ନୂଆଦିଲ୍ଲୀ,୨୮/୦୮: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟ ସାମଗ୍ରୀଗୁଡ଼ିକ ଉପରେ ଲଗାଇଛନ୍ତି ୫୦% ଟାରିଫ୍ । ଏହାଦ୍ୱାରା ଭାରତର ଦୁଇ ତୃତୀୟାଂଶ ରପ୍ତାନି ଉପରେ ପ୍ରଭାବ ପଡ଼ିପାରେ । ଏହା ମଧ୍ୟରେ ଆମେରିକାର ଜଣାଶୁଣା ଅର୍ଥନୀତିଜ୍ଞ ଜେଫରୀ ସୈସ୍ କହିଛନ୍ତି ଯେ, ଭାରତ ଉପରେ ଏତେ ଅଧିକ ଟାରିଫ୍ ଲଗାଇ ଟ୍ରମ୍ପ ଆମେରିକାର ହିଁ କ୍ଷତି କରିଛନ୍ତି । ଏହାଦ୍ୱାରା ଆମେରିକା ବିଶ୍ୱରେ ଏକଘରିଆ ହୋଇଯିବ ଏବଂ ଏହାର କମ୍ପାନିଗୁଡ଼ିକୁ ବଡ଼ ମାତ୍ରାରେ କ୍ଷତି ସହିବାକୁ ପଡ଼ିବ । କଲମ୍ବିଆ ୟୁନିଭର୍ସିଟିର ପ୍ରଫେସର ସୈସ୍ ଏକ ଇଣ୍ଟର୍ଭ୍ୟୁରେ କହିଛନ୍ତି ଯେ, ଟ୍ରମ୍ପ ଭାରତକୁ ଡରାଇବାକୁ ଚେଷ୍ଟ କରୁଛନ୍ତି କିନ୍ତୁ ଏଥିରେ ସେ ସଫଳ ହେବେ ନାହିଁ ।
ଟ୍ରମ୍ପ ଭାବୁଛନ୍ତି ଯେ, ସେ ଭାରତକୁ ଡରାଇ ଧମକାଇ ନିଜ କାମ ହାସଲ କରିଦେବେ । ଏହା ଭାବିବା ଠିକ୍ ନୁହେଁ ଯେ,୧୫୦ କୋଟି ଜନସଂଖ୍ୟାବିଶିଷ୍ଟ ଏକ ଦେଶକୁ ସେ ଡରାଇପାରିବେ । ଏହା କରି ଟ୍ରମ୍ପ ବ୍ରିକ୍ସ ଦେଶଗୁଡ଼ିକୁ ଆହୁରି ଅଧିକ ନିକଟତର କରିବାରେ ସଫଳ ହେବେ। ଏହାଦ୍ୱାରା ଭାରତ ଆମେରିକାଠାରୁ ଦୂରେଇଯିବ ଏବଂ ରୁଷ, ଚୀନ୍, ବ୍ରାଜିଲ ଏବଂ ବିଶ୍ୱର ଅନ୍ୟ ବଡ଼ ଅର୍ଥବ୍ୟବସ୍ଥାଗୁଡ଼ିକର ନିକଟତର ହୋଇଯିବ ।
