ଭୁବନେଶ୍ୱର,୧୧/୧୦: କମିଯିବ ଭୁବନେଶ୍ୱର-ପାରାଦୀପ ଦୂରତା । ଆଉ କଟକ ସହର ଦେଇ ଯିବାକୁ ପଡ଼ିବନି । ଭୁବନେଶ୍ୱରର ରସୁଲଗଡ଼ରୁ ବାହାରି ଜଗତସିଂହପୁରର ରଘୁନାଥପୁର ଓ ନାନପୁର ନିକଟରେ ପାରାଦୀପ ରାସ୍ତାକୁ ସଂଯୋଗ କରିବା ଏହି ନୂଆ ରାସ୍ତା । ୪ ଲେନ୍ ବିଶିଷ୍ଟ ଏହି ଏକ୍ସପ୍ରେସ ୱେ ନିର୍ମାଣ କରିବାକୁ ରାଜ୍ୟ ସରକାର ଯୋଜନା କରିଛନ୍ତି । ଏହା ରାଜଧାନୀରୁ ପାରାଦୀପ ଅଭିମୁଖେ ଏକ ନୂଆ ବାଇପାସ୍ ଭଳି କାମ କରିବ ।
ବନ୍ଦର ନଗରୀ ପାରାଦୀପକୁ ରାଜଧାନୀ ଭୁବନେଶ୍ୱର ସହ ଯୋଡ଼ିବାକୁ ରାଜ୍ୟ ସରକାର ଏକ ନୂଆ ବିକଳ୍ପ ରାସ୍ତା ନିର୍ମାଣ କରିବେ । ଏ ନେଇ ପୂର୍ତ୍ତ ବିଭାଗ ଟିମ୍ ଲାଗି ପଡ଼ିଛି । ପ୍ରସ୍ତାବିତ ରାସ୍ତା ପାଇଁ ଡିପିଆର ପ୍ରସ୍ତୁତ କରାଯିବ । ଏ ନେଇ ଟେଣ୍ଡର ଆହ୍ୱାନ କରିଛି ଓଡ଼ିଶା ବ୍ରିଜ୍ ଆଣ୍ଡ୍ କନଷ୍ଟ୍ରକସନ କର୍ପୋରେସନ (ଓବିସିସି) । ଟେଣ୍ଡରଧାରୀ ସଂସ୍ଥା ପ୍ରସ୍ତାବିତ ପ୍ରକଳ୍ପ ପାଇଁ ପ୍ରଥମେ ସର୍ଭେ କରିବେ । ଓବିସିସି ଅଧିକାରୀଙ୍କ କହିବାନୁସାରେ ପ୍ରଥମେ କେଉଁ ରୁଟ ଦେଇ ରାସ୍ତା ଯିବ, ତାହା ସ୍ଥିର କରାଯାଇନି । ସର୍ଭେ ପରେ ରୁଟ୍ ଚୂଡ଼ାନ୍ତ ହେବ । କେତେ ଜମି ଅଧିଗ୍ରହଣ ହେବ, କେଉଁଠି ବ୍ରିଜ୍ ନିର୍ମାଣ କରାଯିବ, ତାହା ସ୍ଥିର କରାଯିବ । ବଡ଼ କଥା ହେଲା, ଏହି ଏକ୍ସପ୍ରେସ୍ ୱେ ନିର୍ମାଣ ହେଲେ ଭୁବନେଶ୍ୱର ଓ ପାରାଦୀପକୁ ଯା’ ଆସ ସମୟ କମିଯିବ । କଟକ-ଭୁବନେଶ୍ୱର ଓ କଟକ-ପାରାଦୀପ ରାସ୍ତାରେ ଟ୍ରାଫିକ ଭିଡ଼ କମିବ । ଲୋକେ ଆରାମରେ ପାରାଦୀପରେ ପହଞ୍ଚି ପାରିବେ । ଏହି ନୂଆ ସଡ଼କ ନିର୍ମାଣ ନେଇ ରାଜ୍ୟ ସରକାର ବେଶ୍ ଗୁରୁତ୍ୱ ଦେଉଛନ୍ତି । ଉଚ୍ଚସ୍ତରୀୟ ବୈଠକ ବସି ଏ ଦିଗରେ ନିଷ୍ପତ୍ତି ହୋଇଛି ।
ବିଶେଷଜ୍ଞଙ୍କ କହିବାନୁସାରେ ଏହି ପ୍ରସ୍ତାବିତ ସଡ଼କ ପ୍ରାୟତଃ ନୂଆ କରି ନିର୍ମାଣ ହେବ । କେତେକ ଜାଗାରେ ପୂର୍ବରୁ ଥିବା ରାସ୍ତାକୁ ଉନ୍ନତୀକରଣ କରାଯିବ । ଏହା ଭୁବନେଶ୍ୱରରୁ ବାହାରିଲେ ଜୟଦେବ ନିର୍ବାଚନମଣ୍ଡଳୀ, ନିଆଳି, ତିର୍ତ୍ତୋଲ ନିର୍ବାଚନମଣ୍ଡଳୀର ବିଭିନ୍ନ ଅଞ୍ଚଳ ଦେଇ କଟକ କନ୍ଦରପୁରଠାରୁ ପ୍ରାୟ ୧୦ କିମି ଦୂର ନାନପୁର କିମ୍ବା ରଘୁନାଥପୁର ନିକଟରେ ପାରାଦୀପ ରାସ୍ତାକୁ ଛୁଇଁପାରେ ।
