କଟକ,୧୦/୧୦: ଜଣେ ବ୍ୟକ୍ତି ୨୦୧୭ ମସିହାରେ ଜବରଦଖଲରେ ଥିବା ଜଳାଶୟରୁ ଉଚ୍ଛେଦ ପାଇଁ ମୁଖ୍ୟ ଶାସନ ସଚିବଙ୍କୁ ଚିଠି ଲେଖିଲେ । ତାଙ୍କ ସମସ୍ୟାର ସମାଧାନ ତ’ ହେଲା ନାହିଁ, କିନ୍ତୁ ତାଙ୍କ ସ୍ମାରକପତ୍ର ଉପରେ କି’ ପଦକ୍ଷେପ ନିଆଯାଇଛି ତାହାର ମଧ୍ୟ କୌଣସି ଠିକ୍ ସୂଚନା ମିଳିଲା ନାହିଁ । ପୂରା ସରକାରୀ ବିଭାଗ ତାଙ୍କ ବିରୋଧରେ ଲାଗିପଡ଼ିଲେ । ସୂଚନା ଅଧିକାର ଆଇନରେ ମାମଲା ରୁଜୁ କରି ରାଜ୍ୟ ସୂଚନା କମିସନରଙ୍କ ନିକଟରୁ ମଧ୍ୟ ନିରାଶ ହେଲେ । ଦୀର୍ଘ ୭ବର୍ଷ ଧରି ଅଦାଲତି ଅଡ଼ୁଆ ଭିତରେ ଛନ୍ଦି ହୋଇଯାଇଥିବା ଏଭଳି ଏକ ଘଟଣାରେ ହାଇକୋର୍ଟ, ସରକାରୀ ଅଧିକାରୀ ତଥା ବ୍ୟବସ୍ଥାକୁ ନେଇ ଭୀଷଣ କ୍ଷୁବ୍ଧ ହୋଇଛନ୍ତି ।
ସୂଚନା ଆଇନର ଉଦ୍ଦେଶ୍ୟ ବୁଝାଇବାକୁ ଯାଇ ହାଇକୋର୍ଟ କହିଛନ୍ତି ଯେ, ଗଣତନ୍ତ୍ରକୁ ମଜଭୁତ୍ କରିବା ପାଇଁ ସୂଚନା ଅଧିକାର ଆଇନର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି । କିନ୍ତୁ ଯଦି ଏହି ଆଇନର ସଦୁପଯୋଗ ନ ହୁଏ ତେବେ ଏହି ଆଇନ ଆସିବାର ପ୍ରକୃତ ଉଦ୍ଦେଶ୍ୟ ସାଧିତ ହୋଇପାରିବ ନାହିଁ । ଏଭଳି ଏକ ଘଟଣାକୁ ହାଇକୋର୍ଟ ଏକ ନାଟକର ଚରିତ୍ର ‘ଯୋଶେଫ୍’ର ଆଇନଗତ ଲଢ଼େଇ କଥାକୁ ମନେ ପକାଇ ଦେଇଛନ୍ତି । ଏହି ମାମଲାକୁ ହାଇକୋର୍ଟ ପୁନର୍ବାର ରାଜ୍ୟ ସୂଚନା କମିସନରଙ୍କ ନିକଟକୁ ପୁନର୍ବିଚାର ପାଇଁ ପଠାଇ ଦେଇଛନ୍ତି ।
ସୂଚନା କମିସନରରେ ଆବେଦନକାରୀ ଏବଂ ଅନ୍ୟ ପକ୍ଷମାନେ ଉପସ୍ଥିତ ରହିବେ । ୪୫ ଦିନ ମଧ୍ୟରେ ଆବେଦନକାରୀଙ୍କ ଏହି ସ୍ମାରକପତ୍ର ଉପରେ ଶୁଣାଣି କରି ରାୟ ପ୍ରଦାନ କରିବାକୁ ହାଇକୋର୍ଟ ସୂଚନା କମିସନରଙ୍କୁ ନିର୍ଦ୍ଦେଶ ଦେଇଛନ୍ତି । ତେବେ ୨୦୧୭ରୁ ଆଜି ପର୍ଯ୍ୟନ୍ତ ଆବେଦନକାରୀ ଏହି ମାମଲା ଲଢ଼ି ଆସୁଥିଲାବେଳେ ଅଯଥାରେ ତାଙ୍କୁ ମାମଲାରେ ଛନ୍ଦି ଦିଆଯାଇଛି । ଏଥିପାଇଁ ଭଦ୍ରକ ତହସିଲ୍ଦାରଙ୍କ ଉପରେ ହାଇକୋର୍ଟ ୫୦ ହଜାର ଟଙ୍କାର ଜରିମାନା କରିଛନ୍ତି । ଡିସେମ୍ବର ୯ ତାରିଖ ପୂର୍ବରୁ ଆବେଦନକାରୀଙ୍କୁ ଏହି ଜରିମାନା ଅର୍ଥ ପ୍ରଦାନ ଲାଗି ହାଇକୋର୍ଟ ଆଦେଶରେ ସ୍ପଷ୍ଟ କରିଛନ୍ତି । ଆବେଦନକାରୀ ହେମନ୍ତ ନାୟକଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ହାଇକୋର୍ଟର ବିଚାରପତି ଜଷ୍ଟିସ୍ ଭି. ନରସିଂହ ଏହି ରାୟ ଦେଇଛନ୍ତି ।
ମାମଲାରୁ ଜଣାଯାଇଛି ଯେ, ଭଦ୍ରକ ଜିଲ୍ଲାର କୁଆଁସ ଗ୍ରାମରେ ଏକ ଜଳାଶୟ ଜମି ଜବରଦଖଲରେ ରହିଥିଲା । ଉକ୍ତ ଜମିରୁ ଜବରଦଖଲ ହଟାଇବା ପାଇଁ ଆବେଦନକାରୀଙ୍କ ସମେତ କିଛି ଗ୍ରାମବାସୀ ରାଜ୍ୟ ମୁଖ୍ୟ ଶାସନ ସଚିବଙ୍କୁ ୨୦୧୭ ଡିସେମ୍ବର ୨୬ ତାରିଖରେ ଚିଠି ଲେଖିଥିଲେ । ଏହା ଉପରେ ରାଜ୍ୟ ମୁଖ୍ୟ ଶାସନସଚିବଙ୍କ ନିର୍ଦ୍ଦେଶକ୍ରମେ ରାଜସ୍ୱ ପର୍ଷଦ ଭଦ୍ରକ ଜିଲ୍ଲାପାଳଙ୍କଠାରୁ ରିପୋର୍ଟ ତଲବ କରିଥିଲେ । କିନ୍ତୁ ଏହି ଚିଠି ଦିଆନିଆ ଭିତରେ ଆବେଦନକାରୀଙ୍କ ଅଭିଯୋଗର ସମାଧାନ ହୋଇପାରି ନଥିଲା । ଫଳରେ ଆବେଦନକାରୀ ସୂଚନା ଅଧିକାର ଆଇନରେ ତାଙ୍କ ଅଭିଯୋଗ ଉପରେ କ’ଣ ହୋଇଛି ସେ ସଂକ୍ରାନ୍ତରେ ଜାଣିବାକୁ ଚାହିଁଥିଲେ । କିନ୍ତୁ ତହସିଲ୍ କାର୍ଯ୍ୟାଳୟରୁ କୌଣସି ସନ୍ତୋଷଜନକ ଉତ୍ତର ନ ମିଳିବାରୁ ସେ ରାଜ୍ୟ ସୂଚନା କମିସନରଙ୍କ ଦ୍ୱାରସ୍ଥ ହୋଇଥିଲେ ।
ଏଥିରେ ତହସିଲ୍ ପକ୍ଷରୁ ପ୍ରଥମେ କୁହାଗଲା ଯେ, ଆବେଦନକାରୀଙ୍କ ପ୍ରତ୍ୟେକ ପ୍ରଶ୍ନର ପାରାୱାରୀ ଉତ୍ତର ରଖାଯାଇଛି । ପୁଣି କୁହାଗଲା ଯେ, ଆବେଦନକାରୀଙ୍କ ସ୍ମାରକପତ୍ର ମିଳୁନାହିଁ । ଏହି ଉତ୍ତର ଆଧାରରେ ରାଜ୍ୟ ସୂଚନା କମିସନର ଆବେଦନକାରୀଙ୍କ ଅପିଲ୍କୁ ଖାରଜ କରି ଦେଇଥିଲେ । ଏହି ଆଦେଶ ବିରୋଧରେ ଆବେଦନକାରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ପ୍ରଶାସନର ଏଭଳି ଦୋମୁହାଁ ନୀତିକୁ ହାଇକୋର୍ଟ ତୀବ୍ର ସମାଲୋଚନା କରିବା ସହ ତହସିଲ୍ଦାରଙ୍କ ଉପରେ ୫୦ ହଜାର ଟଙ୍କାର ଜରିମାନା କରିଛନ୍ତି ।
