ନୂଆଦିଲ୍ଲୀ ୨୦/୧୦: ବିହାରରେ ନଭେମ୍ବର ୬ ଏବଂ ୧୧ ତାରିଖରେ ଦୁଇଟି ପର୍ଯ୍ୟାୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ପ୍ରଥମ ପର୍ଯ୍ୟାୟ ଭୋଟିଂ ଲାଗି ନାମାଙ୍କନ ଦାଖଲ ପ୍ରକ୍ରିୟା ବି ସରିଛି । ଏହି ପରିପ୍ରେକ୍ଷୀରେ ଜଣେ ଗ୍ୟାସ୍ ଡେଲିଭରି ମ୍ୟାନ୍ ଛୋଟେ ଲାଲ ମହାତୋ ଚର୍ଚ୍ଚାରେ ଅଛନ୍ତି । ମହାତୋ ରାଜ୍ୟର କିଶନଗଞ୍ଜ ଅଞ୍ଚଳରେ ଏଲ୍ପିଜି ସିଲିଣ୍ଡର ଡେଲିଭରି କରି ପରିବାର ପୋଷଣ କରନ୍ତି । ତେବେ ବିଗତ ୨୦ ବର୍ଷ ହେଲା ସେ ସବୁ ଲୋକସଭା ଏବଂ ବିହାର ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ଆସୁଛନ୍ତି । କୌଣସି ଥର ସଫଳତା ମିଳିନଥିଲେ ବି ପରାଜୟକୁ ସ୍ୱୀକାର କରିନାହାନ୍ତି ମହାତୋ । ଚଳିତ ବିଧାନସଭାରେ ନିର୍ବାଚନରେ ମଧ୍ୟ ସ୍ୱାଧୀନ ଭାବେ ପ୍ରତିଦ୍ୱନ୍ଦ୍ୱିତା କରିବାକୁ ସଜବାଜ ହେଉଛନ୍ତି ।
ମହାତୋ କହିଛନ୍ତି, ୨୦୦୦ ମସିହାରେ ସେ ପ୍ରଥମେ ବିଧାନସଭା ନିର୍ବାଚନ ଲଢ଼ିବାକୁ ନାମାଙ୍କନ ଦାଖଲ କରିଥିଲେ । ଉପଯୁକ୍ତ ବୟସ ହୋଇନଥିବାରୁ ତାହା ଖାରଜ ହୋଇଯାଇଥିଲା । ୨୦୦୫ ପରଠାରୁ ସେ ସବୁ ନିର୍ବାଚନ ଲଢ଼ିଛନ୍ତି । ଅଦ୍ୟାବଧି କୌଣସି ନିର୍ବାଚନରେ ତାଙ୍କୁ ଜିତାପଟ ମିଳିନଥିଲେ ସୁଦ୍ଧା ବହୁ ଜନସମର୍ଥନ ମିଳିଛି। ଅନେକ ତାଙ୍କୁ ନିର୍ବାଚନରେ ଲଢ଼ିବାକୁ ଅର୍ଥ ସାହାଯ୍ୟ କରିଛନ୍ତି । ଲୋକେ ତାଙ୍କ ପରି ସାଧାରଣ ବ୍ୟକ୍ତିଙ୍କୁ ନେତା ଭାବେ ଦେଖିବାକୁ ଚାହାନ୍ତି । ଏଥରକ ତାଙ୍କୁ ନିଶ୍ଚିତ ଭାବେ ସଫଳତା ମିଳିବ । ଲୋକେ ବିପୁଳ ଭୋଟ ଦେଇ ତାଙ୍କୁ ଜୟଯୁକ୍ତ କରିବେ ବୋଲି ସେ ଆଶା ପ୍ରକାଶ କରିଛନ୍ତି ।
