ନୂଆଦିଲ୍ଲୀ: ପାକିସ୍ତାନର ବେଲୁଚିସ୍ତାନରେ ଧିରେଧିରେ ଜନବିଦ୍ରୋହ ବଢ଼ିବାରେ ଲାଗିଛି। ବଲୁଚ୍ ୟାକଜେହତି କମିଟି (BYC) ପାକିସ୍ତାନ ସରକାର ଉପରେ ଅଟକ ଥିବା ବାଲୁଚ୍ ନେତାମାନଙ୍କ ବିରୁଦ୍ଧରେ ଜନ ଅକ୍ରୋଶକୁ ଦମନ କରିବା ପାଇଁ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା ଅଭିଯୋଗ କରିଛି। ବଲୁଚ୍ ନେତା ତଥା BYC ନେତା ସାମ୍ମି ଦିନ ବଲୁଚ୍ ଏନେଇ କହିଛନ୍ତି ଯେ, "ବଲୁଚିସ୍ତାନରେ ସରକାରକୁ ବିରୋଧ କରୁଥିବା କର୍ମୀମାନଙ୍କୁ ଛଅ ମାସରୁ ଅଧିକ ସମୟ ଧରି ଅଟକ ରଖାଯାଇଛି। ସେମାନଙ୍କୁ ଏକ ଅଜଣା ସ୍ଥାନରେ ରଖି ନିର୍ଯାତନା ଦିଆଯାଉଛି।"
ସ୍ଥାନୀୟ ଗଣମାଧ୍ୟମ ଦି ବେଲୁଚିସ୍ତାନ ପୋଷ୍ଟ ଅନୁଯାୟୀ, କୌଣସି ପାକିସ୍ତାନୀ ସଂସ୍ଥା ଏହି କର୍ମୀଙ୍କ ବିରୁଦ୍ଧରେ ଆନୁଷ୍ଠାନିକ ଅଭିଯୋଗ ମଧ୍ୟ ଦାଖଲ କରିନାହିଁ। ଅଟକ ନେତାମାନଙ୍କ ମଧ୍ୟରେ ଡକ୍ଟର ମେହରାଙ୍ଗ ବଲୁଚ୍, ବିବର୍ଗ ବଲୁଚ୍, ଶାହଜି ବଲୁଚ୍, ବିବୋ ବଲୁଚ୍ ଏବଂ ଗୁଲଜାଦି ବଲୁଚ୍ ଭଳି ନେତା ଅନ୍ତର୍ଭୁକ୍ତ ରହିଛନ୍ତି। ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଏଫଆଇଆର ଅଧୀନରେ ସେମାନଙ୍କୁ ବେଆଇନ ଭାବରେ ଅଟକ ରଖାଯାଇଛି ବୋଲି ଜଣାପଡିଛି।
ସରକାର ପ୍ରାରମ୍ଭରେ ଏହି କର୍ମୀମାନଙ୍କୁ ଟାର୍ଗେଟ କରିବା ପାଇଁ ଆଇନର ଅପବ୍ୟବହାର କରିଥିଲେ। ତେବେ ସରକାର ବର୍ତ୍ତମାନ ଆଗାମୀ ସମସ୍ତ ଶୁଣାଣିକୁ କ୍ୱେଟା ଜିଲ୍ଲା ଜେଲକୁ ସ୍ଥାନାନ୍ତର କରିଛନ୍ତି। ଯାହା ଏହି ମାମଲାରେ ସ୍ୱଚ୍ଛତା ଏବଂ ଜନ ଆନ୍ଦୋଳନକୁ ଦମନ କରିବା ପାଇଁ ଏକ ଜଣାଶୁଣା ପଦକ୍ଷେପ ବୋଲି ବଲୁଚ୍ ନେତାମାନେ ଦାବି କରିଛନ୍ତି। ଆଉ ଖାସ୍ ଏଇଥିପାଇଁ ବଲୁଚ୍ ଆତଙ୍କବାଦୀ ସଂଗଠନ ଦ୍ୱାରା ବିଦ୍ରୋହ ଆରମ୍ଭ ହୋଇଯାଇଛି।
ଏହାସହ ପାକିସ୍ତାନ ଖାଇବର ପଖତୁନଖ୍ୱା ପ୍ରଦେଶରେ ଥିବା ଅନ୍ୟ ୨୮ଟି ଆଫଗାନ ଶରଣାର୍ଥୀ ଶିବିର ବନ୍ଦ କରିଦେଇଛି। ଅବୈଧ ବିଦେଶୀ ପ୍ରବାସୀ ବିରୁଦ୍ଧରେ ଦେଶବ୍ୟାପୀ କାର୍ଯ୍ୟାନୁଷ୍ଠାନକୁ ତୀବ୍ରତର କରି ଗୃହ ମନ୍ତ୍ରଣାଳୟ ଏକ ବିଜ୍ଞପ୍ତି ଜାରି କରି ପେଶାୱାରରେ ଆଠଟି, ନୌଶେରାରେ ତିନୋଟି, ହାଙ୍ଗୁରେ ପାଞ୍ଚଟି, କୋହାଟରେ ଚାରିଟି ଏବଂ ମର୍ଦାନରେ ଦୁଇଟି ଶିବିର ବନ୍ଦ କରିଦେଇଛି। ସେହିପରି ସ୍ୱାବିରେ ଦୁଇଟି, ବୁନେରରେ ଗୋଟିଏ ଏବଂ ଦିର୍ ଜିଲ୍ଲାରେ ତିନୋଟି ଶିବିର ବନ୍ଦ କରାଯାଇଛି। ପୂର୍ବରୁ ପ୍ରଦେଶର ଡେରା ଇସମାଇଲ୍ ଖାନ, ଲକ୍କି ମରୱାତ ଏବଂ ହରିପୁରରେ ସମାନ ବିଜ୍ଞପ୍ତି ଜାରି କରାଯାଇଥିଲା। ପାକିସ୍ତାନରେ ବର୍ତ୍ତମାନ ୧୭ ଲକ୍ଷରୁ ଅଧିକ ପଞ୍ଜୀକୃତ ଆଫଗାନ ଶରଣାର୍ଥୀ ଅଛନ୍ତି, ଯେଉଁମାନଙ୍କ ମଧ୍ୟରୁ ଅନେକ ବିନା କାଗଜପତ୍ରରେ ରହୁଛନ୍ତି।
ଏହାକୁ ନେଇ ପାକିସ୍ତାନର ବିଭିନ୍ନ ଅଞ୍ଚଳ ଖାସ କରି ଖାଇବର ପଖତୁନଖ୍ୱା ପ୍ରଦେଶରେ ବିବାଦ ଘନେଇବାରେ ଲାଗିଛି। ସାଧାରଣ ଜନତା ସରକାର ବିରୋଧି ଆନ୍ଦୋଳନ ଆରମ୍ଭ କରିଦେଇଛନ୍ତି।
