ନୂଆଦିଲ୍ଲୀ,୨୬/୦୬: ମେକ୍ସିକୋ ଗନାଜୁଆଟୋର ଇରାପୁଆଟୋରେ ଅଭାବନୀୟ ଘଟଣା । ଗତକାଲି ରାତିରେ ଏକ ଉତ୍ସବ ପାଳନ ବେଳେ ଫୁଟିଲା ଗୁଳି । ଯେଉଁଥିରେ ପାଖାପାଖି ୧୨ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏଥିସହ ୨୦ରୁ ଅଧିକ ଆହତ ହୋଇଛନ୍ତି ।
ସୂଚନା ଅନୁଯାୟୀ, ଇରାପୁଆଟୋରେ ଲୋକମାନେ ରାସ୍ତାରେ ୱାଇନ ପିଇ ନାଚ ଗୀତରେ ମଉଜ କରୁଥିଲେ । ଏହି ସମୟରେ ହଠାତ୍ ଗୁଳି ମାଡ଼ ହୋଇଥିଲା । ରାଷ୍ଟ୍ରପତି କ୍ଲାଉଡିଆ ଶେନବମ ଘଟଣାର ନିନ୍ଦା କରିଛନ୍ତି । ସେ କହିଛନ୍ତି ଯେ ଏହାର ତଦନ୍ତ ଚାଲିଛି। ଯାହା ଘଟିଛି ତାହା ଅତ୍ୟନ୍ତ ଦୁର୍ଭାଗ୍ୟଜନକ। ତେବେ ସୋସିଆଲ ମିଡିଆରେ ଭାଇରାଲ୍ ହେଉଥିବା ଭିଡିଓ ଦେଖିବାକୁ ମିଳିଛି, ଗୁଳିକାଣ୍ଡ ପୂର୍ବରୁ ଏକ ବ୍ୟାଣ୍ଡ ବାଜାର ତାଳେ ତାଳେ ଲୋକମାନେ ନାଚୁଥିଲେ ।
ମେକ୍ସିକୋ ସିଟିର ଉତ୍ତର-ପଶ୍ଚିମରେ ଅବସ୍ଥିତ ଗନାଜୁଆଟୋର,ବହୁ ବର୍ଷ ଧରି ମେକ୍ସିକୋର ସବୁଠାରୁ ହିଂସାତ୍ମକ ରାଜ୍ୟ ମଧ୍ୟରୁ ଗୋଟିଏ । ସେଠାରେ ଅପରାଧିକ ତତ୍ତ୍ୱମାନେ ନିଶା କାରବାର ଏବଂ ଅନ୍ୟାନ୍ୟ ଅବୈଧ ଉଦ୍ୟୋଗ ପାଇଁ ଲଢ଼େଇ ଜାରି ରଖିଛନ୍ତି। ରାଜ୍ୟରେ ଚଳିତ ବର୍ଷର ପ୍ରଥମ ପାଞ୍ଚ ମାସରେ ୧,୪୩୫ ହତ୍ୟାକାଣ୍ଡ ରେକର୍ଡ କରାଯାଇଛି । ଯାହା ଅନ୍ୟ ଯେକୌଣସି ରାଜ୍ୟର ପରିସଂଖ୍ୟାନଠାରୁ ଦୁଇଗୁଣ ଅଧିକ। ସେହିପରି ଗତମାସରେ ସମାନ ଭାବେ ଗୁଳିକାଣ୍ଡରେ ୭ଜଣଙ୍କ ମୃତ୍ୟୁ ଘଟିଥିଲା । ବାରମ୍ବାର ଏଭଳି ଘଟଣା ସ୍ଥାନୀୟ ଅଞ୍ଚଳରେ ଘଟୁଥିବାବେଳେ ପ୍ରଶାସନ ପକ୍ଷରୁ କୌଣସି ଉଚିତ୍ ପଦକ୍ଷେପ ଗ୍ରହଣ କରାଯାଉ ନ ଥିବା କହିଛନ୍ତି ସ୍ଥାନୀୟ ଲୋକେ ।
