ନୂଆଦିଲ୍ଲୀ,୩୦/୦୯: ଖୁବ୍ଶୀଘ୍ର ମୋବାଇଲ ନମ୍ବର ପୋର୍ଟେବିଲିଟି(ଏମ୍ଏନ୍ପି) ଭଳି ଗ୍ୟାସ କମ୍ପାନି ବଦଳାଇପାରିବେ ଉପଭୋକ୍ତା । ଗ୍ୟାସ ସଂଯୋଗକୁ ଅନ୍ୟ କମ୍ପାନିକୁ ବଦଳାଇପାରିବେ । ଏଥିପାଇଁ ପ୍ରସ୍ତୁତି ଆରମ୍ଭ କରିସାରିଲାଣି ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ୍ ନିୟାମକ ବୋର୍ଡ (ପିଏନ୍ଜିଆର୍ବି) । ଏହାଦ୍ୱାରା ଖାଉଟିଙ୍କୁ ଅଧିକ ବିକଳ୍ପ ଏବଂ ଉନ୍ନତ ସେବା ମିଳିବ ।
ୟୁପିଏ ସରକାର ୨୦୧୩ ଅକ୍ଟୋବରରେ ୧୩ ରାଜ୍ୟର ୨୪ ଜିଲ୍ଲାରେ ଏଲ୍ପିଜି କନେକ୍ସନ ପୋର୍ଟେବିଲିଟିର ପାଇଲଟ୍ ପ୍ରକଳ୍ପ ଆରମ୍ଭ କରିଥିଲେ । ୨୦୧୪ ଜାନୁଆରୀରେ ଏହାକୁ ୪୮୦ ଜିଲ୍ଲା ପର୍ଯ୍ୟନ୍ତ ବିସ୍ତାର କରିଥିଲେ । କିନ୍ତୁ ଏଥିରେ ଜଣେ ଉକ୍ତ କମ୍ପାନି ଅଧୀନରେ ଥିବା ଡିଲର ବଦଳାଇପାରୁଥିଲେ । ଯଦି ଆପଣ ଜଣେ ଇଣ୍ଡେନ୍ ଗ୍ୟାସ ଗ୍ରାହକ, ତେବେ ଅନ୍ୟ କମ୍ପାନିକୁ ଯିବା ସମ୍ଭବ ହେଉ ନ ଥିଲା । ଇଣ୍ଡେନ୍ ଅଧୀନରେ ଥିବା ଡିଲର ବଦଳାଇବାର ସୁବିଧା ହିଁ ମିଳୁଥିଲା ।
ଏହାର କାରଣ ହେଉଛି ନିୟମ ଅନୁସାରେ, ସିଲିଣ୍ଡର କେବଳ ଉକ୍ତ କମ୍ପାନିରୁ ରିଫିଲ୍ କରାଯାଇପାରିବ, ଯାହା ଏହାକୁ ଜାରି କରିଛି । ନୂଆ ବ୍ୟବସ୍ଥାରେ ଏବେ ଏହି ପୁରୁଣା ବ୍ୟବସ୍ଥାକୁ ହଟାଇ ଦିଆଯିବ । ପିଏନ୍ଜିଆର୍ବି ଆନ୍ତଃ-କମ୍ପାନି ପୋର୍ଟେବିଲିଟି ଆଣୁଛି । ଏଥିରେ ଜଣେ ଯେକୌଣସି କମ୍ପାନିର କନେକ୍ସନକୁ ବଦଳାଇପାରିବେ । ସ୍ଥାନୀୟ ବିତରକଙ୍କ ପରିଚାଳନାଗତ ସମସ୍ୟା ଯୋଗୁ ଗ୍ରାହକ ଚିନ୍ତିତ । ଅନେକ ସମୟରେ ରିଫିଲ୍ରେ ସପ୍ତାହ ପର୍ଯ୍ୟନ୍ତ ବିଳମ୍ବ ହୋଇଥାଏ ।
ପିଏନ୍ଜିଆର୍ବିର କହିବାନୁସାରେ, ଗ୍ରାହକଙ୍କୁ ବିକଳ୍ପ ଚୟନ କରିବାର ସ୍ୱାଧୀନତା ଦିଆଯିବା ଦରକାର, ବିଶେଷକରି ଯେତେବେଳେ ସମସ୍ତ କମ୍ପାନିର ସିଲିଣ୍ଡର ଦର ସମାନ ହୋଇଥିବ । ଯଦି ସ୍ଥାନୀୟ ଡିଲର ଠିକ୍ ଭାବେ କାର୍ଯ୍ୟ କରୁନାହିଁ, ସେତେବେଳେ ଅନ୍ୟ କମ୍ପାନିଙ୍କ ନିକଟସ୍ଥ ବିତରକଙ୍କଠାରୁ ରିଫିଲ୍ କରିବାର ସୁବିଧା ମିଳିବ । ପିଏନ୍ଜିଆର୍ବି ଏବେ ଅଂଶୀଦାର, ଉପଭୋକ୍ତା, ବିତରକ ଏବଂ ଜନସାଧାରଣଙ୍କ ଫିଡ୍ବ୍ୟାକ୍ ମାଗିଛି । ମତାମତ ଦେବାର ଅନ୍ତିମ ତାରିଖ ଅକ୍ଟୋବର ମଧ୍ୟଭାଗ ପର୍ଯ୍ୟନ୍ତ ରହିଛି। ଏହାପରେ ନିୟମ ଏବଂ ମାର୍ଗଦର୍ଶିକା ହେବ ଓ ସମଗ୍ର ଦେଶରେ ପ୍ରଚଳନ କରାଯିବାର ତାରିଖ ନିର୍ଦ୍ଧାରଣ କରାଯିବ ।
ଭାରତରେ ଏବେ ତିନୋଟି ପ୍ରମୁଖ ସରକାରୀ ତୈଳ ବିପଣନ କମ୍ପାନି ଅଛନ୍ତି, ଯେଉଁମାନେ ଘରୋଇ ଏବଂ ବାଣିଜ୍ୟିକ ଏଲ୍ପିଜି ସଂଯୋଗ ପ୍ରଦାନ କରୁଛନ୍ତି । ଏହି କମ୍ପାନିତ୍ରୟ ହେଲେ ଇଣ୍ଡିଆନ୍ ଅଏଲ୍ କର୍ପୋରେଶନ୍ ଲିମିଟେଡ୍ (ଆଇଓସିଏଲ୍), ଭାରତ ପେଟ୍ରୋଲିୟମ କର୍ପୋରେଶନ୍ ଲିମିଟେଡ୍ (ବିପିସିଏଲ୍) ଏବଂ ହିନ୍ଦୁସ୍ତାନ ପେଟ୍ରୋଲିୟମ କର୍ପୋରେଶନ୍ ଲିମିଟେଡ୍ (ଏଚ୍ପିସିଏଲ୍) ।
