ନବରଙ୍ଗପୁର,୩୦/୮ : ବିବାହର ପ୍ରତିଶ୍ରୁତ ଦେଇ ଯୁବତୀ ୪ମାସ ଗର୍ଭବତୀ ହେବା ପରେ ପ୍ରତାରଣା ମାମଲାର ବିଚାର କରି ଅତିରିକ୍ତ ଜିଲ୍ଲା ଜଜ୍ ଓ ପୋକସୋ ଜଜ୍ ବାସୁଦେବା ଆଚାର୍ଯ୍ୟ ଅଭିଯୁକ୍ତକୁ ୧୦ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି । ଅଭିଯୁକ୍ତ ଜଣକ ରାଇଘର ଥାନା ପଖନାପାରା ଗାଁର ଶଗାରାମ ଗଣ୍ଡ । ତାଙ୍କୁ ୧୦ବର୍ଷ ସଶ୍ରମ କାରାଦଣ୍ଡ ସହ ତାଙ୍କଠାରୁ ୫ହଜାର ଟଙ୍କା ଜରିମନା ଆଦାୟ ପାଇଁ ନିର୍ଦ୍ଦେଶ ଦେଇଛନ୍ତି ।
ଅନାଦେୟ ହେଲେ ଆହୁରି ୩ମାସ ଜେଲ ଦଣ୍ଡ ଭୋଗିବାକୁ ନିର୍ଦ୍ଦେଶ ଦେଇଛନ୍ତି । ଏହି ମାମଲାକୁ ପରିଚାଳନା କରୁଥିବା ପବ୍ଲିକ ପ୍ରସିକ୍ୟୁଟର ସଚ୍ଚି ନନ୍ଦନ ସ୍ବାଇଁଙ୍କ ସୂଚନା ଅନୁଯାୟୀ ଏହା ୨୦୧୫ମସିହାର ମାମଲା । ରାଇଘର ଥାନା ଅଞ୍ଚଳର ଜଣେ ଯୁବତୀଙ୍କୁ ବିବାହର ପ୍ରତିଶ୍ରୁତି ଦେଇ ବାରମ୍ବାର ଶାରୀରୀକ ସଂପର୍କ ରଖିଲା । ଶେଷକୁ ଯୁବତୀ ଜଣକ ୪ମାସର ଗର୍ଭବତୀ ହେବା ପରେ ପରିବାର ଲୋକ ଜାଣିବାକୁ ପାଇଥିଲେ । ଗାଁରେ ବୈଠକ ହୋଇଥିଲା । ବୈଠକରେ ଶଗାରାମଙ୍କୁ ଡକାଯାଇଥିଲା । କିନ୍ତୁ ଶଗାରାମ ଯୁବତୀଙ୍କୁ ବିବାହ କରିବାକୁ ରାଜି ହୋଇନଥିଲେ । ଶେଷକୁ ପୀଡିତାଙ୍କୁ ନ୍ୟାୟ ପାଇଁ ପରିବାର ଲୋକେ ଥାନାରେ ଏତଲା ଦେଇଥିଲେ । ଏତଲାକୁ ଭିତ୍ତି କରି ଅଭିଯୁକ୍ତଙ୍କୁ ପୁଲିସ୍ ଗିରଫ କରିଥିଲା । ଏହି ମାମଲାରେ ୧୧ଜଣ ସାକ୍ଷ୍ୟ ଓ ପ୍ରମାଣକୁ ଭିତ୍ତି କରି ଅତିରିକ୍ତ ଜିଲ୍ଲା ଜଜ୍ ଓ ପୋକସୋ ଜଜ୍ ବାସୁଦେବା ଆଚାର୍ଯ୍ୟ ଅଭିଯୁକ୍ତକୁ ୧୦ବର୍ଷ ସଶ୍ରମକାରାଦଣ୍ଡରେ ଦଣ୍ଡିତ କରିଛନ୍ତି । ସେଭଳି ପୀଡିତାଙ୍କୁ ୧୦ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିବାକୁ ଜିଲ୍ଲା ଆଇନସେବା ପ୍ରାଧିକରଣଙ୍କୁ ସୁପାରିଶ କରିଥିବା ପବ୍ଲିକ ପ୍ରସିକ୍ୟୁଟର ସଚ୍ଚି ନନ୍ଦନ ସ୍ଵାଇଁ ପ୍ରକାଶ କରିଛନ୍ତି ।
