ମାଲକାନଗିରି, ୭/୧୧ : ମାଲକାନଗିରି ବ୍ଲକ ଅଞ୍ଚଳରେ ଥିବା ଧାନ ମଣ୍ଡି ଗୁଡ଼ିକ ଏସଏଚଜି ଗ୍ରୁପଙ୍କୁ ଧାନ କ୍ରୟ ଦାୟିତ୍ୱ ନ ଦେଇ ଲ୍ୟାମ୍ପସକୁ ଦେବା ପାଇଁ ଜିଲ୍ଲାପାଳଙ୍କୁ ଆଜି ଦରଖାସ୍ତ ଦେଇଛନ୍ତି ସରପଞ୍ଚମାନେ । ସେମାନଙ୍କ ମୁଖ୍ୟ ଦାବି ହେଲା ପଞ୍ଚାୟତର ଧାନ ସଂଗ୍ରହ କେନ୍ଦ୍ରରେ ସ୍ୱୟଂ ସହାୟକ ଗୋଷ୍ଠୀ (WSHG)କୁ ଧାନ କ୍ରୟ ପାଇଁ ଏଜେଣ୍ଟ ଭାବେ ନିୟୋଜିତ ନ କରି ସ୍ଥାନୀୟ ଲ୍ୟାମ୍ପସକୁ ଦେବା ।
ମାଲକାନଗିରି ବ୍ଲକର ୮ଟି ପଞ୍ଚାୟତ ଯଥା ମାନ୍ଦାପଲ୍ଲି, ବଦିଲି, ଶିଖପାଲି, ଗୋରାଖୁଣ୍ଟା,ତଣ୍ଡା ପଲ୍ଲୀ, ମାଟାପାକା, ଚାଲାଣଗୁଡ଼ା ଓ ତଣ୍ଡିକି ପଞ୍ଚାୟତର ସରପଞ୍ଚ ଓ ଚାଷୀମାନଙ୍କ ଦାବି ହେଲା ଯେ, ଗତ ତିନି-ଚାରି ବର୍ଷ ଧରି ଧାନ ସଂଗ୍ରହ କାର୍ଯ୍ୟରେ ସ୍ବୟଂ ସହାୟକ ଗୋଷ୍ଠୀ (WSHG)ନିୟୋଜିତ ହୋଇ ଆସୁଛନ୍ତି କିମ୍ବା ବର୍ତ୍ତମାନ ନିୟୋଜନ କରିବା ପାଇଁ ଯୋଜନା ରହିଛି । ପଞ୍ଚାୟତର ସରପଞ୍ଚମାନେ ଚାଷୀମାନଙ୍କ ସହ ଏହି ପ୍ରସଙ୍ଗରେ ଆଲୋଚନା କରି ଜାଣିବାକୁ ପାଇଛନ୍ତି ଯେ, ଜିଲ୍ଲାରେ ପ୍ରାୟ ସମସ୍ତ ସ୍ଵୟଂ ସହାୟକ ଗୋଷ୍ଠୀ (WSHG) କାର୍ଯ୍ୟକଳାପକୁ ନେଇ ଅନେକ ଅଭିଯୋଗ ଦେଖାଦେଇଛି ।
ଅନେକ କ୍ଷେତ୍ରରେ ଦଲାଲ (middle man)ମାନେ ସ୍ବୟଂ ସହାୟକ ଗୋଷ୍ଠୀର ସଦସ୍ୟାମାନଙ୍କ ସମ୍ପର୍କୀୟଙ୍କ ସହ ମିଶି ନିଜ ବ୍ୟବସାୟ ପାଇଁ ଅନେକ ଚାଷୀ ପଞ୍ଜୀକରଣ କରୁଛନ୍ତି । ଏହି ସ୍ବୟଂ ସହାୟକ ଗୋଷ୍ଠୀ ସ୍ଥାନୀୟ ଗ୍ରାମବାସୀ ହୋଇଥିବାରୁ ସେମାନେ ସହଜରେ ଗରିବ ଆଦିବାସୀମାନଙ୍କୁ ପ୍ରଭାବିତ କରି ସେମାନଙ୍କ ନାମରେ ଧାନ ବିକ୍ରି ପାଇଁ ପଞ୍ଜୀକରଣ କରାଉଛନ୍ତି ଏବଂ ଧାନ କିଣାବିକା ପରେ ଦଲାଲମାନେ ଗରିବ ଆଦିବାସୀଙ୍କ ନାମରେ ଲାଭ ଉଠାଉଛନ୍ତି । ତତସଙ୍ଗେସଙ୍ଗେ ଟୋକନ୍ ପ୍ରଦାନ କରିବା ବଦଳରେ ଚାଷୀମାନଙ୍କଠାରୁ ଲାଞ୍ଚ ଆଦାୟ କରୁଛନ୍ତି ଓ ପ୍ରକୃତ ଚାଷୀମାନଙ୍କ ଦ୍ବାରା ପୂର୍ବରୁ ସୃଷ୍ଟି ହୋଇଥିବା ବୈଧ ଟୋକନ୍ ସତ୍ତ୍ବେ ଟୋକନ୍ ପ୍ରବେଶଗୁଡ଼ିକୁ ହେରଫେର କରିବା, ସେମାନଙ୍କର ନିଜସ୍ବ କିମ୍ବା ସମ୍ପୃକ୍ତ ପକ୍ଷମାନଙ୍କୁ ପ୍ରାଥମିକତା ଦେଉଛନ୍ତି।
ଏହା ମଧ୍ୟ ଦେଖିବାକୁ ମିଳିଛି ଯେ, ପ୍ରତ୍ୟେକ ସ୍ବୟଂ ସହାୟକ ଗୋଷ୍ଠୀ ପଛରେ ପ୍ରକୃତରେ ତିନିରୁ ଚାରି ଜଣ ବ୍ୟକ୍ତି ଥାଆନ୍ତି, ଯେଉଁମାନେ ସମଗ୍ର ଧାନ ସଂଗ୍ରହ କାର୍ଯ୍ୟକୁ ପରିଚାଳନା କରନ୍ତି । ପଞ୍ଜିକୃତ ମହିଳାମାନେ କେବଳ ନାମଧାରୀ ଭାବେ କାର୍ଯ୍ୟ କରୁଛନ୍ତି । କୌଣସି ସକ୍ରିୟ କିମ୍ବା ସ୍ବାଧୀନ ଭୂମିକା ଗ୍ରହଣ କରୁନଥିବାର ସୂଚନା ରହିଛି । ଧାନ ସଂଗ୍ରହ କାର୍ଯ୍ୟ ସରିବା ପରେ ସରକାରଙ୍କଠାରୁ ମିଳୁଥିବା କମିଶନ ରାଶିକୁ ସେମାନେ ନିଜ ନିଜ ମଧ୍ୟରେ ବାଣ୍ଟି ନିଅନ୍ତି ଏବଂ ସ୍ବୟଂ ସହାୟକ ଗୋଷ୍ଠୀ (WSHG)କୁ କେବଳ ଏକ କ୍ଷୁଦ୍ର ଅଂଶ ଦିଅନ୍ତି । କିନ୍ତୁ ପ୍ରକୃତ ସ୍ବୟଂ ସହାୟକ ଗୋଷ୍ଠୀ କ୍ଷେତ୍ରରେ, ମିଳିଥିବା ଲାଭକୁ ସେମାନଙ୍କ ଗୋଷ୍ଠୀର ବିକାଶ ତଥା ଅନ୍ୟାନ୍ୟ ପ୍ରକ୍ରିୟାକରଣ ପ୍ରକଳ୍ପରେ ବିନିଯୋଗ କରିବା କଥା କିନ୍ତୁ କରାଯାଉନାହିଁ । ଧୀରେ ଧୀରେ ଏହି ପ୍ରକ୍ରିୟା ସମସ୍ତ ସ୍ଥାନୀୟ ଲୋକ ଜାଣିବା ପରେ ସେମାନେ ମଧ୍ୟ ଏକ ସ୍ବୟଂ ସହାୟକ ଗୋଷ୍ଠୀ ଗଠନ କରି ଧାନ ସଂଗ୍ରହ କାର୍ଯ୍ୟରେ ଭାଗ ନେବାକୁ ଆଗ୍ରହ ପ୍ରକାଶ କରୁଛନ୍ତି । ଉପରୋକ୍ତ କାରଣ ଯୋଗୁଁ ସେମାନଙ୍କ ମଧ୍ୟରେ ଜାତିଗତ ଭାବନା ସୃଷ୍ଟି ହୋଇ ଦଳଗତ ସମସ୍ୟା ମଧ୍ଯ ଉପୁଜୁଥିବାର ସୂଚନା ରହିଛି ।
କିନ୍ତୁ ଏହି ଏହି ଖରିଫ ଋତୁରେ ଚାଷୀ ପଞ୍ଜୀକରଣ ଲ୍ୟାମ୍ପସକୁ ଦାୟିତ୍ବ ଦିଆଯାଇଥିଲା । ପଞ୍ଜୀକରଣ କାର୍ଯ୍ୟ ଅତ୍ୟନ୍ତ ସ୍ବଚ୍ଛ ତଥା ସୁସଂଗଠିତ ଢଙ୍ଗରେ ହୋଇଛି, ଯାହାକି ଏସଏଚଜି ଗ୍ରୁପ ଅପେକ୍ଷା ଲ୍ୟାମ୍ପସ ଉନ୍ନତ ବୋଲି ଅନୁଭବ କରୁଛୁ । ଲ୍ୟାମ୍ପସ ଗୁଡ଼ିକ ପଞ୍ଚାୟତସ୍ତରରେ କାର୍ଯ୍ୟ କରୁଛନ୍ତି । ସେମାନେ ଚାଷୀମାନଙ୍କୁ କୃଷି ଋଣ ପ୍ରଦାନ କରିବା ସହ ସାର ଓ ମଞ୍ଜି ବିତରଣ କରୁଛନ୍ତି ଏବଂ ଫସଲ ବୀମା ମଧ୍ୟ କରୁଛନ୍ତି। ବହୁ ବର୍ଷ ଧରି ଚାଷୀମାନଙ୍କ ମଧ୍ୟରେ ଲ୍ୟାମ୍ପସ ସହ ଏକ ସ୍ବଚ୍ଛ ତଥା ବିଶ୍ବସ୍ତ ସମ୍ପର୍କ ପ୍ରତିଷ୍ଠା ହୋଇ ରହିଛି । ଏହି ଖରିଫ ଧାନ ପଞ୍ଜୀକରଣ ସମୟରେ ଚାଷୀମାନେ ଯେପରି ଶୃଙ୍ଖଳା ଓ ନିୟମ ପାଳନ କରିଛନ୍ତି । ଉପରୋକ୍ତ ସମସ୍ତ ବିଷୟକୁ ବିଚାରକୁ ନେଇ ଆମେ ଦୃଢ଼ ମତ ପ୍ରକାଶ କରୁଛୁ ଯେ, ଧାନ ସଂଗ୍ରହ କାର୍ଯ୍ୟ ପାଇଁ ଲ୍ୟାମ୍ପସ ହିଁ ସବୁଠାରୁ ଉତ୍ତମ ବିକଳ୍ପ ।ମାଲକାନଗିରି ବ୍ଲକ ଅଞ୍ଚଳରେ ଧାନ ସଂଗ୍ରହ କାର୍ଯ୍ୟରେ ସ୍ବୟଂ ସହାୟକ ଗୋଷ୍ଠୀକୁ ନିୟୋଜିତ ନ କରି ଲ୍ୟାମ୍ପସକୁ ଏହି ଦାୟିତ୍ଵ ଦେବା ପାଇଁ ଆବଶ୍ୟବ ପଦକ୍ଷେପ ଗ୍ରହଣ କରନ୍ତୁ ବୋଲି ଚାଲାଣଗୁଡା ସରପଞ୍ଚ ଅରକ୍ଷିତ ନାୟକ, ତଣ୍ଡିକି ସରପଞ୍ଚ ବାବୁଲା ପଡ଼ିଆମୀ, ତଣ୍ଡାପାଲି ସରପଞ୍ଚ ମମିତା ମାଡକାମୀ, ମାଟାପେକା ସରପଞ୍ଚ ମାସେ ମାଡକାମି, ଗୋରାଖୁଣ୍ଟା ସରପଞ୍ଚ ପଦିଏ କବାସୀ, ବଦଲି ସରପଞ୍ଚ ଦିନବନ୍ଧୁ ମାଢି, ମାନ୍ଦାପାଲି ସରପଞ୍ଚ ଇନ୍ଦ୍ରଜୀତ ପଡିଆମୀ, ଶିଖପାଲୀ ସରପଞ୍ଚ ବିଜୟ କବାସୀ ମାଲକାନଗିରି ଜିଲ୍ଲାପାଳଙ୍କ ଅଫିସକୁ ଆସି ଜିଲ୍ଲାପାଳ ଓ ଜିଲ୍ଲା ଖାଦ୍ୟ ଯୋଗାଣ ଅଧିକାରୀଙ୍କୁ ଦରଖାସ୍ତ ଦେଇଛନ୍ତି।
