କଟକ, ୧୭/୬ : କଟକ ବାଦାମବାଡ଼ିରେ ଦୁର୍ଘଟଣା। ବସ୍ ଚକା ତଳେ ଚାପି ହୋଇ ଚାଲିଗଲା ସ୍କୁଟି ଚାଳକଙ୍କ ଜୀବନ। ମଙ୍ଗଳବାର ଦିନ ପ୍ରାୟ ୧ଟା ବେଳେ ଏହି ଦୁର୍ଘଟଣା ଘଟିଛି। ମୃତକଙ୍କ ପରିଚୟ ମିଳିନାହିଁ। ମୃତଦେହକୁ ଏସସିବିରେ ରଖାଯାଇଛି।
ସୂଚନାନୁଯାୟୀ, ଦିନ ପ୍ରାୟ ୧ଟା ବେଳେ ଉମା ନାମକ ଏକ ବସ୍ ନେତାଜୀ ଟର୍ମିନାଲ୍ରୁ ଯାତ୍ରୀ ନେଇ ନୟାଗଡ଼ ଯାଉଥିଲା। ଗାଡିଟି ପୁରୁଣା ସରକାରୀ ବସ୍ଷ୍ଟାଣ୍ଡ ପାଖରେ ଅତିକ୍ରମ କଲା ବେଳେ ହଠାତ୍ ଜଣେ ସ୍କୁଟି ଚାଳକ ସାମ୍ନାକୁ ପଳାଇ ଆସିଥିଲେ। ଗାଡିର ବେଗ ଅଧିକ ଥିବାରୁ ସ୍କୁଟିଟି ବସ୍ ତଳେ ଚାପି ହୋଇଯାଇଥିଲା। ଫଳରେ ସ୍କୁଟି ଚାଳକ ବସ୍ ତଳେ ଚାପି ହୋଇଯାଇଥିଲେ। ତାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଏସସିବିରେ ଭର୍ତ୍ତି କରିଥିଲେ। ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ମୃତକଙ୍କ ପରିଚୟ ମିଳିପାରିନି। ତେବେ ନେତାଜୀ ଟର୍ମିନାଲରୁ ବସ୍ ଗଡ଼ିବା ପରଠୁ ସେହି ରାସ୍ତା ବିପଦପୂର୍ଣ୍ଣ ହୋଇଯାଇଛି। ପ୍ରତିଦିନ ଦୁର୍ଘଟଣା ହେଉଥିବା ଲୋକେ ଅଭିଯୋଗ କରିଛନ୍ତି।
