ଭୁବନେଶ୍ୱର, ୦୪/୦୨: ମଙ୍ଗଳବାରଠାରୁ ୪ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ଷୋଡ଼ଶ ଅର୍ଥ କମିଶନ । କମିଶନର ଅଧ୍ୟକ୍ଷ ଡ. ଅରବିନ୍ଦ ପାନାଗାରିଆ ଓ ତାଙ୍କର ୧୫ଜଣିଆ ଟିମ୍ ୭ ତାରିଖ ପର୍ଯ୍ୟନ୍ତ ଓଡ଼ିଶାରେ ରହିବେ । ଗସ୍ତ ସମୟରେ କମିଶନଙ୍କ ଆଗରେ ରାଜ୍ୟ ସରକାର ୧୨ ଲକ୍ଷ ୫୬ ହଜାର ୧୪୮ କୋଟି ଟଙ୍କାର ଦାବି ଉପସ୍ଥାପନ କରିବେ । ଏହି ଦାବିକୁ ରାଜ୍ୟ କ୍ୟାବିନେଟରେ ମଞ୍ଜୁରୀ ମିଳିସାରିଛି । ପ୍ରାକୃତିକ ବିପର୍ଯ୍ୟୟ ଲାଗି ସ୍ୱତନ୍ତ୍ର ପ୍ୟାକେଜ ଦାବି କରାଯିବା ନେଇ ରାଜ୍ୟ ସରକାର ପ୍ରସ୍ତୁତ ହୋଇଛନ୍ତି ।
ମଙ୍ଗଳବାର ଅପରାହ୍ନରେ କମିଶନ ଓ ତାଙ୍କ ଟିମ୍ ଭୁବନେଶ୍ୱରରେ ପହଞ୍ଚିବେ । ବୁଧବାର ପୁରୀ ଓ କୋଣାର୍କ ଯିବେ । ୬ ତାରିଖରେ ରାଜ୍ୟ ସରକାର ଓ ରାଜ୍ୟ ଅର୍ଥ କମିଶନଙ୍କ ସହ ଆଲୋଚନା ହେବ । ରାଜ୍ୟ ଅର୍ଥ କମିଶନଙ୍କ ସହ ଆଲୋଚନା ପରେ ବିଭିନ୍ନ ପଞ୍ଚାୟତ ଓ ପୌର ସଂସ୍ଥାର କର୍ମଚାରୀ ସଂଘକୁ ଭେଟିବେ । ବିଭିନ୍ନ ବର୍ଗର ତୃଣମୂଳ ସ୍ତରର ପ୍ରତିନିଧି ଓ ବୁଦ୍ଧିଜୀବୀଙ୍କୁ ମଧ୍ୟ କମିଶନ ସଦସ୍ୟ ଭେଟିବେ। ରାଜ୍ୟ ଅର୍ଥ କମିଶନର ଅଧ୍ୟକ୍ଷ ଅଛନ୍ତି ପୂର୍ବତନ ଆଇଏଏସ୍ ଅଧିକାରୀ ଅରୁଣ ପଣ୍ଡା । ଶ୍ରୀ ପଣ୍ଡାଙ୍କ ଅଧ୍ୟକ୍ଷତାରେ ଏକ କମିଟି ଗଢ଼ାଯାଇଛି । ଏହି କମିଟି ମଧ୍ୟ ଆଲୋଚନା କରିବେ । ପୂର୍ବରୁ ପ୍ରାକୃତିକ ବିପର୍ଯ୍ୟୟପ୍ରବଣ ଓଡ଼ିଶାକୁ ସ୍ୱତନ୍ତ୍ର ଅନୁଦାନ ପାଇଁ ଦାବି ହୋଇ ଆସୁଥିଲା । ମାତ୍ର କେନ୍ଦ୍ର ସରକାର ଦାବିକୁ ଅଣଦେଖା କରିଆସୁଥିଲେ ।
ଚଳିତ ଥର ଷୋଡ଼ଶ ଅର୍ଥ କମିସନରୁ ରାଜ୍ୟ ସରକାର ଅଧିକ ଆଶା ରଖିଛନ୍ତି । ପ୍ରଥମ ଥର ପାଇଁ ରାଜ୍ୟରେ ଡବଲ ଇଞ୍ଜିନ ସରକାର ଗଠନ ହୋଇଛି । ଏପରିସ୍ଥଳେ ରାଜ୍ୟର ସ୍ୱାର୍ଥକୁ ଅଧିକ ଗୁରୁତ୍ୱ ମିଳିବ ବୋଲି ଆଶା ରହିଛି । ଗ୍ରାମାଞ୍ଚଳର ବିକାଶ ପାଇଁ ସମସ୍ତ ଅଞ୍ଚଳରେ ନେଟୱାର୍କ ସଂଯୋଗ ପରି କେତେକ ଗୁରୁତ୍ୱପୂର୍ଣ୍ଣ ଦାବି ରଖିପାରନ୍ତି ସରକାର ।
ଉଲ୍ଲେଖଯୋଗ୍ୟ, ଅର୍ଥ କମିଶନ କେନ୍ଦ୍ର-ରାଜ୍ୟ ମଧ୍ୟରେ ଭାଗବଣ୍ଟା ଅନୁପାତ ସ୍ଥିର କରିଥାନ୍ତି । ରାଜ୍ୟକୁ କେତେ ଗ୍ରାଣ୍ଟ ଇନ୍ ଏଡ୍ ମିଳିବ ନିଷ୍ପତ୍ତି ନେଇଥାନ୍ତି । ପ୍ରାକୃତିକ ବିପର୍ଯ୍ୟୟ ପାଇଁ ସ୍ୱତନ୍ତ୍ର ପାଣ୍ଠି ରାଜ୍ୟକୁ ଆବଶ୍ୟକ ପଡ଼ିଲେ ସ୍ୱତନ୍ତ୍ର ଅନୁଦାନ ଦେବା ନେଇ ସୁପାରିସ କହିଥାନ୍ତି ।
