ବେଗୁନିଆପଡା, ୨୪/୦୫: ବୁଧବାର ବିଳମ୍ବିତ ରାତିରେ ବେରୁଆବାଡି ପଞ୍ଚାୟତ ରାମପଲି ଗ୍ରାମରେ ହୋଇଥିବା ଗୁଳିମାଡ ଘଟଣାରେ ସୁରେଶ ପ୍ରଧାନଙ୍କୁ କୋଦଳା ପୋଲିସ ଛୁଞ୍ଚିପଡା ଯାପଟା ଜଙ୍ଗଲରୁ ଗିରଫ କରିବାରେ ସଫଳ ହୋଇଛି। ଏହି ପରିପ୍ରେକ୍ଷିରେ ତା ନିକଟରୁ ବ୍ୟବହୃତ ମାଉଜର ମଧ୍ୟ ଉଦ୍ଧାର ହୋଇଥିବା ନେଇ ସୂଚନା ମିଳିଛି। ଆସାମୀ ନିଜେ ଯେଉଁଠାରେ ମାଉଜର ଲୁଚାଇଥିଲା ପୋଲିସକୁ କହିବା ପରେ ପୋଲିସ ଆସାମୀକୁ ରାମପଲି ନେଇ ସେଠାରୁ ବ୍ୟବହାର କରିଥିବା ମାଉଜରକୁ ଉଦ୍ଧାର କରିଛି। ମାଉଜର କେଉଁଠୁ ଆଣିଲା, କିଏ ଦେଲା ଅଧିକ ତଥ୍ୟ ହାସଲ ପାଇଁ ପୋଲିସ ଏନେଇ ଛାନଭିନ କରୁଥିବା ଜଣାପଡ଼ିଛି।
ପ୍ରକାଶ ଥାଉ କି ବୁଧବାର ବିଳମ୍ବିତ ରାତିରେ ସୁଶାନ୍ତ ରାଉତଙ୍କ ଘରକୁ ସେହି ଗ୍ରାମର ସମ୍ପର୍କୀୟ ଭଣଜା ସୁରେଶ ପ୍ରଧାନ ହଠାତ ପ୍ରବେଶ କରି ସୁଶାନ୍ତଙ୍କୁ ଲକ୍ଷ୍ୟ କରି ଗୁଳିମାରିଥିସେ। ହେଲେ ଏହି ସମୟରେ ନିକଟରେ ଥିବା ୪୦ ବର୍ଷୀୟ ସ୍ତ୍ରୀ ଭାବିନି ରାଉତ ସ୍ୱାମୀଙ୍କୁ ବଞ୍ଚାଇବାକୁ ଯାଇ ସୁଶାନ୍ତଙ୍କ ଆଗକୁ ଆସିଯିବାରୁ ଭାବିନିଙ୍କ ପେଟରେ ଗୁଳି ପଶି ପିଠି ପଟେ ବାହାରି ଯାଇଥିଲା। ଗୁଳି ମାରିସାରିବା ପରେ ସୁରେଶ ଘଟଣାସ୍ଥଳରୁ ଫେରାର ହୋଇଯାଇଥିଲା। ଆହତ ଭାବିନି ରାଉତ ବର୍ତ୍ତମାନ ବ୍ରହ୍ମପୁର ବଡ଼ ମେଡିକାଲରେ ମୃତ୍ୟୁ ସହିତ ସଂଗ୍ରାମ କରୁଛନ୍ତି।
