ନୂଆଦିଲ୍ଲୀ: ମନି ଲଣ୍ଡରିଂ ମାମଲାରେ ଶ୍ରୀମନ୍ଦିର ସେବାୟତ ରାଜକୁମାର ଦଇତାପତିଙ୍କୁ ସୁପ୍ରିମକୋର୍ଟରୁ ଆଶ୍ବସ୍ତି ମିଳିଛି ।  ରାଜକୁମାର ଦଇତାପତିଙ୍କୁ ଆଗୁଆ ଜାମିନ ପ୍ରଦାନ କରିଛନ୍ତି ସୁପ୍ରିମକୋର୍ଟ । ୩ ସପ୍ତାହ ଭିତରେ ଆର୍‌ବିଆଇରେ ସୁଧ ସମେତ ୨୦ ଲକ୍ଷ ଟଙ୍କା ଜମା କରିବା ସର୍ତ୍ତରେ ତାଙ୍କୁ ଅଗ୍ରୀମ ଜାମିନ ମିଳିଛି । ସେ ଶ୍ରୀ ଜଗନ୍ନାଥ ମନ୍ଦିରରେ ପିଢ଼ିଗତ (generational priest) ସେବକ ବୋଲି ରାଜକୁମାର ସୁପ୍ରିମକୋର୍ଟରେ କହିଛନ୍ତି । 

କେତେ ଜଣ ବିଦେଶୀ ନାଗରିକ ୨୩୨,୫୬୮ ଡଲାର (ପ୍ରାୟ  ୧ କୋଟି ୮୬ ଲକ୍ଷ ଟଙ୍କା)ର ଜମି ଦୁର୍ନୀତି ମାମଲାରେ କୁଲଦୀପ ଶର୍ମା ଏବଂ ପତ୍ନୀ ଅପର୍ଣ୍ଣା ଶର୍ମାଙ୍କ ବିରୋଧରେ ଥାନାରେ ଅଭିଯୋଗ କରିଥିଲେ । ପରେ ଏହି ମାମଲାର ଦେଖାଶୁଣା କରିବା ଏବଂ ଅଭିଯୁକ୍ତଙ୍କ ପାଖରୁ ଟଙ୍କା ଗ୍ରହଣ କରିବା ଲାଗି ଅଭିଯୋଗକାରୀ ବିଦେଶୀ ନାଗରିକ ରାଜକୁମାରଙ୍କୁ ମଧ୍ୟସ୍ଥି କରାଇଥିଲେ । 

ଏହା ଉପରେ ପ୍ରଧାନ ବିଚାରପତି ସଞ୍ଜୀବ ଖାନ୍ନା ଏବଂ ଜଷ୍ଟିସ୍ ସଂଜୟ କୁମାରଙ୍କ ଖଣ୍ଡପୀଠ କହିଥିଲେ ଯେ, ଦୁଇ ପକ୍ଷଙ୍କ ମଧ୍ୟରେ ହୋଇଥିବା ବୁଝାମଣା ଅନୁସାରେ ବିଦେଶୀ ନାଗରିକଙ୍କ ପାଇଁ ଆବେଦନକାରୀ ୯୨ ଲକ୍ଷ ଟଙ୍କା ପାଇବାର ଥିଲା । କିନ୍ତୁ ସେ ଆରବିଆଇରେ କେବଳ ୮୦ ଲକ୍ଷ ଟଙ୍କା ଡିପୋଜିଟ୍‌ କରିଛନ୍ତି । ତେଣୁ ଖଣ୍ଡପୀଠ ଆବେଦନକାରୀଙ୍କୁ ୩ ସପ୍ତାହ ମଧ୍ୟରେ  ସୁଧ ସହ  ୨୦ ଲକ୍ଷ ଟଙ୍କା ପୈଠ କରିବା ସର୍ତ୍ତରେ ଆଗୁଆ ଜାମିନ ଦେଇଛନ୍ତି । ଆବେଦନକାରୀ ୨୦ ଲକ୍ଷ ଟଙ୍କା ପୈଠ କରିବା ପରେ ହିଁ ବିଦେଶୀ ନାଗରିକଙ୍କ ତାଙ୍କ ଟଙ୍କା ପାଇପାରିବେ ବୋଲି ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ତେବେ ଆବେଦନକାରୀଙ୍କ ପାଇଁ ବରିଷ୍ଠ ଆଇନଜୀବୀ ଆତ୍ମାରାମ ନାଡକର୍ଣ୍ଣି, ଏସ୍‌ଏସ୍‌ ରେବେଲୋ ଏବଂ ଆଇନଜୀବୀ ରାଘବ ଶର୍ମା ପକ୍ଷ ରଖିଥିଲେ ।