ଚତୁର୍ଥ ଦିନିକିଆ: ବାଉଲ୍ଟଙ୍କ ଘାତକ ବୋଲିଂ: ୮ ୱିକେଟ୍ରେ ଜିତିଲା ନ୍ୟୁଜିଲାଣ୍ଡ
ହାମିଲଟନ, ୩୧ା୧(ଏଜେନ୍ସି): ଚଳିତ ଦିନିକିଆ ସିରିଜ୍ରେ ଭାରତୀୟ ଦଳକୁ ପ୍ରଥମ ଥର ପାଇଁ ପରାଜୟର ସାମ୍ନା କରିବାକୁ ପଡ଼ିଛି । ପ୍ରଥମ ୩ଟି ଦିନିକିଆ ଜିତି ସିରିଜ ହାତେଇ ସାରିଥିବା ଭାରତ ଆଜି ଅନୁଷ୍ଠିତ ଚତୁର୍ଥ ମ୍ୟାଚ୍ରେ ଲଜ୍ଜା ଜନକ ବ୍ୟାଟିଂ ପ୍ରଦର୍ଶନ କରିଥିଲା । ନ୍ୟୁଜିଲାଣ୍ଡ ବୋଲରଙ୍କ ଘାତକ ସୁଇଂ ବୋଲିଂର ମୁକାବିଲା କରିନପାରି ଦଳ ୩୦.୫ ଓଭରରେ ମାତ୍ର ୯୨ ରନ୍ କରି ଅଲ୍ ଆଉଟ୍ ହୋଇ ଯାଇଥିଲା । ଜବାବରେ ନ୍ୟୁଜିଲାଣ୍ଡ ୧୪.୪ ଓଭରରେ ୨ ୱିକେଟ୍ ହରାଇ ବିଜୟ ହାସଲ କରିଥିଲା ।
ନ୍ୟୁଜିଲାଣ୍ଡ ମାଟିରେ ପ୍ରଥମ ଥର ପାଇଁ ୫-୦ରେ ଜିତିବାର ଅଭିଳାଷ ରଖିଥିବା ଭାରତୀୟ ଦଳର ସ୍ୱପ୍ନ ପରାଜୟ ସହ ଧୂଳିସାତ୍ ହୋଇଯାଇଥିଲା । ପିଚ୍ରେ ବଲ୍ ସୁଇଂ ହେଲେ ଟ୍ରେଣ୍ଟ ବାଉଲ୍ଟଙ୍କୁ ଖେଳିବା ସର୍ବଦା ଅସମ୍ଭବ ହୋଇଯାଏ । ପୂର୍ବରୁ ମଧ୍ୟ ବାଉଲ୍ଟଙ୍କ ଠାରୁ ଏଭଳି ପ୍ରଦର୍ଶନ ଦେଖିବାକୁ ମିଳି ସାରିଛି । ସେଡନ ପାର୍କରେ ପିଚ୍ର ଭରପୁର ଫାଇଦା ଉଠାଇବାରେ ଆଜି ବାଉଲ୍ଟ ସଫଳ ହୋଇଥିଲେ । ୨୧ରନ୍ ବିନିମୟରେ ୫ଟି ୱିକେଟ୍ ନେଇ ସେ ଭାରତୀୟ ବ୍ୟାଟିଂ ବିଭାଗର ମେରୁଦଣ୍ଡ ଭାଙ୍ଗି ଦେଇଥିଲେ ।
ଭାରତର ବ୍ୟାଟିଂ ବିଫଳତା ୨୦୧୭ରେ ଅନୁଷ୍ଠିତ ଶ୍ରୀଲଙ୍କା ବିପକ୍ଷ ଧର୍ମଶାଳା ଦିନିକିଆକୁ ମନେ ପକାଇ ଦେଇଥିଲା । ସେହି ମ୍ୟାଚ୍ରେ ସୁରଙ୍ଗା ଲାକମଲଙ୍କ ମୁକାବିଲା କରିନପାରି ଭାରତ ୧୧୨ ରନ୍ କରି ଅଲ୍ ଆଉଟ୍ ହୋଇ ଯାଇଥିଲା । ଆଜିର ମ୍ୟାଚ୍ରେ ଭାରତ ସମଦଶା ଭୋଗିଥିଲା ।
ସେଡନ ପାର୍କରେ ବଲ୍ ଆଶାଠୁ ଅଧିକ ସୁଇଂ କରିବା ନିଶ୍ଚିତ ଥିଲା । ଟସ୍ ଜିତିବା ମାତ୍ରେ ନ୍ୟୁଜିଲାଣ୍ଡ ଅଧିନାୟକ ଉତ୍ସାହିତ ହୋଇ ପଡ଼ିଥିଲେ । ସେ ଭାରତକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ । ବାଉଲ୍ଟ ସହଳ ଉଭୟ ଓପନର ରୋହିତ ଶର୍ମା(୧୩), ଶିଖର ଧାୱନ(୧୩)ଙ୍କୁ ପାଭିଲିୟନ ପଠାଇ ଦେଇଥିଲେ । ପଦାର୍ପଣ ମ୍ୟାଚ୍ ଖେଳୁଥିବା ଶୁଭମନ ଗିଲ୍ ଗୋଟିଏ ପଟେ ସତର୍କତାର ସହ ବ୍ୟାଟିଂ କରୁଥିବାବେଳେ ଅନ୍ୟ ପଟରେ ଭାରତ ଆଉ ୨ଟି ୱିକେଟ୍ ହରାଇଥିଲା । କଲିନ ଡି ଗ୍ରାଣ୍ଡହୋମ୍ଙ୍କ ବଲ୍ରେ ଉଭୟ ଅମ୍ବାତି ରାୟୁଡୁ ଓ ଦିନେଶ କାର୍ତ୍ତିକ ଖାତା ଖୋଲିବା ପୂର୍ବରୁ ଆଉଟ୍ ହୋଇଥିଲେ ।
ପରେ ପରେ ଭାରତ ଗିଲ୍(୯) ଓ କେଦାର ଯାଦବ(୧)ଙ୍କ ୱିକେଟ୍ ହରାଇଥିଲା । ଉଭୟଙ୍କୁ ବାଉଲ୍ଟ ଆଉଟ୍ କରିଥିଲେ । ଭୁବନେଶ୍ୱର କୁମାର(୧)ଙ୍କୁ ଗ୍ରାଣ୍ଡହୋମ୍ ପାଭିଲିୟନ ପଠାଇଥିଲେ । ୪୦ ରନ୍ରେ ଭାରତ ୭ଟି ୱିକେଟ୍ ହରାଇ ସାରିଥିଲା । ଦିନିକିଆ କ୍ରିକେଟ୍ରେ ଭାରତ ପୂର୍ବ ସର୍ବନିମ୍ନ ରେକର୍ଡ(୫୪, ଶ୍ରୀଲଙ୍କା ବିପକ୍ଷରେ) ଭଙ୍ଗ କରିବା ଆଶଙ୍କା ସୃଷ୍ଟି ହୋଇଥିଲା । ଅନ୍ତିମ ଭାଗରେ କୁଲଦୀପ ଯାଦବ(୧୫), ହାର୍ଦ୍ଦିକ ପାଣ୍ଡ୍ୟା(୧୬) ଓ ୟୁଝବେନ୍ଦ୍ର ଚହଲ(୧୮ଞ୍ଚ) କିଛି ରନ୍ ସଂଗ୍ରହ କରିବାରୁ ଭାରତର ସ୍କୋର ୯୨ରେ ପହଞ୍ଚିଥିଲା । ବାଉଲ୍ଟ ୫ଟି ଓ ଗ୍ରାଣ୍ଡହୋମ୍ ୩ଟି ୱିକେଟ୍ ନେଇଥିଲେ ।
୯୩ ରନ୍ର ବିଜୟ ଲକ୍ଷ୍ୟ ନେଇ ଘରୋଇ ଦଳ ବ୍ୟାଟିଂ ଆରମ୍ଭ କରିଥିଲା । ଓପନର ମାର୍ଟିନ ଗୁପତିଲ ପ୍ରଥମ ୩ଟି ବଲ୍ରେ ୧୪(୨ଚୌକା, ୧ଛକା) ରନ୍ ସଂଗ୍ରହ କରିଥିଲେ । ଚତୁର୍ଥ ବଲ୍ରେ ଭୁବନେଶ୍ୱର କୁମାର ତାଙ୍କୁ ଆଉଟ କରିଥିଲେ । ପରବର୍ତ୍ତୀ ବ୍ୟାଟ୍ସମ୍ୟାନ୍ କେନ ୱିଲାମସନ ୧୧ ରନ୍ କରି ଭୁବନେଶ୍ୱରଙ୍କ ଦ୍ୱିତୀୟ ଶୀକାର ସାଜିଥିଲେ । ଅନ୍ୟ ଓପନର ହେନରୀ ନିକୋଲାସ ଓ ରସ ଟେଲର ଅପରାଜିତ ରହି ଦଳକୁ ବିଜୟୀ କରାଇଥିଲେ । ନିକୋଲାସ ୩୦ ଓ ଟେଲର ୩୭ ରନ୍ କରିଥିଲେ । ୨୧୨ଟି ବଲ୍ ବାକି ଥାଇ ନ୍ୟୁଜିଲାଣ୍ଡ ବିଜୟ ହାସଲ କରିଥିଲା ।
