ଭୁବନେଶ୍ୱର,୨୫/୦୯: ଅସୁରକ୍ଷିତ ହୋଇପଡ଼ିଛି ରାଜଧାନୀ । ଅପହରଣ ପାଇଁ ଚଳନ୍ତା ଅଟୋରେ ଜଣେ ଯୁବତୀଙ୍କୁ ବେହୋସ୍ କରିବାକୁ ଉଦ୍ୟମ ହୋଇଛି । ଆଉ ନିଜକୁ ବଞ୍ଚାଇବାକୁ ଯାଇ ଚଳନ୍ତା ଅଟୋରୁ ଡେଇଁ ପଡ଼ି ଗୁରୁତର ଆହାତ ହୋଇଛନ୍ତି ଯୁବତୀ ଜଣଙ୍କ । ଅଭିଯୋଗ ପାଇ ନୂଆପଲ୍ଲୀ ଥାନା ପୁଲିସ ତନାଘନା ଆରମ୍ଭ କରି ଦେଇଛି । ଚଳନ୍ତା ଅଟୋରେ ଜଣେ ଯୁବତୀଙ୍କୁ ଅପହରଣ ଉଦ୍ୟମ ଘଟଣା ରାଜଧାନୀରେ ଚାଞ୍ଚଲ୍ୟ ଖେଳାଇ ଦେଇଛି ।
ମିଳିଥିବା ଅଭିଯୋଗ ଅନୁଯାୟୀ,ନୂଆପଲ୍ଲୀ ଅଞ୍ଚଳରେ ରହୁଥିବା ଜଣେ ଯୁବତୀ ଗତକାଲି ରାତିରେ ଆଚାର୍ଯ୍ୟବିହାରରୁ ଅଟୋରେ ନୂଆପଲ୍ଲୀ ଆସୁଥିଲେ। ଅଟୋରେ ଚାଳକଙ୍କ ସମେତ ଅନ୍ୟଜଣେ ମହିଳା ମୁଣ୍ଡରେ ଓଢ଼ଣି ପକାଇ ବସିଥିଲେ । ଯୁବତୀ ଜଣଙ୍କ ଅଟୋରେ ବସିବା ପରେ ମହିଳା ଜଣଙ୍କ ପ୍ରଥମେ ତାଙ୍କ ମୋବାଇଲ ଛଡ଼ାଇବା ପାଇଁ ଉଦ୍ୟମ କରିଥିଲେ । ଯୁବତୀ ପାଟି କରିବାରୁ ମହିଳା ପାଖରେ ରଖିଥିବା ଏକ କପଡ଼ାକୁ ତାଙ୍କ ମୁହଁରେ ପକାଇବା ପାଇଁ ଉଦ୍ୟମ କରିଥିଲେ । ଏହି ସମୟରେ ଚାଳକ ଜଣଙ୍କ ଅଟୋକୁ ଦ୍ରୁତଗତିରେ ଚଳାଇଥିଲେ । ଯୁବତୀଜଣଙ୍କ ଅଟୋ ରଖିବା ପାଇଁ କହିଥିଲେ ମଧ୍ୟ ଚାଳକ ଶୁଣି ନଥିଲେ ।
ସେପଟେ ଅଟୋରେ ଥିବା ମହିଳା ଜଣଙ୍କ ଯୁବତୀଙ୍କ ମୁହଁରେ କପଡ଼ା ଗୁଡ଼ାଇବା ପାଇଁ ଉଦ୍ୟମ କରୁଥିଲେ । ଜୀବନ ବିକଳରେ ଯୁବତୀ ଜଣଙ୍କ ଜୟଦେବବିହାର ନିକଟରେ ଚଳନ୍ତା ଅଟୋରୁ ଡେଇଁ ପଡ଼ିଥିଲେ । ଫଳରେ ତାଙ୍କ ମୁଣ୍ଡ ଫାଟିବା ସହ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିଲା । ସ୍ଥାନୀୟ ଲୋକେ ଯୁବତୀଙ୍କୁ ଉଦ୍ଧାର କରି ଏକ ଘରୋଇ ହସ୍ପିଟାଲକୁ ନେଇ ଯାଇଥିଲେ । ସେଠାରେ ଯୁବତୀଙ୍କ ଚିକିତ୍ସା ଚାଲିଥିବା ବେଳେ ଖବରପାଇ ଯୁବତୀଙ୍କ ପରିବାର ଲୋକେ ହସ୍ପିଟାଲରେ ପହଞ୍ଚିଥିଲେ । ଏନେଇ ଯୁବତୀଙ୍କ ମା’ ନୂଆପଲ୍ଲୀ ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁକରି ତନାଘନା ଚଳାଇଥିଲେ ମଧ୍ୟ ଅପହର୍ତ୍ତାଙ୍କ ବିଷୟରେ ସୂଚନା ପାଇନାହିଁ । ରାଜଧାନୀରୁ ଜଣେ ଯୁବତୀଙ୍କୁ ଅପହରଣ ଉଦ୍ୟମ ଘଟଣା ଏବେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି ।
