ସୋନପୁର,୨୨/୦୫: ଡକାୟତି ଯୋଜନା ଏବଂ ଗଂଜେଇ କରବାର ଅଭିଯୋଗରେ ସୋନପୁର ପୁଲିସ ୨ ଜଣ ଅନ୍ତଃରାଜ୍ୟ ଡ଼କାୟତ ସମେତ ୩ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ପଶ୍ଚିମବଙ୍ଗର ମହମ୍ମଦ ଜୁଲଫିକର ମଣ୍ଡଳ ଓ ଉତ୍ତରପ୍ରଦେଶର ସତୀଶ ଗୌଡ଼ ଏବଂ ଅନ୍ୟ ଜଣେ ଅଭିଯୁକ୍ତ ହେଲେ ସୁବର୍ଣ୍ଣପୁର ଜିଲ୍ଲା ସୋନପୁର ଥାନା ଆନ୍ତର୍ଗତ କୀର୍ତିପୁର ଗାଁର ଲିପୁନ ମହାକୁର। ଏନେଇ ଆଜି ସୋନପୁର ଥାନା ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସୁବର୍ଣ୍ଣପୁର ଏସପି ନାରାୟଣ ନାଏକ ।
ଏସପି ଶ୍ରୀଯୁକ୍ତ ନାଏକଙ୍କ ସୂଚନା ଅନୁଯାୟୀ, ଗତକାଲି ରାତି ପ୍ରାୟ ୧୧ ଟା ୫୦ ସମୟରେ ସ୍ଥାନୀୟ ତେଲ ନଦୀ ପାଖ ଲେପ୍ରସି କଲୋନୀ ନିକଟରେ ୮ରୁ ୧୦ ଜଣ ଅସମାଜିକ ବ୍ୟକ୍ତି ଏକାଠି ହୋଇ ଡ଼କାୟତି ଯୋଜନା କରୁଥିଲେ। ଏନେଇ ଖବର ପାଇ ସୋନପୁର ପୁଲିସ ସେଠାକୁ ଚଢ଼ାଓ କରିଥିଲା।ଚଢ଼ାଉ ପରେ ସେଠାରୁ ୨ଜଣଙ୍କୁ ପୁଲିସ କାବୁ କରିଥିବା ବେଳେ ଅନ୍ୟମାନେ ଫେରାର ହୋଇଯାଇଥିଲେ। ମହମ୍ମଦ ଜୁଲଫିକର ମଣ୍ଡଳ ଓ ସତୀଶ ଗୌଡ଼ଙ୍କୁ ଗିରଫ କରାଯିବା ସହ ସେଠାରୁ ଗୋଟିଏ ମେଗାଜିନ, ଗୋଟିଏ ଗୁଳି, ଟର୍ଚ୍ଚ ଲାଇଟ, ଲୁହା ରଡ଼, ଇଟା ଗୁଣ୍ଡ ଆଦି ଜବତ କରାଯାଇଛି। ଏନେଇ ସୋନପୁର ଥାନାରେ ଏକ ମାମଲା ରୁଜୁ କରାଯାଇଛି। ତେବେ ଏହି ମାମଲାର ତଦନ୍ତ ସମୟରେ ଅନ୍ୟ ଅଭିଯୁକ୍ତମାନଙ୍କୁ କାବୁ କରିବା ପାଇଁ ବିଭିନ୍ନ ଜାଗାରେ ରେଡ କରାଯଇଥିଲା।ଏହି କ୍ରମରେ ଜିଲ୍ଲାପାଳଙ୍କ କାର୍ଯ୍ୟଳୟ ପଛପଟ ସାହିର ଗୋଟିଏ ଘରେ ରେଡ କରାଯାଇ ଲିପିନ ମହାକୁରକୁ ଗିରଫ କରାଯାଇଥିଲା ଏବଂ ତାର ନିକଟରୁ ୪କେଜି ଗଞ୍ଜେଇ, ଗୋଟିଏ ପିସ୍ତଲ ଓ ଜୀବନ୍ତ ଗୁଳି ଜବତ ହୋଇଥିଲା। ଏନେଇ ମଧ୍ୟ ଏକ ପୃଥକ ମାମଲା ଲିପୁନ ବିରୁଦ୍ଧରେ ରୁଜୁ କରଯାଇଥିବା ଏସପି ସୂଚନା ଦେଇଛନ୍ତି। ତେବେ ଏହି ଦୁଇଟି ମାମଲାରେ ଅନ୍ୟ ଅଭିଯୁକ୍ତମାନେ ମଧ୍ୟ ସମ୍ପୃକ୍ତ ରହିଥିବା ଜଣାପଡ଼ିଛି।.ଏନେଇ ତଦନ୍ତ ଚାଲିଥିବା ବେଳେ ଖୁବଶୀଘ୍ର ଅନ୍ୟ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଏସପି ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ଅତିରିକ୍ତ ଏସପି କେ ହରିପ୍ରସାଦ, ଏସ୍ଡ଼ିପିଓ ପ୍ରତାପ କୁମାର ତ୍ରିପାଠୀ, ଆଇଆଇସି ତାପସ କୁମାର ଭୋଇ ପ୍ରମୁଖ ଉପସ୍ଥିତ ଥିଲେ।
