ଭୁବନେଶ୍ବର,୨୧/୦୯: ଆତ୍ମାକୁ ନେଇ ଭୟଙ୍କର ଡିଲ୍ । ୩୩ କୋଟି ଟଙ୍କାରେ ଆତ୍ମା ବିକ୍ରି । ବଞ୍ଚି ଥାଉ ଥାଉ ବିକିଦେଲେ ଅଶରୀର । ରକ୍ତରେ ଲେଖା ହେଲା ଚୁକ୍ତିନାମା । ଏ ଖବର ଶୁଣି କେହି ବି ଚମକି ପଡ଼ିବେ । କାରଣ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ଯୁଗରେ ସତରେ କ’ଣ ଏମିତି ହେଉଛି ? ମନୁଷ୍ୟର ଆତ୍ମା କ’ଣ ବିକ୍ରି ହୁଏ ? ଏହାକୁ ତୁଛା ଅନ୍ଧ ବିଶ୍ବାସ ଛଡ଼ା ଆଉ କିଛି କହିହେବ ନାହିଁ । ଆଧୁନିକ ଯୁଗରେ କିଏ ଏବଂ କାହିଁକି ନିଜ ଆତ୍ମାକୁ ବିକ୍ରି କରିବ ? କେହି ଏହାକୁ କିଣି କ’ଣ ବା କରିବ ? ଏଭଳି କିଛି ପ୍ରଶ୍ନ ଆମ ମନରେ ବି ଖବର ପ୍ରସ୍ତୁତ କରିବାକୁ ଉଙ୍କି ମାରୁଥିଲା । ଆମେ ବି ଭାବୁ ଥିଲୁ ଏହା ଡିହା ଗପ । ହେଲେ ପୂରା ଖବର ଜାଣିବା ପରେ ହତବାକ୍ ହୋଇଯାଉଥିଲୁ । ଆଉ ଆଧୁନିକ ଯୁଗରେ ଅନ୍ଧ ବିଶ୍ବାସ କିଭଳି କାୟା ବିସ୍ତାର କରିଛି ତାହା ଜାଣିବାକୁ ପାଇଥିଲୁ । ହିଁ ଆଜ୍ଞା, ୩୩ କୋଟି ଟଙ୍କାରେ ଆତ୍ମା ବିକ୍ରି ହେବା ସମ୍ପୂର୍ଣ୍ଣ ସତ । ଏନେଇ ରିପୋର୍ଟ ବି ପ୍ରକାଶ ପାଇଛି ।...
ଋଷ୍ରେ ଆତ୍ମା ବିକ୍ରି ଡିଲ୍ । ମିହିଳା ବିକିଲେ, ଦିମିତ୍ର କିଣିଲେ । ୩୩ କୋଟି ଟଙ୍କାରେ ଚୁକ୍ତି । ରକ୍ତରେ ଲେଖା ହେଲା ଚୁକ୍ତିନାମା । ଏ ଖବର ଯେତିକି ଭୟଙ୍କର, ସେତିକି ଆଶ୍ଚର୍ଯ୍ୟଜନକ । ବିଶ୍ବର ଅନ୍ୟତମ ବିକଶିତ ଦେଶ ରୁଷିଆରେ ଏହି ଡିଲ୍ ହୋଇଛି । ଦିମିତ୍ର ନାମ ଜଣେ ବ୍ୟକ୍ତି ‘ଆତ୍ମା’ କିଣିବା ପାଇଁ ସୋସିଆଲ୍ ମିଡିଆ ପ୍ଲାଟଫର୍ମରେ ମଜାଳିଆ ଢଙ୍ଗରେ ବିଜ୍ଞାପନ ଦେଇଥିଲେ । ନିଜ ପୋଷ୍ଟରେ ଲେଖିଥିଲେ ସେ କାହାର ଆତ୍ମା କିଣିବାକୁ ଚାହୁଁଛନ୍ତି । ସମସ୍ତେ ପ୍ରଥମେ ଏହାକୁ ମଜାରେ ନେଇଥିଲେ । ମାତ୍ର କରୀନା ନାମକ ଜଣେ ମହିଳା ବିଜ୍ଞାପନକୁ ଗମ୍ଭୀରତାର ସହ ନେଇ ଡିଲ୍ ପାଇଁ ଆଗେଇ ଆସିଥିଲେ ।
୩୩ କୋଟି ଟଙ୍କାରେ ବିକ୍ରି ହେଲା ଆତ୍ମା । ଏନେଇ ଦିମିତ୍ର ଏବଂ କରୀନାଙ୍କ ମଧ୍ୟରେ ଚୁକ୍ତିନାମା ହୋଇଛି । ଏହି ଏଗ୍ରିମେଣ୍ଟ ସାଧାରଣ କାଗଜ ନୁହେଁ, ବରଂ ନିଜ ରକ୍ତରେ ଲେଖାଯାଇଛି । ଏଥିରେ ରକ୍ତରେ ମଧ୍ୟ ଦସ୍ତଖତ ହୋଇଛି । ଏହି ଚୁକ୍ତିନାମାକୁ ଦିମିତ୍ର ଫଟୋ ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି ଏବଂ କ୍ୟାପସନରେ ଲେଖିଛନ୍ତି, ‘ମୁଁ ଆତ୍ମା କିଣିଲି । ଏହା ରକ୍ତରେ ସ୍ୱାକ୍ଷରିତ ଏକ ଚୁକ୍ତି। ମୁଁ ଡେଭି ଜୋନ୍ସ ପରି ଅନୁଭବ କରୁଛି।" ସେପଟେ ଆତ୍ମା ବିକ୍ରି କରିଥିବା କରୀନା କହିଛନ୍ତି, ଏହି ଚୁକ୍ତିରେ କୌଣସି ଅନୁତାପ ନାହିଁ । ଟଙ୍କା ତାଙ୍କ ଆକାଉଣ୍ଟରେ ଜମା ହୋଇଛି। ଆଉ ସେହି ଟଙ୍କାରେ ଲାବୁବୁ କଣ୍ଢେଇ କିଣିବା ସହିତ ପ୍ରସିଦ୍ଧ ଗାୟିକା ନାଡେଜଦା କାଡିଶେଭାଙ୍କ ଏକ କନସର୍ଟ ପାଇଁ ଟିକେଟ୍ କିଣିଲି । ଅନ୍ୟପଟେ ଦିମିତ୍ରୀ ନିଜ ପୋଷ୍ଟରେ ଲେଖିଛନ୍ତି, ମୁଁ ଆଶା କରିନଥିଲି ଜଣେ ମହିଳା ଏହାକୁ ଗମ୍ଭୀରତାର ସହ ନେବେ । ବର୍ତ୍ତମାନ ଭାବୁଛି "ଆତ୍ମା" ସହିତ କ’ଣ କରିବି ?
ତେବେ ଆତ୍ମା ବିକ୍ରି ଖବରକୁ ନେଇ ସୋସିଆଲ୍ ମିଡିଆରେ ଭିନ୍ନ ଭିନ୍ନ ପ୍ରତିକ୍ରିୟା ପ୍ରକାଶ ପାଇଛି । କିଏ ଏହାକୁ ସୋସିଆଲ୍ ମିଡିଆ ଷ୍ଟଣ୍ଟ କହିଛନ୍ତି । ପବ୍ଲିସିଟି ପାଇଁ ଏଭଳି ଡିଲ୍ କରାଯାଇଛି । ଅନ୍ୟକେହି ମହିଳାଙ୍କୁ ମାନସିକ ରୋଗ ଚିକିତ୍ସା ପାଇଁ ପରାମର୍ଶ ଦେଇଛନ୍ତି । ସେ ଯାହା ହେଉନା କାହାଁକି, ଆଧୁନିକ ଯୁଗରେ କିନ୍ତୁ ଆତ୍ମା ବିକ୍ରି ଅତି ଭୟଙ୍କର।...
