ନୂଆଦିଲ୍ଲୀ,୧୯/୦୨ : ବାଂଲାଦେଶରେ ଦୀର୍ଘଦିନର ଛାତ୍ର ଆନ୍ଦୋଳନ ପରେ ଶେଖ ହସିନା ସରକାରର ପତନ ଘଟିଥିଲା । ହସିନାଙ୍କୁ ଶେଷରେ ଦେଶ ଛାଡ଼ିବାକୁ ପଡ଼ିଥିଲା । ଏହାପରେ ସେଠାକାର ସ୍ଥିତି ବିଗିଡ଼ି ଯାଇଛି । ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡ଼ିଛି । ମୁସ୍ଲିମବହୁଳ ଦେଶ ବାଂଲାଦେଶରେ ହିନ୍ଦୁବିରୋଧୀ ହିଂସା ବୃଦ୍ଧି ପାଇବାରେ ଲାଗିଛି । ବାଂଲାଦେଶ ହିନ୍ଦୁ ବୁଦ୍ଧିଷ୍ଟ ଖ୍ରୀଷ୍ଟିୟାନ ୟୁନିଟ କାଉନସିଲ୍ର ରିପୋର୍ଟ ମୁତାବକ, ଦେଶରେ ସାମ୍ପ୍ରଦାୟିକ ହିଂସା ଯୋଗୁ ୫ ମାସରେ ୩୨ ହିନ୍ଦୁଙ୍କୁ ହତ୍ୟା କରାଗଲାଣି । ମହିଳାଙ୍କୁ ବଳାତ୍କାର ଓ ଯୌନ ଉତ୍ପୀଡ଼ନ ନେଇ ୧୩ଟି ମାମଲା ସାମ୍ନାକୁ ଆସିଲାଣି । ପ୍ରାୟ ୧୩୩ ମନ୍ଦିର ଉପରେ ଆକ୍ରମଣ ହୋଇଛି । ୨୦୨୪ ଅଗଷ୍ଟ ୪ରୁ ଡିସେମ୍ବର ୩୧ ଅର୍ଥାତ ୫ ମାସ ମଧ୍ୟରେ ଏହିସବୁ ଘଟଣା ଘଟିଛି ।
କାଉନସିଲ୍ ମୁତାବକ, ହସିନା କ୍ଷମତାଚ୍ୟୁତ ହେବାର ମାତ୍ର ୧୫ ଦିନ ମଧ୍ୟରେ ସଂଖ୍ୟାଲଘୁଙ୍କ ବିରୋଧରେ ୨୦୧୦ଟି ହିଂସା ଘଟଣା ଘଟିଥିଲା । ୨୦୨୫ ଫେବ୍ରୁଆରୀ ୧୧ରେ ବାଂଲାଦେଶ ସରକାର ତନ୍ମଧ୍ୟରୁ ୧୭୬୯ ମାମଲା ନେଇ ସ୍ପଷ୍ଟ କରିଥିଲେ । ଏଥିରୁ ୧୪୧୫ ମାମଲାରେ ତଦନ୍ତ ଶେଷ ହୋଇଛି । ୩୫୪ ମାମଲାର ଆଉଥରେ ସମୀକ୍ଷା କରାଯାଉଛି । କାର୍ଯ୍ୟାନୁଷ୍ଠାନ ସ୍ୱରୂପ ବାଂଲାଦେଶର ୟୁନୁସ ସରକାର ଏହିସବୁ ମାମଲାରେ ଡିସେମ୍ବର ୧୦ ସୁଦ୍ଧା ୭୦ ଲୋକଙ୍କୁ ଗିରଫ କରିଛି । ମୋଟ ୮୮ଟି ମାମଲା ଦାୟର କରାଯାଇଛି ।
କାଉନସିଲର ରିପୋର୍ଟରୁ ଆହୁରି ଜଣାପଡ଼ିଛି ଯେ ହସିନା ସରକାର ପତନର ମାତ୍ର ୧୫ ଦିନରେ ୯ଟି ହତ୍ୟା ଘଟଣା ଘଟିଥିଲା । ୪ଟି ବଳାତ୍କାର ଓ ୯୫୩ ଘର ଉପରେ ଆକ୍ରମଣ ଘଟଣା ସାମ୍ନାକୁ ଆସିଥିଲା । ପୂଜାସ୍ଥଳ ଉପରେ ଆକ୍ରମଣ ଘଟଣା ସଂଖ୍ୟା ୬୯ ଛୁଇଁଥିଲା । ଏହି ୧୫ ଦିନ ଭିତରେ ପ୍ରାୟ ୫୦ ହଜାର ଲୋକ ପ୍ରଭାବିତ ହୋଇଥିଲେ । ଭୟରେ ସେମାନେ ଘରୁ ବାହାରିବାକୁ ସାହସ କରି ନ ଥିଲେ । ଖୁଲନା ଡିଭିଜନ ସର୍ବାଧିକ ପ୍ରଭାବିତ ହୋଇଥିଲା ।
ଏହି ଖବରଟିକୁ ପଢନ୍ତୁ-ବାଂଲାଦେଶରେ ଛାତ୍ର ଆନ୍ଦୋଳନ ସମୟରେ ହୋଇଥିଲା ଅତ୍ୟାଚାର, ୪୧ ଜଣ ପୂର୍ବତନ ପୋଲିସ ଅଧିକାରୀ ଗିରଫ...
