲି ବେସାହାରା ହୋଇଯାଇଥିବା ବେଳେ ସେପଟେ ସନ୍ତୋଷ ଙ୍କୁ ହରାଇ ସ୍ତ୍ରୀ ରିନା,ଝିଅ ତପସ୍ୟା ଓ ଆଶା ବେସାହାରା ହୋଇଯାଇଛନ୍ତି । ଉଭୟଙ୍କ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା ବେଳେ ଉଭୟ ପରିବାରକୁ ଅଧିକ କ୍ଷତି ପୂରଣ ପ୍ରଦାନ ପାଇଁ ଗାଁ ଲୋକେ ଦାବୀ କରିଛନ୍ତି ।
