ନିଶ୍ଚିନ୍ତକୋଇଲି ୮।୬ : ନିଶ୍ଚିନ୍ତ କୋଇଲି ବ୍ଲକ କେଣ୍ଟାଳୋ ଗ୍ରାମ ପଞ୍ଚାୟତ ମଲ୍ଲୀପୁର ସ୍ଥିତ ଶ୍ରୀ ଶ୍ରୀ ରଘୁନାଥ ଜୀଉଙ୍କ ପୀଠ କୁ ଆସୁଥିବା ଏକ ବିବାହ ଶୋଭାଯାତ୍ରାରେ ଦୁଇ ଗୋଷ୍ଠୀ ମଧ୍ୟରେ ମାରିପିଟ ହୋଇଛି। ଏଥିରେ ୧୦ରୁ ଉର୍ଦ୍ଧ୍ବ ଆହତ ହୋଇଛନ୍ତି। ଜଣକର ଅବସ୍ଥା ଗୁରୁତର ଥିବାରୁ ତାକୁ କଟକ ବଡ଼ ଡାକ୍ତରଖାନାକୁ ସ୍ଥାନନ୍ତରିତ କରାଯାଇଛି ।
ନିଶ୍ଚିନ୍ତ କୋଇଲି ବ୍ଲକ କେନ୍ତାଳୋ ଗ୍ରାମ ପଞ୍ଚାୟତ ଲୋକନାଥପୁରର ଜନୈକ ବ୍ୟକ୍ତିଙ୍କ କନ୍ୟା ସହ ଅସୁରେଶ୍ବର ଗ୍ରାମ ପଞ୍ଚାୟତ ହରିଗୋଳ ଗ୍ରାମର ଜନୈକ ବ୍ୟକ୍ତିଙ୍କ ପୁତ୍ର ସହ ବିବାହ ସ୍ଥିର ହୋଇଥିଲା । ଏହି ବିବାହ ଉତ୍ସବ ସ୍ଥାନୀୟ ରଘୁନାଥ ଜୀଉ ମନ୍ଦିର ପରିସରରେ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଥିଲା । ରବିବାର ସନ୍ଧ୍ୟାରେ ବରଯାତ୍ରୀ ଦଳ ଏକ ଶୋଭଯାତ୍ରାରେ ଆସୁଥିଲେ । ଏହି ସମୟରେ ଡିଜେ ବଜାଇବାକୁ ଓ ନାଚକୁ କେନ୍ଦ୍ର କରି ଦୁଇଗୋଷ୍ଠୀଙ୍କ ମଧ୍ୟରେ ବିବାଦର ସୂତ୍ରପାତ ହୋଇଥିଲା । ପରିସ୍ଥିତି ଏପରି ହୋଇଥିଲା ଯେ ଦୁଇ ଗୋଷ୍ଠୀ ମଧ୍ୟରେ ବଚସାରୁ ମାଡ଼ ପିଟ ହୋଇଥିଲା । ଏଥିରେ ଉଭୟ ପକ୍ଷର ୧୦ରୁ ଊର୍ଦ୍ଧ୍ବ ବ୍ୟକ୍ତି ଆହତ ହୋଇଛନ୍ତି । ଆହତଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଚିକିତ୍ସା ନିମନ୍ତେ ନିଶ୍ଚିନ୍ତକୋଇଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଛନ୍ତି । ଅବସ୍ଥା ଗୁରୁତର ଥିବରୁ କଟର ପଡ଼ା ଗ୍ରାମ ର ବାର ବର୍ଷର ବାଳକ ପ୍ରକାଶ ମଲ୍ଲିକ ଙ୍କୁ କଟକ ବଡ଼ ଡାକ୍ତର ଖାନାକୁ ସ୍ଥାନାନ୍ତରିତ କରାଯାଇଛି । ଖବର ପାଇ ନିଶ୍ଚିନ୍ତ କୋଇଲି ଥାନା ପୋଲିସ ଘଟଣା ସ୍ଥଳରେ ପହଁଞ୍ଚି ହସ୍ତକ୍ଷେପ କରିବା ପରେ ଶାନ୍ତିପୂର୍ଣ ଭାବେ ବିବାହ କାର୍ଯ୍ୟ ସମ୍ପନ୍ନ ହୋଇଛି ।
