ନୂଆଦିଲ୍ଲୀ: ରମାନନ୍ଦ ସାଗରଙ୍କ ଚର୍ଚ୍ଚିତ ଧାରାବାହିକ ରାମାୟଣ ପରି, ବି.ଆର. ଚୋପ୍ରାଙ୍କ ମହାଭାରତ ୧୯୮୦ ଦଶକରେ ଏକ ଆଶାତିତ ସଫଳତା ସୃଷ୍ଟି କରିଥିଲା। ପ୍ରକୃତରେ, ଏହି ଧାରାବାହିକର ପ୍ରତ୍ୟେକ ଅଭିନେତା ମଧ୍ୟ ସେମାନଙ୍କ ଅଭିନୀତ ଚରିତ୍ର ଗୁଡ଼ିକ ମାଧ୍ୟମରେ ସବୁଦିନ ପାଇଁ ଅମର ହୋଇଗଲେ । ତଥାପି, ଏହି କଳାକାର ମାନଙ୍କ ମଧ୍ୟରୁ କିଛି ଅଭିନେତା ଅଭିନୟରୁ ଅବସର ନେଇସାରିଛନ୍ତି ଏବଂ ଅନ୍ୟ କିଛି କଳାକାରଙ୍କର ଦେହାନ୍ତ ମଧ୍ୟ ହୋଇସାରିଲାଣି । ଅନେକ ଅଭିନେତା ଏବଂ ଅଭିନେତ୍ରୀ ଏବେ ବିଦେଶରେ ମଧ୍ୟ ରହୁଛନ୍ତି। ତଥାପି, ଏଠାରେ ଆମେ ଆପଣଙ୍କୁ ଜଣେ ଅଭିନେତ୍ରୀଙ୍କ ବିଷୟରେ କହୁଛୁ ଯିଏକି ବି.ଆର. ଚୋପ୍ରାଙ୍କ ମହାଭାରତରେ ଗାନ୍ଧାରୀ ଅର୍ଥାତ୍ ଦୁର୍ଯ୍ୟୋଧନଙ୍କ ମାତାଙ୍କ ଭୂମିକାରେ ଅଭିନୟ କରିଥିଲେ। ସେ ଥିଲେ ରେଣୁକା ଇସରାନୀ । ଯଦିଓ ସେ ଅନ୍ୟ ଅନେକ ଟିଭି ଶୋ’ରେ ଅଭିନୟ କରିଥିଲେ, ତଥାପି ଗାନ୍ଧାରୀଙ୍କ ଚରିତ୍ରରେ ତାଙ୍କ ଅଭିନୟ ପାଇଁ ସେ ଅପାର ପ୍ରସିଦ୍ଧି ଅର୍ଜନ କରିଥିଲେ। ଦୁଃଖର ବିଷୟ, ରେଣୁକା ଇସରାନୀଙ୍କୁ ଶେଷରେ ଅଭିନୟ ଛାଡ଼ିବାକୁ ପଡ଼ିଥିଲା । ସେ ୧୫ ବର୍ଷ ଧରି ଶୋ’ବିଜ୍ ଏବଂ ଅଭିନୟ ଜଗତରୁ ଦୂରରେ ଅଛନ୍ତି। ଏହା ବ୍ୟତୀତ, ରେଣୁକା ଇସରାନୀ ଏବେ ୫୯ ବର୍ଷ ବୟସରେ ମଧ୍ୟ ଅବିବାହିତ ଅଛନ୍ତି ଏବଂ ଏକା ରହୁଛନ୍ତି। ଏହି ଅଭିନେତ୍ରୀ ଥରେ ଏକ ସାକ୍ଷାତକାରରେ ଅବିବାହିତ ରହିବା ପଛର କାରଣ ପ୍ରକାଶ କରିଥିଲେ।
ଡାକ୍ତର ହେବାର ସ୍ୱପ୍ନ, ଦେଶର ପ୍ରଥମ ଟିଭି ଧାରାବାହିକ, ଏବଂ ସୁଯୋଗ…
ରେଣୁକା ଇସରାନି ରାଜସ୍ଥାନର ଜୟପୁରରେ ବଢ଼ିଥିଲେ । ଯଦିଓ ତାଙ୍କର ସ୍ୱପ୍ନ ଡାକ୍ତର ହେବା ଥିଲା, ତଥାପି ଭାଗ୍ୟ ତାଙ୍କୁ ଅଭିନୟ ଜଗତକୁ ନେଇଗଲା। ରେଣୁକା ଜୟପୁରର ମହାରାଣୀ କଲେଜରେ ତାଙ୍କର ପାଠପଢ଼ା ଜାରି ରଖିଥିଲେ, ଏବଂ ସେଠାରେ ସେ ଜଣେ ଅଲରାଉଣ୍ଡର ସ୍ୱର୍ଣ୍ଣ ପଦକ ବିଜେତା ମଧ୍ୟ ଥିଲେ। ସ୍ନାତକ ଶେଷ କରିବା ପରେ, ରେଣୁକା ଇସରାନି ଦିଲ୍ଲୀ ଚାଲିଗଲେ ଏବଂ ନ୍ୟାସନାଲ ସ୍କୁଲ ଅଫ୍ ଡ୍ରାମାରେ ନାଁ ଲେଖାଇଲେ । ଏହି ସମୟ ମଧ୍ୟରେ, ସେ ଦୂରଦର୍ଶନର ପ୍ରଥମ ଟେଲିଭିଜନ ଧାରାବାହିକ 'ହମ୍ ଲୋଗ୍'ରେ ଏକ ଭୂମିକାରେ ଅଭିନୟ କରିଥିଲେ।
ଏହିସବୁ ଟିଭି ସିରିଏଲରେ କାମ; 'ଗାନ୍ଧାରୀ' ଚରିତ୍ର କରିବା ପରେ ଚମକିଲା କ୍ୟାରିଅର…
ପରବର୍ତ୍ତୀ ସମୟରେ, ରେଣୁକା ଇସରାନି ଅନ୍ୟାନ୍ୟ ଟିଭି ସିରିଏଲରେ କାମ କରିଥିଲେ। ସେଗୁଡ଼ିକ ମଧ୍ୟରୁ 'କଭି ତୋ ମିଲୋଗେ', 'କେସରିଆ ବାଲମ୍ ଆବୋ ହମାରେ ଦେଶ୍', 'ଦେବୀ', 'ଘରାନା', ଏବଂ 'ବଡେ ଅଚ୍ଛେ ଲଗତେ ହୈଁ', ଧାରାବାହିକ ଅନ୍ୟତମ। ୧୯୮୮ ରେ, ବି.ଆର. ଚୋପ୍ରା ତାଙ୍କୁ 'ମହାଭାରତ' ରେ ଗାନ୍ଧାରୀ ଭୂମିକାରେ ଅଭିନୟ କରିବାକୁ ସୁଯୋଗ ଦେଇଥିଲେ, ଯାହା ତାଙ୍କ କ୍ୟାରିୟରର ବାଟକୁ ସଂପୂର୍ଣ୍ଣ ବଦଳାଇ ଦେଇଥିଲା।
୨୨ ବର୍ଷ ବୟସରେ ୧୦୦ ପୁଅଙ୍କ ମାଆର ଭୂମିକା, ଚ୍ୟାଲେଞ୍ଜପୂର୍ଣ୍ଣ ଥିଲା ଗାନ୍ଧାରୀ ଚରିତ୍ର…
ଗାନ୍ଧାରୀଙ୍କ ଚରିତ୍ରକୁ ଚିତ୍ରଣ କରିବା ରେଣୁକା ଇସରାନୀଙ୍କ ପାଇଁ ଏକ ଅତ୍ୟନ୍ତ ଚ୍ୟାଲେଞ୍ଜପୂର୍ଣ୍ଣ କାମରେ ପ୍ରମାଣିତ ହୋଇଥିଲା। ପ୍ରଥମତଃ, ସେ ସେତେବେଳେ ମାତ୍ର ୨୨ ବର୍ଷ ବୟସର ଥିଲେ ଏବଂ ତାଙ୍କୁ ଶହେ ପୁଅର ମାଆ' ଭୂମିକାରେ ଅଭିନୟ କରିବାକୁ ପଡ଼ିଥିଲା। ଏହା ବ୍ୟତୀତ, ତାଙ୍କୁ ସବୁବେଳେ ଆଖିରେ ପଟି ବାନ୍ଧି ରଖିବାକୁ ପଡ଼ୁଥିଲା, କାରଣ ଗାନ୍ଧାରୀ, ତାଙ୍କ ସ୍ୱାମୀ ଧୃତରାଷ୍ଟ୍ରଙ୍କ ପ୍ରତି ଅଟଳ ପ୍ରେମ ହେତୁ ଜୀବନସାରା ନିଜ ଆଖିରେ ପଟି ବାନ୍ଧିବାକୁ ବାଛିଥିଲେ । ଧୃତରାଷ୍ଟ୍ର ଜନ୍ମରୁ ଦୃଷ୍ଟିହୀନ ଥିଲେ, ସେ ଦେଖିପାରୁ ନଥିଲେ। ଏହି ପଟି ଯୋଗୁଁ ରେଣୁକା ଇସରାନୀ ଗାନ୍ଧାରୀଙ୍କ ଭୂମିକାରେ ଅଭିନୟ କରିବା ସମୟରେ ବହୁତ ଅସୁବିଧାର ସମ୍ମୁଖୀନ ହୋଇଥିଲେ। ତଥାପି, ସେ ଏହି ଅଭିନୟକୁ ସହଜରେ କରିଥିଲେ, କାରଣ 'ଅନ୍ଧାୟୁଗ୍' ନାମକ ଏକ ମଣିପୁରୀ ନାଟକରେ ସେ ପୂର୍ବରୁ ଗାନ୍ଧାରୀଙ୍କ ଚରିତ୍ରରେ ଅଭିନୟ କରିଥିଲେ।
୨୦୧୧ ରେ ଛାଡ଼ିଥିଲେ ଅଭିନୟ, ବାପା ମାଆଙ୍କ ପାଇଁ କ୍ୟାରିଅରକୁ ବଳିଦାନ ଦେଇଥିଲେ…
ରେଣୁକା ଇସରାନି ମଧ୍ୟ ଅନେକ ଚଳଚ୍ଚିତ୍ରରେ ଅଭିନୟ କରିଥିଲେ। ତାଙ୍କ କ୍ୟାରିଅର ଭଲ ଗତିରେ ଆଗକୁ ବଢ଼ୁଥିଲା, କିନ୍ତୁ ୨୦୧୧ ମସିହାରେ ସେ ଅଭିନୟ ଏବଂ ଶୋବିଜ୍ ଜଗତରୁ ଦୂରେଇ ଯାଇଥିଲେ । ୨୦୧୭ ମସିହାରେ 'ଦୈନିକ ଭାସ୍କର' ସହିତ ଏକ ସାକ୍ଷାତକାରରେ ଏହି ନିଷ୍ପତ୍ତି ପଛରେ ଥିବା କାରଣ ବିଷୟରେ ଅଭିନେତ୍ରୀ ପ୍ରକାଶ କରିଥିଲେ। ରେଣୁକା କହିଥିଲେ ଯେ, ତାଙ୍କ ବାପାମା ବୃଦ୍ଧ ଥିଲେ ଏବଂ ତାଙ୍କର ନିରନ୍ତର ଯତ୍ନ ନେବାକୁ ପଡ଼ୁଥିଲା। ସେ ଉଲ୍ଲେଖ କରିଥିଲେ ଯେ ତାଙ୍କ ବାପା କଥା କହିବାର ଶକ୍ତି ହରାଇ ବସିଥିଲେ, ତେଣୁ ସେ କେବଳ ସାଙ୍କେତିକ ଭାଷା ମାଧ୍ୟମରେ କଥା ବୁଝୁଥିଲେ। ତେଣୁ, ସେ ସେମାନଙ୍କ ପାଇଁ ଅଭିନୟରୁ ଓହରି ଯାଇଥିଲେ । କିନ୍ତୁ, କିଛି ବର୍ଷ ପରେ, ତାଙ୍କ ବାପା ମାଆଙ୍କ ଦେହାନ୍ତ ହୋଇଥିଲା, ଯାହା ଫଳରେ ଅଭିନେତ୍ରୀ ଏବେ ଏକାକୀ ଜୀବନ ଅତିବାହିତ କରୁଛନ୍ତି।
ଆଜି ପର୍ଯ୍ୟନ୍ତ ଅବିବାହିତ, କେମିତି ଚଳୁଛନ୍ତି ଇସରାନି…
ରେଣୁକା ଇସରାନି କେବେ ବି ବିବାହ କରିନାହାଁନ୍ତି ଏବଂ ଏହାର ଏକ ଗୁରୁତ୍ୱପୂର୍ଣ୍ଣ କାରଣ ଥିଲେ ତାଙ୍କ ପିତାମାତା। ବାପା ମାଆ ଯେପରି ଏକା ନରୁହନ୍ତି, ସେଥିପାଇଁ ରେନୁକା ଅବିବାହିତ ରହିଥିଲେ ଏବଂ ବର୍ତ୍ତମାନ ୫୯ ବର୍ଷ ବୟସରେ ମଧ୍ୟ ସେ ଅବିବାହିତ ଅଛନ୍ତି। ସେ ବର୍ତ୍ତମାନ ବୌଦ୍ଧ ଧର୍ମର ଜଣେ ଅନୁଗାମୀ ଏବଂ ମୁମ୍ବାଇର ଲୋଖଣ୍ଡୱାଲାରେ ଲୋକଙ୍କୁ ବୌଦ୍ଧ ଧର୍ମ ବିଷୟରେ ଅବଗତ କରାଉଛନ୍ତି। ସେ କବିତା ଲେଖନ୍ତି ଏବଂ ଜଣେ ଲେଖକ ମଧ୍ୟ ଅଟନ୍ତି ।
ଏହା ସହ ପଢନ୍ତୁ : mamata banerjee party : ଭାଙ୍ଗିଲା ମମତା ବାନାର୍ଜୀଙ୍କ ଦଳ ! ବିଧାୟକ ରୁତବ୍ରତ ବାନାର୍ଜୀଙ୍କ ସମେତ ୫୮ ଜଣ ବିଦ୍ରୋହୀ ନେତାଙ୍କ ଦାବିକୁ ବାଚସ୍ପତିଙ୍କ ମଞ୍ଜୁରୀ…
