ଢେଙ୍କାନାଳ,୩୦/୭: ଅନାସ୍ଥା ଭୋଟ୍ରେ ହାରି ପଦ ହରାଇଲେ ଢେଙ୍କାନାଳ ସଦର ବ୍ଳକର ୨ ସରପଞ୍ଚ । ନାଗିଆପଶି ସରପଞ୍ଚ କୃଷ୍ଣଚନ୍ଦ୍ର ବେହେରା ଓ ମାଣିପୁର ସରପଞ୍ଚ ରୁଦ୍ରନାରାୟଣ ପଟ୍ଟନାୟକଙ୍କୁ ପଦ ହରାଇବାକୁ ପଡିଛି । ୩ ମାସ ପୂର୍ବରୁ ଭୋଟ୍ ଗ୍ରହଣ ହୋଇଥିବା ବେଳେ ବୁଧବାର ସଦର ତହସିଲ କାର୍ଯ୍ୟାଳୟଠାରେ ଗଣତି ହୋଇ ଫଳାଫଳ ପ୍ରକାଶ ପାଇଛି। ଦୁଇ ସରପଞ୍ଚ କେବଳ ନିଜକୁ ନିଜେ ଭୋଟ୍ ଦେଇଥିବା ବେଳେ ଅନ୍ୟସମସ୍ତ ଭୋଟ ଅନାସ୍ଥା ସପକ୍ଷରେ ଯାଇଛି।
ଏପ୍ରିଲ ୯ ତାରିଖରେ ନାଗିଆପଶି ଓ ମେ ୧୫ ତାରିଖରେ ମଣିପୁର ସରପଞ୍ଚଙ୍କ ବିରୋଧରେ ଆସିଥିବା ଅନାସ୍ଥା ଉପରେ ଭୋଟ୍ ଗ୍ରହଣ ହୋଇଥିଲା । ଉଭୟ ପଞ୍ଚାୟତରେ ୮ ଜଣ ୱାର୍ଡ ମେମ୍ବର ଓ ସରପଞ୍ଚଙ୍କୁ ମିଶାଇ ୯ ଜଣ ଭୋଟ୍ ଦେଇଥିଲେ । କୋର୍ଟରେ ମାମଲା ଯୋଗୁଁ ଭୋଟ୍ ଗଣତି ହୋଇନଥିଲା । ଜିଲ୍ଲା ଟ୍ରେଜେରୀରେ ଭୋଟ୍ ବାକ୍ସ ରହିଥିଲା । ବୁଧବାର କଡାସୁରକ୍ଷା ମଧ୍ୟରେ ତହସିଲ କାର୍ଯ୍ୟାଳୟରେ ଉଭୟ ପକ୍ଷର ଉପସ୍ଥିତିରେ ଗଣତି ହୋଇଥିଲା । ତହସିଲଦାର ସ୍ଵାଧୀନ ବେହେରା ଫଳାଫଳ ଘୋଷଣା କରିଥିଲେ। ଉଭୟ ପଞ୍ଚାୟତରେ ୯ ଭୋଟ୍ରୁ ୮ ଭୋଟ୍ ଅନାସ୍ଥା ସପକ୍ଷରେ ଓ ଗୋଟିଏ ଭୋଟ୍ ଅନାସ୍ଥା ବିପକ୍ଷରେ ପଡିଥିଲା ।
