ନୂଆଦିଲ୍ଲୀ,୦୫/୦୭: ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ଏଡିଆର୍) ସୁପ୍ରିମକୋର୍ଟରେ ଏକ ପିଟିସନ୍ ଦାୟର କରିଛି। ଏହି ପିଟିସନ୍ ଭାରତୀୟ ନିର୍ବାଚନ କମିଶନ (ଇସିଆଇ)ଙ୍କ ଏକ ନିଷ୍ପତ୍ତି ବିରୁଦ୍ଧରେ ଅଟେ। ଇସିଆଇ ବିହାରରେ ଭୋଟର ତାଲିକା ପୁନଃ ଯାଞ୍ଚ କରୁଛି। ପିଟିସନ୍ରେ କୁହାଯାଇଛି ଯେ ନିର୍ବାଚନ କମିଶନଙ୍କ ଏହି ନିର୍ଦ୍ଦେଶ ଠିକ୍ ନୁହେଁ। ପିଟିସନ୍ରେ ଏହା ମଧ୍ୟ କୁହାଯାଇଛି ଯେ ଏହା ଲକ୍ଷ ଲକ୍ଷ ଲୋକଙ୍କୁ ଭୋଟ ଦେବାରୁ ବାଧା ଦେଇପାରେ, ଅର୍ଥାତ୍ ଭୋଟର ତାଲିକାରୁ ସେମାନଙ୍କ ନାଁକୁ ବାଦ ଦିଆଯାଇପାରେ।
ଲାଇଭ୍ ଲ, ଏକ୍ସ ରେ ପୋଷ୍ଟ କରିଛି, 'ସୁପ୍ରିମ କୋର୍ଟରେ ଏକ ଆବେଦନ ଦାଖଲ କରାଯାଇଛି, ଏହି ଆବେଦନ ଭାରତୀୟ ନିର୍ବାଚନ କମିଶନଙ୍କ ଏକ ନିଷ୍ପତ୍ତି ବିରୁଦ୍ଧରେ ଅଟେ, ଯେଉଁଥିରେ ବିହାରରେ ଭୋଟର ତାଲିକା ପୁନଃ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ଆବେଦନ ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ ନାମକ ଏକ ସଂଗଠନ ଦ୍ୱାରା ଦାଖଲ କରାଯାଇଛି। ସେମାନେ କହିଛନ୍ତି ଯେ ଇସିଆଇର ଏହି ନିର୍ଦ୍ଦେଶ ମନମୁଖୀ ଅଟେ। ଏହା ଲକ୍ଷ ଲକ୍ଷ ଲୋକଙ୍କୁ ଭୋଟ ଦେବାରୁ ବଞ୍ଚିତ କରିପାରେ।'
ପାଖାପାଖି ଦେଢ଼ କୋଟି ଘରେ ପହଞ୍ଚିଛନ୍ତି ବିଏଲ୍ଓ:
ପୂର୍ବରୁ, ନିର୍ବାଚନ କମିଶନ ସୂଚନା ଦେଇଥିଲେ ଯେ ବୁଥ୍ ସ୍ତରୀୟ ଅଧିକାରୀ (ବିଏଲ୍ଓ) ବିହାରରେ ପ୍ରାୟ ୧.୫ କୋଟି ଘରକୁ ପରିଦର୍ଶନ କରିଛନ୍ତି। ଏହି ଗସ୍ତ ଶୁକ୍ରବାର ଦିନ ଶେଷ ହୋଇଥିଲା। ୨୪ ଜୁନ୍ ୨୦୨୫ ସୁଦ୍ଧା, ବିହାରରେ ୭,୮୯,୬୯,୮୪୪ (ପ୍ରାୟ ୭ କୋଟି ୯୦ ଲକ୍ଷ) ଭୋଟର ଅଛନ୍ତି। ଏଥିମଧ୍ୟରୁ ୮୭ ପ୍ରତିଶତ ଭୋଟରଙ୍କୁ ଗଣନା ଫର୍ମ ଦିଆଯାଇଛି। ଏହା ଏସ୍ଆଇଆର୍ ସମୟରେ କରାଯାଇଛି। ତେବେ ଘରଘର ବୁଲିବା ବେଳେ କିଛି ଘର ଅନେକ ଦିନ ହେବ ବନ୍ଦ ଥିଲା। ସୂଚନା ଅନୁସାରେ କିଛି ସ୍ଥାନରେ ବଂଶ ନିପାତ ଯୋଗୁ ଅନେକ ଘର ଏହାର ପରିଚୟ ହରାଇଥିଲା। କିଛି ଲୋକ ଅନ୍ୟ ସହରକୁ ଚାଲିଯାଇଥିଲେ, କିମ୍ବା କୌଣସି ସ୍ଥାନକୁ ବୁଲିବାକୁ ଯାଇଥିଲେ। ତେଣୁ, ବିଏଲ୍ଓ ସେହି ଘରଗୁଡ଼ିକରେ ପହଞ୍ଚି ପାରିନଥିଲେ। ଏହି କାର୍ଯ୍ୟ ସମୟରେ ବୁଥ୍ ସ୍ଥରୀୟ ଅଧିକାରୀମାନେ ତିନିଥର ଘର ପରିଦର୍ଶନ କରିବେ। ତେଣୁ, ଏହି ସଂଖ୍ୟା ଆହୁରି ବଢ଼ିପାରେ।
ଏଏନ୍ଆଇ ରିପୋର୍ଟ ଅନୁଯାୟୀ, ବିଭିନ୍ନ ଦଳର ୧,୫୪,୯୭୭ ବୁଥ୍ ସ୍ତରୀୟ ଏଜେଣ୍ଟ (ବିଏଲ୍ଏ) ମଧ୍ୟ ଏହି କାର୍ଯ୍ୟରେ ସାହାଯ୍ୟ କରୁଛନ୍ତି। ୨ ଜୁଲାଇ ପର୍ଯ୍ୟନ୍ତ ତଥ୍ୟ ଅନୁଯାୟୀ, ବିଜେପି ୫୨,୬୮୯ ବିଏଲ୍ଏ ନିଯୁକ୍ତ କରିଛି। ଆର୍ଜେଡିର ୪୭,୫୦୪, ଜେଡିୟୁର ୩୪,୬୬୯ ଏବଂ କଂଗ୍ରେସର ୧୬,୫୦୦ ବିଏଲ୍ଏ ଅଛି। ଏହା ବ୍ୟତୀତ, ରାଷ୍ଟ୍ରୀୟ ଲୋକ ଜନଶକ୍ତି ପାର୍ଟି ର ୧୯୧୩ ବିଏଲ୍ଏ, ସିପିଆଇ(ଏମ୍ଏଲ୍)ଏଲ୍ର ୧୨୭୧, ଲୋକ ଜନଶକ୍ତି ପାର୍ଟି (ରାମ ବିଳାସ) ର ୧୧୫୩, ସିପିଏମ୍ର ୫୭୮ ଏବଂ ରାଷ୍ଟ୍ରୀୟ ଲୋକ ସମତା ପାର୍ଟିର ୨୭୦ ବିଏଲ୍ଏ ଅଛି। ବିଏସ୍ପି ର ୭୪, ଏନ୍ପିପିର ୩ ଏବଂ ଆମ ଆଦମୀ ପାର୍ଟି ର ଜଣେ ବିଏଲ୍ଏ ଅଛନ୍ତି। ପ୍ରତ୍ୟେକ ବିଏଲ୍ଏ ଗୋଟିଏ ଦିନରେ ୫୦ ଟି ପ୍ରମାଣିତ ଫର୍ମ ଦାଖଲ କରିପାରିବ।
୩୦ ସେପ୍ଟେମ୍ବର ୨୦୨୫ରେ ଆସିବ ଚୁଡ଼ାନ୍ତ ଭୋଟର ତାଲିକା:
ଭୋଟର ତାଲିକାର ଯାଞ୍ଚ ୨ ଅଗଷ୍ଟ ୨୦୨୫ ରୁ ଆରମ୍ଭ ହେବ। ଭୋଟର ତାଲିକାର ଡ୍ରାଫ୍ଟ ପ୍ରକାଶିତ ହେବା ପରେ, ଯେକୌଣସି ଦଳ କିମ୍ବା ସାଧାରଣ ନାଗରିକ ୨ ଅଗଷ୍ଟ ୨୦୨୫ ରୁ ଭୋଟର ତାଲିକା ଉପରେ ଦାବି କିମ୍ବା ଆପତ୍ତି ଦାଖଲ କରିପାରିବେ। ଚୂଡ଼ାନ୍ତ ଭୋଟର ତାଲିକା ୩୦ ସେପ୍ଟେମ୍ବର ୨୦୨୫ ରେ ପ୍ରକାଶିତ ହେବ। ଏହା ପରେ ମଧ୍ୟ, ଆପଣ ଡିଏମ (ଜିଲ୍ଲା ମାଜିଷ୍ଟ୍ରେଟ) ଏବଂ ସିଇଓ (ମୁଖ୍ୟ ନିର୍ବାଚନ ଅଧିକାରୀ) ଙ୍କ ନିକଟରେ ଆବେଦନ କରିପାରିବେ।
