ଆନନ୍ଦପୁର, ୦୮/୧୧: ବେଆଇନ ଗୋଚାଲାଣ ବେଳେ ମାଡ଼ି ବସିଲା ପୋଲିସ । ଏହି ଘଟଣାରେ ୨ଟି ଟ୍ରକ୍ ଓ ୨ଟି ପିକଅପ୍ ଗାଡ଼ିକୁ ଜବତ କରିବା ସହ ୧୧ ଜଣଙ୍କୁ ଅଟକ ରଖାଯାଇଛି । ସେମାନଙ୍କ ମଧ୍ୟରୁ କିଛି ଲୋକ ଭଦ୍ରକ ଜିଲ୍ଲାର ଓ ଅନ୍ୟ କେତେକ ଆନନ୍ଦପୁର ଥାନା ଫକୀରପୁର ଗାଁର ହୋଇଥିବା ସୂଚନା ମିଳିଛି । ଚାରିଟି ଗାଡ଼ିରୁ ମୋଟ ୧୧୫ ଗୋରୁଙ୍କୁ ଉଦ୍ଧାର କରାଯାଇଛି । କେନ୍ଦୁଝର ଜିଲ୍ଲା ଆନନ୍ଦପୁର ବ୍ଲକ୍‌ରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ଆନନ୍ଦପୁର ଦେଇ ଗୋଚାଲାଣ ହେଉଥିବା ନେଇ କୌଣସି ସୂତ୍ରରୁ ଖବର ପାଇଥିଲା ପୋଲିସ । ଖବର ପାଇ ଗୁରୁବାର ରାତିରେ ଜଗି ରହିଥିଲା । ୨ଟି ଟ୍ରକ୍‌ କଟକ କଣ୍ଟେନମେଣ୍ଟ ଥାନା ଅଞ୍ଚଳରୁ ଗୋରୁ ବୋଝେଇ କରି ମୟୁରଭଞ୍ଜ  ଅଞ୍ଚଳକୁ ଯାଉଥିବା ବେଳେ କୋଡପାଡା ନିକଟରେ ଜବତ କରିଥିଲା ପୋଲିସ । ଏହା ସହ ୨ ଟି ପିକଅପ୍‌ ଗାଡ଼ିକୁ ଆନନ୍ଦପୁର କଲେଜ ଛକ ନିକଟରୁ ପୋଲିସ ଜବତ କରିଥିଲା । ଏହି ଘଟଣାରେ ମୋଟ ୧୧ ଜଣ ଚାଲାଣକାରୀଙ୍କୁ ଅଟକ କରାଯାଇଛି । ୪ ଟି ଗାଡ଼ିରୁ ମୋଟ ୧୧୫ ଟି ଗୋରୁଙ୍କୁ ଉଦ୍ଧାର କରାଯାଇଛି । ସମସ୍ତ ଗୋରୁଙ୍କୁ ଉଦ୍ଧାର କରି ଗୋଶାଳାକୁ ପଠାଇବାକୁ ଉଦ୍ୟମ ଆରମ୍ଭ ହୋଇଛି ।