କଟକ,୧୮/୧୦: ଅନୁକମ୍ପାମୂଳକ ଚାକିରି ପାଇଁ ଆବେଦନ କରିବାର ନିର୍ଦ୍ଦିଷ୍ଟ ସମୟ କେବେ ତାହା କୌଣସି ସ୍ଥାନରେ ଉଲ୍ଲେଖ କରାଯାଇ ନାହିଁ । ସରକାରୀ ଚାକିରିରେ ଥିବା ଜଣେ ବ୍ୟକ୍ତିଙ୍କ ମୃତ୍ୟୁ ପରେ ତାଙ୍କ ଆଇନଗତ ଉତ୍ତରାଧିକାରୀଙ୍କ ଆବେଦନ କରିବାର ସମୟ ଆରମ୍ଭ ହୋଇଥାଏ । କିନ୍ତୁ ଜଣେ ଆଇନଗତ ଉତ୍ତରାଧିକାରୀ ଭାବେ ଆବେଦନ କରିବାକୁ ହେଲେ ସମ୍ପୃକ୍ତ ବ୍ୟକ୍ତିଙ୍କୁ ଏ ସଂକ୍ରାନ୍ତ ବିଭିନ୍ନ ସାଟିର୍ଫିକେଟ୍ ଯୋଗାଡ଼ କରିବାକୁ ପଡ଼ିଥାଏ । ଏହି ସାର୍ଟିଫିକେଟ୍ ଯୋଗାଡ଼ କରିବା କାର୍ଯ୍ୟ ମଧ୍ୟ ଏତେ ସହଜ ନୁହେଁ । ଆବଶ୍ୟକ ପଡ଼ୁଥିବା ସମସ୍ତ ସାର୍ଟିଫିକେଟ ଯୋଗାଡ଼ ପରେ ଯାଇ ଜଣେ ବ୍ୟକ୍ତି ଅନୁକମ୍ପାମୂଳକ ଚାକିରି ପାଇଁ ଆବେଦନ କରିପାରିବେ । କିନ୍ତୁ ଆଇନରେ ଏହି ସାର୍ଟିଫିକେଟ୍ ଯୋଗାଡ଼ ସମୟକୁ ବାଦ୍ ଦିଆଯାଇ ନାହିଁ । ତେଣୁ ଅନୁକମ୍ପାମୂଳକ ଚାକିରି ପାଇଁ ବିଳମ୍ବରେ ଆବେଦନ ଆଳରେ ଜଣଙ୍କ ଆବେଦନକୁ ଖାରଜ କରିବା ଗ୍ରହଣୀୟ ନୁହେଁ ବୋଲି ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟରେ ମତ ବ୍ୟକ୍ତ କରିଛନ୍ତି ।
ଭଞ୍ଜନଗରର କେଏସ୍ୟୁବି ମହାବିଦ୍ୟାଳୟର ପିଅନ ପଦରେ ରଶ୍ମିତା ନାୟକଙ୍କ ବାପା କାର୍ଯ୍ୟ କରୁଥିଲା ବେଳେ ହଠାତ୍ ତାଙ୍କର ଦେହାନ୍ତ ହୋଇଯାଇଥିଲା । ବାପାଙ୍କ ମୃତ୍ୟୁ ପରେ ଅନୁକମ୍ପାମୂଳକ ଚାକିରି ପାଇଁ ସେ ଆବେଦନ କରିଥିଲେ । କିନ୍ତୁ ସେ ବିଳମ୍ବରେ ଆବେଦନ କରିଥିବା ଦର୍ଶାଯାଇ ପ୍ରଶାସନ ପକ୍ଷରୁ ତାଙ୍କ ଆବେଦନକୁ ଖାରଜ କରି ଦିଆଯାଇଥିଲା । ଏହି ଆଦେଶ ବିରୋଧରେ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟର ବିଚାରପତି ଜଷ୍ଟିସ୍ ଡି.କେ. ଶ୍ରୀପଦ ପ୍ରଶାସନର ଏହି ନିଷ୍ପତ୍ତିକୁ ଖାରଜ କରିବା ସହ ଆବେଦନକାରୀଙ୍କ ଆବେଦନକୁ ସାନି ବିଚାର ପାଇଁ ପଠାଇ ଦେଇଛନ୍ତି । ଏହି ଆବେଦନ ଉପରେ ୩ ମାସ ମଧ୍ୟରେ ପ୍ରଶାସନ ନିଷ୍ପତ୍ତି ନେବ । ଯଦି ଧାର୍ଯ୍ୟ ସମୟ ମଧ୍ୟରେ ନିଷ୍ପତ୍ତି ନିଆ ନଯାଏ ତାହେଲେ ଦାୟୀ ଅଧିକାରୀଙ୍କୁ ପ୍ରତିଦିନ ୫ ଶହ ଟଙ୍କା ଲେଖାଏଁ ହିସାବରେ ଆବେଦନକାରିଣୀଙ୍କୁ କ୍ଷତିପୂରଣ ଦେବାକୁ ପଡ଼ିବ । ଏହି ଟଙ୍କା ତାଙ୍କ ନିଜ ପକେଟରୁ ଭରଣା କରିବାକୁ ପଡ଼ିବ ବୋଲି ହାଇକୋର୍ଟ ଆଦେଶରେ ସ୍ପଷ୍ଟ କରିଛନ୍ତି ।
ହାଇକୋର୍ଟ ଏହି ଅବସରରେ କହିଛନ୍ତି ଯେ, ଭାରତ ଏକ ଜନମଙ୍ଗଳ ରାଷ୍ଟ୍ର । ଆବେଦନକାରିଣୀଙ୍କ ଭଳି ଲୋକଙ୍କୁ ନିଯୁକ୍ତି ଦିଆଯିବା ଦ୍ୱାରା ଜନମଙ୍ଗଳ ରାଷ୍ଟ୍ରର ପ୍ରକୃତ ଉଦ୍ଦେଶ୍ୟ ସାଧିତ ହୋଇପାରିବ । କିନ୍ତୁ ଏଠି ବିଳମ୍ବରେ ଆବେଦନ କରିଥିବା ଦର୍ଶାଇ ତାଙ୍କ ଆବେଦନକୁ ଖାରଜ କରି ଦିଆଯାଇଛି । କେବଳ ତାଙ୍କର ନୁହେଁ ଅନେକ ଆବେଦନ କେବଳ ଏହି ବିଳମ୍ବ ଆବେଦନ ଆଳରେ କାଟି ଦିଆଯାଉଛି । ହାଇକୋର୍ଟ ଏଭଳି ଏକ ବ୍ୟବସ୍ଥାକୁ ସମାଲୋଚନା କରିଛନ୍ତି । ଜଣେ ବ୍ୟକ୍ତିଙ୍କ ଦେହାନ୍ତ ପରେ ବିଭିନ୍ନ ସାର୍ଟିଫିକେଟ୍ ଯୋଗାଡ଼ କରିବା କଷ୍ଟକର କାର୍ଯ୍ୟ । ତେଣୁ ଯେତିକି ସମୟ ଏହି ପ୍ରମାଣପତ୍ର ଯୋଗାଡ଼ରେ ଯାଉଛି ସେତିକି ସମୟକୁ ଆବେଦନ ସମୟସୀମାରୁ ବାଦ୍ ଦେବା ଆବଶ୍ୟକ ବୋଲି କୋର୍ଟ ମତ ଦେଇଛନ୍ତି ।
