ମାଲକାନଗିରି, ୨୩/୮ :  ନିଜକୁ ଜଣେ ମାଓବାଦୀ ଲିଡର ଭାବେ ପରିଚୟ ଦେଇ ଧମକାଇ ଅଭିନବ ଉପୟରେ ବିଭିନ୍ନ ବ୍ୟବସାୟୀଙ୍କୁ ମୋବାଇଲ ହ୍ବାଟ୍ସଅପରେ କଲ କରି ଲକ୍ଷାଧିକ ଟଙ୍କା ଠକି ନେବା ଅଭିଯୋଗରେ ମାଲକାନଗିରି ଜିଲ୍ଲା ପୁଲିସ ଜଣେ ନକଲି ମାଓବାଦୀକୁ ଗିରଫ କରିଛି । ଏ ସମ୍ପର୍କ ରେ ଆଜି ସନ୍ଧ୍ୟାରେ ମାଲକାନଗିରି ଥାନା ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀ ଏସଡିପିଓ ସଚିନ ପଟେଲ ସୂଚନା ଦେଇଛନ୍ତି ।

ଏହି ନକଲି ମାଓବାଦୀ ଜଣକ ହେଲେ ଖୋର୍ଦ୍ଧା ଜିଲ୍ଲା ରଘୁନାଥପୁର ଗ୍ରାମର ସନ୍ତୋଷ ମହାନ୍ତି (୩୧)। ମାଲକାନାଗିରି ଜିଲ୍ଲାର ବିଭିନ୍ନ ଦୋକାନୀଙ୍କ ନମ୍ୱର୍ ଗୁଗୁଲ ମ୍ୟାପରୁ ବାହାର କରି ନିଜକୁ ମାଓବାଦୀ ଲିଡର ବୋଲି ପରିଚୟ ଦେଇ ଟଙ୍କା ମାଗୁଥିଲେ । ଟଙ୍କା ନ ଦେଲେ ଜୀବନରୁ ମାରିଦେବାକୁ ଧମକ ମଧ୍ୟ ଦେଉଥିଲା । ଅନୀଲ ନାମକ ଏକ ବ୍ୟବସାୟୀ ମାଲକାନଗିରି କୋରକୁଣ୍ଡା ଥାନା ପୋଲିସ ନିକଟରେ ଅଭିଯୋଗ କରିବା ପରେ ମାଲକାନଗିରି ଏସପି ନୀତେଶ ୱାଧାନୀଙ୍କ ନିର୍ଦ୍ଦେଶକ୍ରମେ ମାଲକାନଗିରି ଥାନା ଅଧିକାରୀ ରିଗନ କିଣ୍ଡୋ କୋରକୁଣ୍ଡା ଥାନା ଅଧିକାରୀ ହିମାଂଶୁ ଶେଖର ବାରିକଙ୍କ ନେତୃତ୍ୱରେ ଏକ ସ୍ୱତନ୍ତ୍ର ପୁଲିସ ଟିମ ଗଠନ କରି ତଦନ୍ତ ଆରମ୍ଭ କରିଥିଲେ।

ଏହି ଟିମ ପୁରୀରେ ଠକି ଥିବାର ଖବରପାଇ ସେଠାକୁ ଯାଇ ଅଭିଯୁକ୍ତ ସନ୍ତୋଷ ମହାନ୍ତିକୁ ଗିରଫ କରି ମାଲକାନଗିରିକୁ ଆଣିଥିଲେ । ମାଲକାନଗିରି ଜିଲ୍ଲାର ଅନେକ ବ୍ୟବସାୟୀ ଓ ଠିକାଦାରମାନଙ୍କୁ ମାଓବାଦୀ ଲିଡର ଆର ରାଜେଶ୍ୱର କହି ଅନେକ ଟଙ୍କା ଆଦାୟ କରିଥିବା ଅଭିଯୋଗରେ ଅଭିଯୁକ୍ତ ପୋଲିସ କହିଛି । ଆଜି ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ଏସଡିପିଓ ସଚିନ ପଟେଲ ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦେଇଛନ୍ତି।