ନୂଆଦିଲ୍ଲୀ,୦୫/୦୭: ଅଡୁଆରେ ପଡ଼ିଛି ଏୟାର ଇଣ୍ଡିଆ । ଏଆଇ ନାଁରେ ସାଂଘାତିକ ଅଭିଯୋଗ ଆସିଛି । କ୍ଷତିପୂରଣ ଦେବା ନାଁରେ ମିଛ କାଗଜପତ୍ରରେ ଦସ୍ତଖତ କରିବାକୁ ମୃତକଙ୍କ ପରିବାର ଉପରେ ଚାପ ପକାଉଥିବା ଅଭିଯୋଗ ହୋଇଛି । ଏହା ସହିତ କ୍ଷତିପୂରଣ ଦେବାକୁ ସଠିକ୍ ଭାବେ କୌଣସି ପ୍ରକ୍ରିୟା ଆରମ୍ଭ ହୋଇନଥିବା ମଧ୍ୟ ଅଭିଯୋଗ କରିଛନ୍ତି ମୃତକଙ୍କ ପରିବାର । ହେଲେ ଏୟାର ଇଣ୍ଡିଆ ପକ୍ଷରୁ ଅଭିଯୋଗକୁ ଖଣ୍ଡନ କରାଯାଇଛି ।
ଏୟାର ଇଣ୍ଡିଆ ଉପରେ କ'ଣ ଅଭିଯୋଗ ? ୪୦ରୁ ଅଧିକ ପୀଡ଼ିତ ପରିବାର ଏୟାର ଇଣ୍ଡିଆ ନାମରେ ଅଭିଯୋଗ ଆଣିଛନ୍ତି । କ୍ଷତିପୂରଣ ଦେବାକୁ ମୃତକଙ୍କ ପରିବାରକୁ ଅନାବଶ୍ୟକ ତଥ୍ୟ ବିବରଣୀ ମାଗୁଛି । ବ୍ୟକ୍ତିଗତ ଓ ଆର୍ଥିକ ତଥ୍ୟ ନଦେଲେ ଧମକା ଯାଉଛି । ଏ ନେଇ ଅଭିଯୋଗକାରୀ କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ସେମାନଙ୍କ ମଧ୍ୟରେ କିଛି ଭାରତୀୟ ଓ ବ୍ରିଟିଶର ରହିଛନ୍ତି । ବ୍ରିଟେନ୍ର ଏକ ନାମୀ ଲ' ଫାର୍ମ ଷ୍ଟିୱାଟ ଏହି ୪୦ଜଣ ପରିବାରଙ୍କ ଅଭିଯୋଗ ଆଧାରରେ ଏୟାରଇଣ୍ଡିଆ ବିରୋଧରେ ମାମଲା ଲଢୁଛି । ସେପଟେ ଅଭିଯୋଗକୁ ଖଣ୍ଡନ କରିଛି ଏୟାରଇଣ୍ଡିଆ । ଅଭିଯୋଗକୁ ଭିତ୍ତିହୀନ କହି ଏୟାରଲାଇନ୍ସ ପକ୍ଷରୁ ଏକ ବୟାନ ଜାରି କରାଯାଇଛି । ଅହମ୍ମଦାବାଦ ବିମାନ ଦୁର୍ଘଟଣା ଦେଶକୁ ମର୍ମାହତ କରିଛି । ଖୁବଶୀଘ୍ର ମୃତକଙ୍କ ପରିବାରକୁ ଘୋଷଣା ମୁତାବିକ କ୍ଷତିପୂରଣ ଦିଆଯିବ । ପ୍ରଚାର ହେଉଥିବା ଖବରରେ କୌଣସି ସତ୍ୟତା ନାହିଁ ।
କ୍ଷତିପୂରଣ ଦେବା ନେଇ ଟାଟା କରିଥିଲା ଘୋଷଣା- ୧୨ ଜୁନ୍ରେ ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଫ୍ଲାଇଟ୍ ଏଆଇ-୧୭୧ କ୍ରାସ୍ ହୋଇଥିଲା । ଜଣେ ଯାତ୍ରୀଙ୍କୁ ଛାଡି କ୍ରୁ ସଦସ୍ୟଙ୍କ ସମେତ ସମସ୍ତଙ୍କର ମୃତ୍ୟୁ ହୋଇଥିଲା । ଏହାପରେ ଟାଟା ମୃତକଙ୍କ ପରିବାରକୁ ଏକ କୋଟି ଲେଖାଏଁ ସହାୟତା ଦେବାକୁ ଘୋଷଣା କରିଥିଲା । ଆହତଙ୍କୁ ୨୫ ଲକ୍ଷ ଦେବାକୁ ଘୋଷଣା କରିଥିଲା । ଏହା ସହିତ ୫୦୦ କୋଟି ଟଙ୍କାର ଟ୍ରଷ୍ଟ ସ୍ଥାପନ କରିବାକୁ କହିଥିଲା । ଟ୍ରଷ୍ଟ ଜରିଆରେ ଶିକ୍ଷା, ସ୍ୱାସ୍ଥ୍ୟ ଏବଂ ପୁନର୍ବାସ ପରି ସେବା ପ୍ରଦାନ କରାଯିବ ।
