ଭୁବନେଶ୍ୱର ୦୭/୧୧: ସହର ଭିତରେ ଏଣିକି ଆଉ ଦ୍ରୁତ ବେଗରେ ମୋ ବସ୍ ଗଡ଼ିବନି । ୩୫ ଡେଇଁଲେ ଗାଡ଼ି ଆପେ ବନ୍ଦ ହୋଇଯିବ । ମୋ ବସ୍ରେ ସ୍ପିଡ୍ ଗଭର୍ଣ୍ଣର ଲଗାମ ରହିବ । ଆମାନିଆ ଡ୍ରାଇଭରମାନଙ୍କୁ ସାବଡ୍ କରାଯିବ । ନଗର ଉନ୍ନୟନ ମନ୍ତ୍ରୀ ଡାକ୍ତର କୃଷ୍ଣଚନ୍ଦ୍ର ମହାପାତ୍ର ଏପରି ତାଗିଦ କରିଛନ୍ତି ।
ଚନ୍ଦ୍ରଶେଖରପୁର ମୋ ବସ୍ ଦୁର୍ଘଟଣା ପରେ କ୍ୟାପିଟାଲ ରିଜନ ଅର୍ବାନ ଟ୍ରାନ୍ସପୋର୍ଟ (କ୍ରୁଟ) ଆକ୍ସନ ମୋଡ୍କୁ ଆସିଛି । ଏଣିକି ସହର ଭିତରେ ଚାଲୁଥିବା ସବୁ ବସ୍ରେ ସ୍ପିଡ୍ ଲିମିଟକୁ ନିୟନ୍ତ୍ରଣ କରାଯିବ । ସହର ଭିତରେ ବସର ଘଣ୍ଟା ପ୍ରତି ବେଗ ୩୫ କମି ରହିବ । ସେହିପରି କଟକ-ପୁରୀ ଓ ଖୋର୍ଦ୍ଧା ଯାଉଥିବା ବସ୍ ଗୁଡିକରେ ବେଗକୁ ଘଣ୍ଟା ପ୍ରତି ୫୦ କିମିରେ ଧାର୍ଯ୍ୟ କରାଯିବ । ଯଦି ଡ୍ରାଇଭର ଗାଡିକୁ ନିର୍ଦ୍ଧିାରିତ ବେଗରୁ ଅଧିକ ବେଗରେ ନେବାକୁ ଚାହିଁବେ ତେବେ ଗାଡି ଆପେ ବନ୍ଦ ହୋଇଯିବ ।
ଗୁରୁବାରଠୁ ମୋ ବସ୍ରେ ଠାରୁ ସ୍ପିଡ୍ ଲିମିଟ କରାଯିବ । ତେବେ ବେଗ କମିଗଲେ ସମୟ ସାରଣୀ ମଧ୍ୟ ପରିବର୍ତ୍ତନ ହେବ । ଉଦାହରଣ ସ୍ୱରୂପ ଯେଉଁ ଗାଡି ଦିନ ୧୨ଟା ବେଳେ ପହଞ୍ଚୁଥିଲା, ତାହା ଆହୁରି ୧୫ରୁ ୨୦ ମିନିଟ୍ ବିଳମ୍ବ ହେବ । ତେଣୁ ନୂଆ ବସ୍ ଟାଇମିଂ କରିବାକୁ କ୍ରୁଟ ଯୋଜନ ହେବ।
ସାଧାରଣ ଲୋକେ ଅଭିଯୋଗ କରିଛନ୍ତି ଯେ, ସହର ଭିତରେ ମୋ ବସ୍ ବେଗ ପାଇଁ ନୁହେଁ, ବେପରୁଆ ଗାଡି ଚାଳନା ପାଇଁ ଦୁର୍ଘଟଣା ଘଟୁଛି । ତେଣୁ ପ୍ରଥମେ ବଡ ମୋ ବସ୍ ବଦଳରେ ଆହୁରି ଅଧିକ ସଂଖ୍ୟକ ଇ-ବସ୍ ଚଳପ୍ରଚଳ କରୁ । ସେହିପରି ଡ୍ରାଇଭରମାନଙ୍କୁ ତାଗିଦ କରିବାକୁ ଲୋକେ ଦାବି କରିଛନ୍ତି । ସେପଟେ ଆଜି ମନ୍ତ୍ରୀ କହିଛନ୍ତି ଯେ, ଉପଯୁକ୍ତ ପ୍ରଶିକ୍ଷଣ ପାଇଥିବା ଡ୍ରାଇଭର ମାନଙ୍କୁ ନିଯୁକ୍ତି କରାଯିବ । ମୋ ବସ୍ ଚଳାଇବା ପୂର୍ବରୁ ସବୁ ବସ୍ ଡ୍ରାଇଭରଙ୍କର ମଦ୍ୟପାନ କରିଛନ୍ତି କି ନାହିଁ ତାହା ଯାଞ୍ଚ କରାଯିବ । ଆବଶ୍ୟକ ପଡ଼ିଲେ ଟିମ୍ ଅଚାନକ ଯାଞ୍ଚ କରିବେ । ୩ ବର୍ଷ ମଧ୍ୟରେ ମୋ ବସ୍ ଦ୍ୱାରା ପାଖାପାଖି ୪୫ ଦୁର୍ଘଟଣା ଘଟିଛି । ଯେଉଁଥିରେ ୧୦ ଜଣଙ୍କର ମୃତ୍ୟୁ ହୋଇଥିବା ବେଳେ ୨୫ରୁ ଊଦ୍ଧ୍ୱର୍ ଲୋକେ ଗୁରୁତର ଆହତ ହୋଇଛନ୍ତି ।
