ବୌଦ୍ଧ,୦୨/୧୦: ଚୋରା ଗଞ୍ଜେଇ ଚାଲାଣ ବେଳେ ମାଡ଼ିବସିଲା ପୋଲିସ । ୫ ଟି ବସ୍ତାରୁ ୧ କୁଇଣ୍ଟାଲ୍ ଗଞ୍ଜେଇ ଜବତ । ଏଥିରେ ସମ୍ପୃକ୍ତ ଥିବା ୫ଜଣ ଅଭିଯୁକ୍ତ ହିତେଶ ଜାନୀ, ଯୁଗଳ ଷଣ୍ଢ, ପରଦେଶୀ ରଣା, ବାସୁଦେବ ରଣା ଓ ହିମାଂଶୁ ଭୋଇ ଗିରଫ ହୋଇଛନ୍ତି । ବୌଦ୍ଧ ଜିଲ୍ଲା ବାଉଁଶୁଣି ଥାନା ଅନ୍ତର୍ଗତ ତାଳପଡ଼ା ଗ୍ରାମ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ତାଳପଡ଼ା ଗ୍ରାମ ନିକଟରେ ସମସ୍ତ ଗାଡ଼ି ଅଟକାଇ ଯାଞ୍ଚ କରୁଥିଲା ବାଉଁଶୁଣି ପୋଲିସ । ଏହି ସମୟରେ ଏକ ଗାଡ଼ି ଉପରେ ସନ୍ଦେହ ହେବାରୁ ଗାଡ଼ିଟିକୁ ଅଟକାଇଥିଲା ପୋଲିସ । ଉକ୍ତ ଗାଡିକୁ ଯାଞ୍ଚ କରିବାରୁ ସେଥିରେ ୫ଟି ବସ୍ତାରୁ ୧ କୁଇଣ୍ଟାଲ୍ ଗଞ୍ଜେଇ ମିଳିଥିଲା । ଉକ୍ତ ଗଞ୍ଜେଇର ମୂଲ୍ୟ ୧୦ ଲକ୍ଷ ଟଙ୍କା ହେବ ବୋଲି ଅନୁମାନ କରାଯାଉଛି । ଏହି ଘଟଣାରେ ୧ କୁଇଣ୍ଟାଲ୍ ଗଞ୍ଜେଇ ଏବଂ ୫ ଜଣ ଅଭିଯୁକ୍ତଙ୍କୁ ବାଉଁଶୁଣି ପୋଲିସ ଗିରଫ କରିଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ ।
