ନୂଆପଡ଼ା ୦୬/୧୦(ରତନ କେତକି): ଉପନିର୍ବାଚନ ଯେତିକି ପାଖେଇ ଆସୁଛି, ବାତାବରଣ ସେତିକି ଉଷ୍ମ ହେଉଛି । ୧୧ ତାରିଖରେ ନୂଆପଡ଼ାବାସୀ ଉପନିର୍ବାଚନ ଲାଗି ମତଦାନ କରିବେ । ଆଦିବାସୀ ଭୋଟ୍ ସମେତ ମହିଳା, ଚାଷୀ ଭୋଟରମାନଙ୍କ ଉପରେ ସବୁ ଦଳର ଆଖି ।
ଉପନିର୍ବାଚନରେ ମହିଳା ଭୋଟର ନିର୍ଣ୍ଣାୟକ ହୋଇ ପାରନ୍ତି ବୋଲି ଆକଳନ ହେଉଛି । ରାଜ୍ୟରେ ବିଜେପି ସରକାର ଆସିବା ପରେ ମହିଳାଙ୍କ ପାଇଁ ସୁଭଦ୍ରା ଯୋଜନା ପ୍ରଣୟନ କରିଛନ୍ତି । ସୁଭଦ୍ରା ଯୋଜନାରେ ଜିଲ୍ଲାରେ ୧ ଲକ୍ଷ ୬୫ ହଜାର ୭୮୮ ମହିଳା ପ୍ରଥମ କିସ୍ତି ଟଙ୍କା ପାଇଥିଲେ । ସେଥିରୁ ନୂଆପଡ଼ା ବ୍ଲକରେ ୩୫ ହଜାର ୭୩୩, କୋମନାରେ ୩୭ ହଜାର ୭୪୯, ନୂଆପଡ଼ା ଏନଏସିରେ ୩୨୫୪, ଖରିଆର ରୋଡ଼ରେ ୪୦୦୧ ମହିଳା ସୁଭଦ୍ରା ସହାୟତା ରାଶି ପାଇଛନ୍ତି । ସେହିପରି ଚତୁର୍ଥ କିସ୍ତିରେ ଜିଲ୍ଲାରେ ୧ ଲକ୍ଷ ୫୪ ହଜାର ୯୦୯ ଜଣ ମହିଳା ସହାୟତା ପାଇଛନ୍ତି । ପ୍ରଥମ କିସ୍ତି ତୁଳନାରେ ୧୦,୮୭୯ ଜଣ ମହିଳା ଚତୁର୍ଥ କିସ୍ତି ପାଇବାରୁ ବଞ୍ଚିତ ହୋଇଛନ୍ତି ।
ଏହି ସୁଭଦ୍ରା ଯୋଜନା କାର୍ଯ୍ୟକାରୀ ଯୋଗୁଁ ମହିଳାମାନେ ଅଧିକ ସଂଖ୍ୟାରେ ବିଜେପିକୁ ଭୋଟ୍ ଦେବେ ବୋଲି ଶାସକ ଦଳ ଆଶାବାଦୀ । ସେପଟେ କିନ୍ତୁ ବିଜେଡି ଜଣେ ମହିଳା ସ୍ନେହାଙ୍ଗିନୀ ଛୁରିଆଙ୍କୁ ପ୍ରାର୍ଥୀ କରିଛି । ବରଗଡ଼ ଜିଲ୍ଲା ଅତାବିରାର ହେଲେ ମଧ୍ୟ ସ୍ନେହାଙ୍ଗିନୀ ବ୍ୟକ୍ତିଗତ ଭାବେ ଏବେ ସବୁ ମହିଳା ଭୋଟରଙ୍କୁ ଭେଟୁଛନ୍ତି । ମହିଳା ଭୋଟରଙ୍କୁ ନିଜ ପଟକୁ ଟାଣିବାକୁ ବିଜେଡିର ଅନେକ ନାରୀନେତ୍ରୀ ଏବେ କଠିନ ପରିଶ୍ରମ କରୁଛନ୍ତି । ବିଜେପିର ସୁଭଦ୍ରା ଯୋଜନାକୁ ବିଜେଡିର ମହିଳା କାର୍ଡ କେତେ କାଉଣ୍ଟର କରୁଛି ତାହା ଭୋଟ୍ ଗଣତି ପରେ ସ୍ପଷ୍ଟ ହୋଇଯିବ ।
ଚାଷୀଙ୍କ କଥାକୁ ଦେଖିବା ତେବେ ୨୦୨୪-୨୫ ଆର୍ଥିକ ବର୍ଷ ଖରିଫରେ ୪୬ ହଜାର ୩୪୬ ଚାଷୀ, ରବିରେ ୧୩ ହଜାର ୨୯୭ ଜଣ ଚାଷୀ ଧାନ ବିକ୍ରି ପାଇଁ ପଞ୍ଜୀକରଣ କରିଥିଲେ । ୨୦୨୫-୨୬ ଆର୍ଥିକ ବର୍ଷ ଖରିଫରେ ୫୧ ହଜାର ୩୪୧ ଜଣ ଚାଷୀ ଧାନ ବିକ୍ରି ପାଇଁ ପଞ୍ଜୀକରଣ କରିଛନ୍ତି । ବର୍ଷକରେ ୪୯୯୫ ଜଣ ଅଧିକ ସଂଖ୍ୟକ ଚାଷୀ ପଞ୍ଜିକୃତ ହୋଇଛନ୍ତି।
ବିଜେପି ସରକାର କ୍ଷମତାକୁ ଆସିବା ପରେ ଚାଷୀଙ୍କୁ ଧାନ କ୍ୱିଣ୍ଟାଲ ପିଛା ଏମ୍ଏସ୍ପି ଉପରେ ୮୦୦ ଟଙ୍କା ବୋନସ ଦିଆଯାଉଛି । ତେଣୁ ଚାଷୀଙ୍କ ସମର୍ଥନ ମିଳିବ ବୋଲି ବିଜେପି ଆକଳନ କରୁଛି । ସେପଟେ ଉଭୟ ବିଜେଡି ଓ କଂଗ୍ରେସ ଏହି ଚଷା ଭୋଟରଙ୍କୁ ନିଜ ପଟକୁ ଟାଣିବାକୁ ମଧ୍ୟ ଉଦ୍ୟମ କରୁଛନ୍ତି । ଏହା ବ୍ୟତୀତ ନୂଆପଡ଼ା ଜିଲ୍ଲାରେ ୧୩୯୨ ଜଣ ଅଙ୍ଗନବାଡ଼ି କର୍ମୀ, ୧୩୮୨ ଜଣ ଅଙ୍ଗନବାଡ଼ି ସହାୟିକା କାର୍ଯ୍ୟ କରୁଛନ୍ତି ।
ସେହିପରି ଜିଲ୍ଲାରେ ୧୧୪୦ ଜଣ ଆଶାକର୍ମୀ ନିୟୋଜିତ ହୋଇଛନ୍ତି । ଗାଁଗୁଡିକରେ ଏହି ଅଙ୍ଗନବାଡ଼ି ଓ ଆଶା କର୍ମୀମାନେ ଭୋଟରମାନଙ୍କୁ ପ୍ରଭାବିତ କରିବାର ଯଥେଷ୍ଟ ନଜିର ରହିଛି । ବିଜେପିରୁ ଜୟ ଢୋଲକିଆ ଓ କଂଗ୍ରେସରୁ ଘାସିରାମ ମାଝୀଙ୍କ ସହ କଡ଼ା ମୁକାବିଲା କରୁଛନ୍ତି ବିଜେଡିର ସ୍ନେହାଙ୍ଗିନୀ ଛୁରିଆ । ଜଣେ ଦିବଙ୍ଗତ ବିଧାୟକଙ୍କ ପୁଅ, ଆଉ ଜଣେ ସ୍ଥାନୀୟ ଆଦିବାସୀ ପୁଅ । ବିଜେଡିରୁ ମହିଳା ପ୍ରାର୍ଥୀ । ମହିଳା ଓ ଚାଷୀଙ୍କ ଭୋଟ ଯେଉଁ ପଟକୁ ଢ଼ଳିବ ସେହି ପ୍ରାର୍ଥୀ ବିଜୟୀ ହେବାର ଯଥେଷ୍ଟ ସମ୍ଭାବନା ରହିଛି ।
