ଭୁବନେଶ୍ୱର,୨୩/୧୦: ବହୁଚର୍ଚ୍ଚିତ ‘ଫୁଲବାଣୀ କୁକୁଡ଼ା’କୁ ଜାତୀୟ ମାନ୍ୟତା ମିଳିବାର ବାଟ ଫିଟିଛି । ଏହି ଦେଶୀ କୁକୁଡ଼ା ସମ୍ପର୍କରେ ସବିଶେଷ ତଥ୍ୟ "ନ୍ୟାସନାଲ୍ ବ୍ୟୁରୋ ଅଫ୍ ଆନିମଲ୍ ଜେନେଟିକ୍ ରିସୋର୍ସେସ'(ଏନ୍ବିଏଜିଆର୍)କୁ ପ୍ରଦାନ କରାଯାଇଛି । କେବଳ କୁକୁଡା ନୁହେଁ, ମୟୂରଭଞ୍ଜରେ ଥିବା କୁଡୁ ବତକକୁ ମଧ୍ୟ ଜାତୀୟ ମାନ୍ୟତା ଦେବା ପାଇଁ ସବିଶେଷ ତଥ୍ୟ କେନ୍ଦ୍ରୀୟ ଟିମ୍କୁ ଦିଆଯାଇଛି । ଗତ ୧୫ଦିନ ତଳେ ଏନବିଏଜିଆରର ଅଧିକାରୀମାନେ ଓଡ଼ିଶା ଗସ୍ତରେ କ୍ଷେତ୍ର ପରିଦର୍ଶନ କରିବା ସହ କୁକୁଡ଼ା ଓ ବତକ ସମ୍ପର୍କିତ ଗବେଷଣାତ୍ମକ ରିପୋର୍ଟ ନେଇଥିଲେ । ଗବେଷକଙ୍କ ସହ ଏନେଇ ଆଲୋଚନା କରିଥିଲେ । ଏହି ବିରଳ ପ୍ରଜାତିର କୁକୁଡା ଓ ବତକକୁ ଜାତୀୟ ମାନ୍ୟତା ମିଳିବା ନେଇ ଗବେଷକମାନେ ହୃଦବୋଧ କରିବା ପରେ ଏହି ନିଷ୍ପତ୍ତି ନିଆଯାଇଥିଲା । ତେଣୁ ଖୁବଶୀଘ୍ର ଜାତୀୟମାନ୍ୟତା ପ୍ରଦାନ ନେଇ ସବୁଜ ସଙ୍କେତ ମିଳିପାରେ ବୋଲି ଗବେଷକମାନେ ଆଶାବାଦୀ ଅଛନ୍ତି । ଯଦି ମାନ୍ୟତା ମିଳେ ତେବେ ହାଁସଲି କୁକୁଡା ପରେ ଫୁଲବାଣୀ ଦ୍ୱିତୀୟ କୁକୁଡା ଭାବେ ମାନ୍ୟତା ପାଇବ ବୋଲି ଓୟୁଏଟିର ପ୍ରାକ୍ତନ ଗବେଷକ ସୁଶାନ୍ତ ଦାସ କହିଛନ୍ତି ।
ସୂଚନା ଅନୁସାରେ, କନ୍ଧମାଳ ଜିଲ୍ଲାର ସ୍ୱତନ୍ତ୍ର ପ୍ରଜାତିର ଦେଶୀ କୁକୁଡ଼ାକୁ "ଫୁଲବାଣୀ କୁକୁଡ଼ା' ବୋଲି ନାମକରଣ କରାଯାଇଛି । ଫୁଲବାଣୀ ସମେତ ରାଇକିଆ, ଘୁ.ଉଦୟଗିରି, ଫିରିଙ୍ଗିଆ, କୋଟଗଡ଼ ଓ ବାଲିଗୁଡ଼ାର ଆଭ୍ୟନ୍ତରୀଣ ଜଙ୍ଗଲରେ ଏହି ପ୍ରଜାତିର ଦେଶୀ କୁକୁଡ଼ା ଦେଖିବାକୁ ମିଳିଥାନ୍ତି । ଗୋଟିଏ ବୟସ୍କ "ଫୁଲବାଣୀ କୁକୁଡ଼ା'ର ଓଜନ ୧ କିଲୋରୁ ଦେଢ଼କିଲୋ ପର୍ଯ୍ୟନ୍ତ ହୋଇଥାଏ । ଏମାନେ ବର୍ଷକୁ ୬୦ରୁ ୭୦ଟି ଅଣ୍ଡା ଦେଇଥା'ନ୍ତି । କୁକୁଡା ମାଂସରେ ଔଷଧୀୟ ଗୁଣ ଭରିରହିଥିବା ବେଳେ ଯେକୌଣସି ବିପଦ ଆସିଲେ ଏହି କୁକୁଡ଼ା ଭୂମି ଉପରୁ ୩୦ରୁ ୫୦ ଫୁଟ ଉଚ୍ଚ ଓ ଲମ୍ୱା ଉଡ଼ିବାର ଦକ୍ଷତା ରଖିଛନ୍ତି । ସେଥିପାଇଁ ବଣବିଲେଇ ସହଜରେ କୁକୁଡାକୁ ଧରିପାରନ୍ତି ନାହିଁ । ଏମାନଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି ବି ଅଧିକ । ଫୁଲବାଣୀ କୁକୁଡ଼ାଙ୍କୁ କୃମି, ଝାଡ଼ାରୋଗ, ବାୟୁବାହିତ କିମ୍ୱା ଭାଇରସ୍ଜନିତ ସଂକ୍ରମଣ ସହଜରେ ଆକ୍ରାନ୍ତ କରିପାରିନଥାଏ । ଦେଶର ୨୦ତମ ସ୍ୱତନ୍ତ୍ର ଦେଶୀ ପ୍ରଜାତିର କୁକୁଡ଼ାବର୍ଗରେ ଫୁଲବାଣୀ କୁକୁଡ଼ାକୁ ସାମିଲ କରାଯିବା ନେଇ ଓୟୁଏଟିର ଗବେଷକମାନେ ଉଦ୍ୟମ କରିଆସୁଥିଲେ । ଡ. ଦାସଙ୍କ କହିବା ଅନୁସାରେ, କନ୍ଧମାଳ ଜିଲ୍ଲାରେ ପାଖାପାଖି ଦେଢ଼ଲକ୍ଷରୁ ଅଧିକ ସଂଖ୍ୟାରେ ଏହି କୁକୁଡ଼ା ରହିଛନ୍ତି । ଏମାନଙ୍କର ସଂରକ୍ଷଣ ଏବଂ ସୁରକ୍ଷିତ ପ୍ରଜନନ ପ୍ରତି ଧ୍ୟାନ ଦେବା ଉଚିତ ।
ସେହିପରି ମୟୁରଭଞ୍ଜରେ କୁଡୁ ବତକ ଦେଖାଯାଏ । ଏମାନେ ଆକାରରେ ଛୋଟ ହୋଇଥିବାରୁ ଏମାନଙ୍କ ନାଁ ଏଭଳି ରହିଛି । ୫ମାସରେ ଏମାନେ ଦେଢକେଜିରୁ ୧୮୦୦ ଗ୍ରାମ ଓଜନର ହୋଇଥାନ୍ତି । ବର୍ଷକରେ ୨୮୦ରୁ ୩୦୦ଟି ଅଣ୍ଡା ଦେଇଥାନ୍ତି । ଲାଭଜନକ ଦୃଷ୍ଟିରୁ ଏହି ବତକ ପାଳନର ଆବଶ୍ୟକତା ରହିଛି । କିଛିବର୍ଷ ହେବ ଆଇସିଏଆରସର୍ବଭାରତୀୟ କୁକ୍କୁଟ ଗବେଷଣା କେନ୍ଦ୍ର, ଭୁବନେଶ୍ୱର ଷ୍ଟେସନ ପକ୍ଷରୁ ଏହି ବତକ ଉପରେ ଗବେଷଣା ହେଉଥିଲା । କେବଳ ସେତିକିନୁହେଁ, ଓଡିଶାର ଆଉ ଏକ ଦେଶୀ କୁକୁଡା ‘ଭେଜାଗୁଡା’କୁ ଜାତୀୟ ମାନ୍ୟତା ନେଇ ଏନବିଏଜିଆର ଟିମ୍ ସହ ଆଲୋଚନା ହୋଇଛି । ଏଭଳି କୁକୁଡା ଏବେ କୋରାପୁଟ, ଜୟପୁର, କୁନ୍ଦ୍ରା, ବୈପାରୀଗୁଡା, କୋଟପାଡ, ନବରଙ୍ଗପୁର, ମାଲକାନଗିରି ଜିଲ୍ଲାରେ ଦେଖାଯାଉଛନ୍ତି । ପ୍ରାପ୍ତ ବୟସକୁ ଆସିବା ପରେ ଅର୍ଥାତ ୫ମାସରେ ମାଈ କୁକୁଡା ୧.୩ କିଗ୍ରା ଓ ଗଂଜା ୨ କିଗ୍ରା ଓଜନର ହୋଇଥାନ୍ତି । ଏହାର ମାଂସ ସ୍ୱାଦିଷ୍ଟ ହୋଇଥିବା ବେଳେ ଥରକେ ୧୨ରୁ ୧୫ଟି ଅଣ୍ଡା ଦେଇଥାନ୍ତି । ଓୟୁଏଟି ଏହା ଉପରେ ମଧ୍ୟ ଗବେଷଣା କରୁଥିଲା ।
