ନୂଆଦିଲ୍ଲୀ,୩୦/୦୬: ଦେଶର ସାମାଜିକ ସୁରକ୍ଷା ବ୍ୟବସ୍ଥା ଅଧୀନରେ ୨୦୧୬ରେ ୨୨% ଲୋକ ରହିଥିଲେ । ଏହା ଅଦ୍ୟାବଧି ୬୪.୩% କୁ ବୃଦ୍ଧି ହୋଇଛି । ଏହା ଦେଶର ସାମାଜିକ ସୁରକ୍ଷା କଭ୍ରେଜରେ ପ୍ରସାରକୁ ସୂଚୀତ କରୁଛି । ଜୁନ ୨୯ରେ ପରିସଂଖ୍ୟାନ ଦିବସ ଉପଲକ୍ଷେ ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ପକ୍ଷରୁ ନିରନ୍ତର ବିକାଶ ଲକ୍ଷ୍ୟ ଆଧାରରେ ଜାତୀୟ ରିପୋର୍ଟରୁ ଏହା ଜଣାପଡ଼ିଛି ।
ସେହିଭଳି କୃଷି କ୍ଷେତ୍ରରେ ପ୍ରତି ଶ୍ରମିକଙ୍କ ମୋଟ ମୂଲ୍ୟ ସଂଯୁକ୍ତି ୨୦୧୫-୧୬ରେ ୬୧,୨୪୭ ଟଙ୍କା ଥିଲା । ଏହା ୨୦୨୫ରେ ୯୪,୧୧୦କୁ ବଢ଼ିଛି । ଯାହା କୃଷି ଉତ୍ପାଦକତା ଏବଂ ପ୍ରତି ଶ୍ରମିକଙ୍କ ଆୟରେ ଉନ୍ନତୀକୁ ଦର୍ଶାଉଛି । ଗ୍ରାମାଞ୍ଚଳରେ ସ୍ୱଚ୍ଛ ପାନୀୟଜଳ ଉତ୍ସ ବ୍ୟବହାର କରୁଥିବା ଜନସଂଖ୍ୟା ୯୯.୬୨% ଛୁଇଁଛି । ସେହିଭଳି ବିଜୁଳି ଉତ୍ପାଦନରେ ଅକ୍ଷୟ ଶକ୍ତିର ଅଂଶ ୨୨.୧୩% ।
ଦେଶର ମୁଣ୍ଡପିଛା ନବୀକରଣଯୋଗ୍ୟ ଶକ୍ତି ଉତ୍ପାଦନ କ୍ଷମତା ୬୪.୪ ୱାଟରୁ ୧୫୬.୩୧ ୱାଟ ଛୁଇଁଛି । ବର୍ଜ୍ୟବସ୍ତୁ ପ୍ରକ୍ରିୟାକରଣ ପ୍ଲାଣ୍ଟ ସଂଖ୍ୟା ୮୨୯ରୁ ୩୦୩୬କୁ ବଢ଼ିଛି । ଷ୍ଟାର୍ଟଅପ୍ ଇଣ୍ଡିଆ ଅଧିନରେ ସ୍ୱୀକୃତି ପ୍ରାପ୍ତ ଷ୍ଟାର୍ଟଅପ୍ ସଂଖ୍ୟା ୪୫୩ରୁ ୩୪,୨୯୩କୁ ବୃଦ୍ଧି ହୋଇଛି । ୨୦୦୫ ତୁଳନାରେ ୨୦୨୦ରେ ଜିଡିପିର ନିର୍ଗମନ ତୀବ୍ରତା ୩୬% ହ୍ରାସ ହୋଇଛି । ୨୦୨୫ରେ ଦେଶରେ ମୋଟ ଇଣ୍ଟରନେଟ ଉପଭୋକ୍ତା ସଂଖ୍ୟା ୩୦୨.୩୬ ନିୟୁତ ଥିଲା । ଏହା ୨୦୨୪ରେ ୯୫୪.୪୦ ନିୟୁତକୁ ବଢ଼ିଛି । ଯାହା ଦେଶରେ ଡିଜିଟାଲ ସଂଯୋଗୀକରଣରେ ଦ୍ରୁତ ଅଭିବୃଦ୍ଧିକୁ ସୂଚୀତ କରୁଛି ।
୨୦୧୫-୧୬ରେ ବର୍ଜ୍ୟବସ୍ତୁ ପ୍ରକ୍ରିୟାକରଣ ୧୭.୯୭% ଥିଲା । ଏହା ୨୦୨୪-୨୫ରେ ୮୦.୭% କୁ ବଢ଼ିଛି । ମୋଟ ଭୌଗୋଳିକ କ୍ଷେତ୍ରରେ ଜଙ୍ଗଲ ୨୧.୩୪% ଥିବା ବେଳେ ୨୦୨୩ରେ ୨୧.୭୬% ବୃଦ୍ଧି ପାଇଛି । ସେହିଭଳି ଗ୍ରାମାଞ୍ଚଳ ଏବଂ ସହରାଞ୍ଚଳରେ ଆୟ ଅସମାନତା ମଧ୍ୟ ଦ୍ରୁତ ଭାବେ କମୁଛି ।
ମନ୍ତ୍ରଣାଳୟ ପକ୍ଷରୁ ନିରନ୍ତର ବିକାଶ ଲକ୍ଷ୍ୟ ଜାତୀୟ ସୂଚକ ଫ୍ରେମୱାର୍କ ପ୍ରଗତି ରିପୋର୍ଟ, ଡାଟା ସ୍ନାପଚାଟ ଜାତୀୟ ସୂଚକ ଫ୍ରେମୱାର୍କ ପ୍ରଗତି ରିପୋର୍ଟ, ନିରନ୍ତର ବିକାଶ ଲକ୍ଷ୍ୟ ଜାତୀୟ ସୂଚକ ଫ୍ରେମୱାର୍କ ୨୦୨୫ ପ୍ରକାଶ ପାଇଛି । ଜାତୀୟ ପ୍ରାଥମିକତା ଅନୁସାରେ ସ୍ଥାୟୀ ବିକାଶ ଲକ୍ଷ୍ୟ କାର୍ଯ୍ୟକାରୀ କରିବା ଲାଗି ଭାରତର ପ୍ରତିବଦ୍ଧତାକୁ ସମର୍ଥନ କରି ମନ୍ତ୍ରଣାଳୟ ଜାତିସଂଘ ସମେତ ଅନ୍ୟ ଅଂଶୀଦାରଙ୍କ ପରାମର୍ଶ କରି ଜାତୀୟ ସୂଚକ ଫ୍ରେମୱାର୍କ ବିକଶିତ କରିଛି ।
ଏସ୍ଡିଜି ଏନ୍ଆଇଏଫ୍ ଜାତୀୟ ସ୍ତରରେ ଏସ୍ଡିଜି ନିରୀକ୍ଷଣ ପାଇଁ ମେରୁଦଣ୍ଡ ଭାବେ କାର୍ଯ୍ୟ କରେ । ନୀତି ନିର୍ଦ୍ଧାରଣ, ବିଭିନ୍ନ ଯୋଜନା, କାର୍ଯ୍ୟକ୍ରମ ରୂପାନ୍ୱୟନ ସଂସ୍ଥାଗୁଡ଼ିକୁ ଏହା ମୂଲ୍ୟବାନ ମାର୍ଗଦର୍ଶନ କରିଥାଏ । ଏସ୍ଡିଜି ଜାତୀୟ ସୂଚକ ଗୁଡ଼ିକ ଲାଗି ପ୍ରମୁଖ ତଥ୍ୟ ଉତ୍ସ ହେଉଛି ପ୍ରଶାସନିକ ତଥ୍ୟ, ସର୍ଭେ ଏବଂ ଜନଗଣନା
