ନୂଆଦିଲ୍ଲୀ, ୨୧।୨: କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ଖୁସି ଖବର । ଖୁବ୍ଶୀଘ୍ର କେନ୍ଦ୍ର ସରକାର ମହଙ୍ଗା ଭତ୍ତା (DA) ବୃଦ୍ଧି ନେଇ ଘୋଷଣା କରିପାରନ୍ତି । ଶ୍ରମ ବ୍ୟୁରୋ ପକ୍ଷରୁ ଜାରି ହୋଇଥିବା AICPI-IW ସୂଚକାଙ୍କ ଅନୁଯାୟୀ, ଜାନୁୟାରୀ ୨୦୨୬ରୁ କର୍ମଚାରୀଙ୍କ DA ରେ ୨% ବୃଦ୍ଧି ହେବା ପ୍ରାୟ ନିଶ୍ଚିତ ହୋଇଯାଇଛି । ଚଳିତ ବର୍ଷ ମାର୍ଚ୍ଚ ୪ ତାରିଖରେ ହୋଲି ପଡ଼ୁଥିବା ବେଳେ, କର୍ମଚାରୀଙ୍କୁ ଖୁସି କରିବା ପାଇଁ ସରକାର ହୋଲି ପୂର୍ବରୁ ଏହି ବର୍ଦ୍ଧିତ DA ଘୋଷଣା କରିବାର ସମ୍ଭାବନା ରହିଛି । ଯଦି ଏହି ୨% ବୃଦ୍ଧି ଘଟେ, ତେବେ ବର୍ତ୍ତମାନ ମିଳୁଥିବା ୫୮% ମହଙ୍ଗା ଭତ୍ତା ବଢ଼ି ୬୦%ରେ ପହଞ୍ଚିବ ।

କ’ଣ ରହିଛି କାଲ୍‌କୁଲେସନ୍ ?

ଡିସେମ୍ବର ୨୦୨୫ ସୁଦ୍ଧା AICPI-IW ର ହାରାହାରି ସୂଚକାଙ୍କ ୧୪୫.୫୪ ରହିଛି । ସରକାରୀ ଫର୍ମୁଲା ଅନୁଯାୟୀ DA ପରିମାଣ ପ୍ରାୟ ୬୦.୩୩% ହେଉଛି । ସରକାର ସାଧାରଣତଃ ଏହାକୁ ରାଉଣ୍ଡ ଫିଗରରେ ରଖୁଥିବାରୁ, ଏହା ୬୦% ହେବା ଏକପ୍ରକାର ସ୍ପଷ୍ଟ ।

ଏହା ବି ପଢ଼ନ୍ତୁ... ଆମେରିକା-ଇରାନ ଯୁଦ୍ଧ ଭୟରେ ୭ ଲକ୍ଷ କୋଟି ସ୍ୱାହା, ୧୨୦୦ ପଏଣ୍ଟରୁ ଅଧିକ ତଳକୁ ଖସି ସେନସେକ୍ସ ବନ୍ଦ

୮ମ ବେତନ କମିଶନକୁ ଅପେକ୍ଷା:

ସପ୍ତମ ବେତନ କମିଶନର ଅବଧି ଡିସେମ୍ବର ୨୦୨୫ରେ ଶେଷ ହୋଇଥିବା ବେଳେ, କର୍ମଚାରୀମାନେ ଏବେ ୮ମ ବେତନ କମିଶନ ଲାଗୁ ହେବାକୁ ଅପେକ୍ଷା କରିଛନ୍ତି । ଯଦିଓ ଏଥିପାଇଁ କିଛି ସମୟ ଲାଗିପାରେ, କିନ୍ତୁ DA ବୃଦ୍ଧି କର୍ମଚାରୀଙ୍କୁ ମହଙ୍ଗା ମାଡ଼ରୁ କିଛିଟା ଆଶ୍ୱସ୍ତି ଦେବ ।

ନିବେଶକ ଏବଂ ବଜାର ଉପରେ କିପରି ରହିବ ପ୍ରଭାବ ?

୮ମ ବେତନ କମିଶନ ଲାଗୁ ହେବା ପରେ ପ୍ରାୟ ୧.୧ କୋଟି ଲୋକଙ୍କ ଦରମା ଓ ପେନସନରେ ବଡ଼ ଧରଣର ବୃଦ୍ଧି ଘଟିବ । ଏହା କେବଳ ସରକାରୀ କର୍ମଚାରୀଙ୍କ ପାଇଁ ନୁହେଁ, ବରଂ ନିବେଶକ ଏବଂ ଭାରତୀୟ ପୁଞ୍ଜି ବଜାର ପାଇଁ ମଧ୍ୟ ବଡ଼ ସୁଯୋଗ ଆଣୁଛି ।

୧. ବଢ଼ିବ ବଜାରରେ ଚାହିଦା, ଚମକିବେ ଏହି ସବୁ ସେକ୍ଟର:

ଦରମା ବଢ଼ିବା ପରେ କର୍ମଚାରୀଙ୍କ ହାତକୁ ଅଧିକ ଟଙ୍କା ଆସିବ, ଯାହା ଫଳରେ ବଜାରରେ ଖର୍ଚ୍ଚ କରିବାର କ୍ଷମତା ବୃଦ୍ଧି ପାଇବ । କେଉଁ କେଉଁ କ୍ଷେତ୍ରଗୁଡ଼ିକ ଏଥିରୁ ସିଧାସଳଖ ଲାଭବାନ ହେବେ ଆସନ୍ତୁ ଜାଣିବା ।

ଅଟୋମୋବାଇଲ୍: କର୍ମଚାରୀମାନେ ନୂଆ ଗାଡ଼ି କିମ୍ବା ବାଇକ୍ କିଣିବାକୁ ଆଗ୍ରହ ଦେଖାଇବେ ।

ରିଏଲ୍ ଇଷ୍ଟେଟ୍ ଓ ହାଉସିଂ : ଦରମା ବୃଦ୍ଧି ଏବଂ ଏରିଅର୍ ଟଙ୍କା ପାଇବା ପରେ ଘର କିଣିବା କିମ୍ବା ଗୃହ ଋଣ ନେବା ସହଜ ହେବ । ଦୈନନ୍ଦିନ ବ୍ୟବହୃତ ସାମଗ୍ରୀ ଏବଂ ବିଳାସପୂର୍ଣ୍ଣ ଜିନିଷର ଚାହିଦା ବଢ଼ିବ ।

ବ୍ୟାଙ୍କିଙ୍ଗ୍: ଲୋକଙ୍କ ପାଖରେ ଅଧିକ ନଗଦ ଟଙ୍କା ରହିବା ଫଳରେ ବ୍ୟାଙ୍କରେ ଜମା ବୃଦ୍ଧି ପାଇବ ଏବଂ ବ୍ୟକ୍ତିଗତ ଋଣର ମାତ୍ରା ମଧ୍ୟ ବଢ଼ିପାରେ ।

୨. ବିତ୍ତୀୟ ପ୍ରଭାବ ଉପରେ ନଜର

ଜଣେ ସଚେତନ ନିବେଶକ ଭାବେ କିଛି ଦିଗ ଉପରେ ନଜର ରଖିବା ଜରୁରୀ । ସରକାରୀ ଖର୍ଚ୍ଚ ବୃଦ୍ଧି ପାଇଲେ ଦେଶର ରାଜକୋଷ ଉପରେ ଚାପ ପଡ଼ିପାରେ । ଯଦି ସରକାରୀ ଋଣ ପରିମାଣ ବଢ଼େ, ତେବେ ଏହା ଦୀର୍ଘକାଳୀନ ଭିତ୍ତିରେ ବଜାରର ଗତିଶୀଳତା (Market Dynamics)କୁ ପ୍ରଭାବିତ କରିବାର ସମ୍ଭାବନା ରହିଛି ।