ନୂଆଦିଲ୍ଲୀ,୧୭/୧୦: ଭାରତୀୟ ସେନାର ଯବାନମାନେ ବୁଧବାର ଭାରତରେ ନିର୍ମିତ ସାମରିକ ପାରାଶୁଟ୍ ସିଷ୍ଟମ୍ର ସଫଳ ପରୀକ୍ଷଣ କରିଛନ୍ତି । ଭାରତୀୟ ବାୟୁସେନାର ୩ ଜଣ ଯବାନ ୩୨ ହଜାର ଫୁଟ ଉଚ୍ଚତାରୁ ଏହି ପାରାଶୁଟ୍ରୁ ଲମ୍ଫ ଦେଇଛନ୍ତି । ଏଥିରେ ପାରାଶୁଟ୍ର ସୁରକ୍ଷିତ ଅବତରଣ, ତା’ର ନିୟନ୍ତ୍ରଣ ଓ ନାଭିଗେସନ୍ ସାମିଲ । ଏହି ପାରାଶୁଟ୍ ସିଷ୍ଟମ୍ ନାଭିଗେସନ୍ ୱିଥ୍ ଇଣ୍ଡିଆନ କନ୍ଷ୍ଟେଲେଶନ୍ ବା ନାଭ୍ଆଇସି ଯୁକ୍ତ । ନାଭ୍ଆଇସି ଏକ ସ୍ୱଦେଶୀ ସାଟେଲାଇଟ୍ ନାଭିଗେସନ୍ ସିଷ୍ଟମ୍ । ଲଢୁଆ ପାରାଶୁଟ୍ ସିଷ୍ଟମ୍କୁ ଡିଫେନ୍ସ ରିସର୍ଚ୍ଚ ଆଣ୍ଡ୍ ଡେଭ୍ଲପମେଣ୍ଟ୍ ଅର୍ଗାନାଇଜେସନ୍ ବା ଡିଆର୍ଡିଓ ପ୍ରସ୍ତୁତ କରିଛି । ଡିଆର୍ଡିଓର ଦୁଇଟି ଟେଷ୍ଟିଂ ଲାବ୍- ଏରିୟଲ ଡେଲିଭରୀ
ରିସର୍ଚ୍ଚ ଆଣ୍ଡ୍ ଡେଭଲପ୍ମେଣ୍ଟ ଏଷ୍ଟାବ୍ଲିଶ୍ମେଣ୍ଟ୍, ଆଗ୍ରା ଓ ଡିଫେନ୍ସ ବାୟୋଇଞ୍ଜିନିୟରିଂ ଆଣ୍ଡ୍ ଇଲେକ୍ଟ୍ରୋମେଡିକାଲ ଲାବୋରେଟୋରୀ, ବେଙ୍ଗାଲୁରୁ ମିଳିତ ଭାବେ ଏହାକୁ ପ୍ରସ୍ତୁତ କରିଛନ୍ତି । ଏହି ପାରାଶୁଟ୍ ସାହାଯ୍ୟରେ ଉଡ଼ାଣ ସମୟରେ ବିମାନରୁ ଲମ୍ଫ ଦେଇହେବ । ଉଚ୍ଚତା କ୍ଷମତା: ୩୨ ହଜାର ଫୁଟ, ଓଜନ କ୍ଷମତା: ୧୫୦ କିଲୋ (ସୈନ୍ୟ ଓ କିଟ୍) । ମେନ୍ ଓ ରିଜର୍ଭ କ୍ୟାନୋପି ମଧ୍ୟରୁ ଗୋଟିଏ ଫାଟିଗଲେ ଅନ୍ୟଟି କାମ କରିବ । ସୈନିକ ଯଦି ଠିକ୍ ସମୟରେ ପାରାଶୁଟ୍ ନ ଖୋଲନ୍ତି, ତେବେ ସିଷ୍ଟମ୍ ଆପଣାଛାଏଁ ଖୋଲିବ । ଏହା ଜିପିଏସ୍/ନାଭ୍ଆଇସି ଆଧାରିତ ନାଭିଗେସନ୍ ସିଷ୍ଟମ୍ ହୋଇଥିବାରୁ ଉଚିତ୍ ସ୍ଥାନରେ ଅବତରଣ ସମ୍ଭବ । ଅଧିକ ଉଚ୍ଚତାରେ ଅମ୍ଳଜାନ ପାଇଁ ଏଥିରେ ବ୍ରିଦିଙ୍ଗ୍ ସିଷ୍ଟମ୍ ରହିଛି । ରାତିରେ ମଧ୍ୟ ଦିଗ ନିର୍ଣ୍ଣୟ କରିବା ପାଇଁ ନାଇଟ୍ ଭିଜନ୍ ହେଡ୍ଗିୟର୍ ରହିଛି ।
