ମାଲକାନଗିରି,୨୯।୩(ଆପ୍ର ): ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡର ବିଜାପୁର ଜିଲ୍ଲାରେ ମାଓବାଦୀ ବିରୋଧୀ ଅଭିଯାନ ସମୟରେ ପୋଲିସ ୬ଜଣଙ୍କୁ ଗିରଫ କରିଛି। ଗିରଫ ହୋଇଥିବା ସମସ୍ତ ନକ୍ସଲ ହତ୍ୟା, ଅପହରଣ ଏବଂ ପୋଡ଼ାଜଳା ଘଟଣାରେ ସମ୍ପୃକ୍ତ ଥିଲେ।
ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଜିଲ୍ଲା ପୋଲିସ ଏବଂ ଛତିଶଗଡ଼ ସଶସ୍ତ୍ର ବାହିନୀର ମିଳିତ ଅଭିଯାନ ବେଳେ ଏଡାକାପାଲି ଅଞ୍ଚଳର ଜଣେ ଗ୍ରାମବାସୀଙ୍କ ଅପହରଣ ଏବଂ ହତ୍ୟା ଘଟଣାରେ ସମ୍ପୃକ୍ତ ତିନି ଜଣ ମାଓବାଦୀଙ୍କୁ ଗିରଫ କରାଯାଇଛି। ଗିରଫ ନକ୍ସଲମାନେ ହେଲେ ରମେଶ ମିଚା, ରାକେଶ ୱାଚମ, ବାଜୁ ୱାଚମ। ସେହିପରି ଭୈରମଗଡ଼ ପୋଲିସ ଏବଂ ଡିଆରଜି ଯବାନଙ୍କ ମିଳିତ ଦଳ ଚିହକା ଅଞ୍ଚଳରେ ନକ୍ସଲ ବିରୋଧୀ ଅଭିଯାନ ବେଳେ ଯାନବାହାନ ପୋଡ଼ି ଦେବା ଏବଂ ଲୋକଙ୍କୁ ଆକ୍ରମଣ କରିବା ଘଟଣାରେ ସମ୍ପୃକ୍ତ ତିନି ଜଣ ନକ୍ସଲଙ୍କୁ ଗିରଫ କରାଯାଇଥିଲା। ଗିରଫ ନକ୍ସଲମାନେ ହେଲେ ଲାଲୁ ଭୋଗାମି, ଈଶ୍ୱର କୁପାଲ, ରତିରାମ ଜୁରି। ଗିରଫ ନକ୍ସଲଙ୍କୁ ପଚରା ଉଚରା ପରେ କୋର୍ଟ ଚାଲାଣ କରାଯାଇଛି।
