ନୂଆଦିଲ୍ଲୀ,୧୪/୦୫: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ୪୦୦ ନିୟୁତ ଡଲାର ମୂଲ୍ୟର ଏକ ବୋଇଂ ବିମାନ ଉପହାର ଦେବ ଉପସାଗରୀୟ ଦେଶ କତାର। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କତାର ଗସ୍ତରେ ଅଛନ୍ତି। ଏହି ଗସ୍ତରେ କତାର ରାଷ୍ଟ୍ରପତି ଟ୍ରମ୍ପଙ୍କୁ ଏକ ବିଳାସପୂର୍ଣ୍ଣ ବୋଇଂ ୭୪୮-୮ଜମ୍ବୋ ଜେଟ୍ ବିମାନ ଉପହାର ଦେବେ। ଏହି ଉପହାର ଜଣେ ଆମେରିକୀୟ ରାଷ୍ଟ୍ରପତିଙ୍କୁ ଦିଆଯାଇଥିବା ବିଶ୍ୱର ସବୁଠାରୁ ମହଙ୍ଗା ଉପହାର ହେବ।
ତେବେ ଏହି ଉପହାର ଟ୍ରମ୍ପ ସୁରକ୍ଷା ମଞ୍ଜୁରୀ ପାଇବା ପରେ ହିଁ ପାଇବେ। ଯେଉଁଥିରେ ସମୟ ଲାଗିବ। ଉପହାର ବିଷୟରେ ଜାଣିବା ପରେ ଡୋନାଲ୍ଡ ଟ୍ରମ୍ପ ପ୍ରତିକ୍ରିୟା ଦେଇ କହିଛନ୍ତି ଯେ, କେବଳ ଜଣେ ମୂର୍ଖ ବ୍ୟକ୍ତି ଏତେ ବଡ଼, ଏତେ ମହଙ୍ଗା ଏବଂ ଏତେ ସ୍ୱତନ୍ତ୍ର ଉପହାରକୁ ପ୍ରତ୍ୟାଖ୍ୟାନ କରିବ। ସେ ଆହୁରି ମଧ୍ୟ କହିଛନ୍ତି, ବୋଇଂ ୭୪୭ ମୋତେ ନୁହେଁ, ଯୁକ୍ତରାଷ୍ଟ୍ର ବାୟୁସେନା/ପ୍ରତିରକ୍ଷା ବିଭାଗକୁ ଦିଆଯାଉଛି! ଏହା କତାର ନାମକ ଏକ ଦେଶରୁ ଏକ ଉପହାର, ଯାହାକୁ ଆମେ ବହୁ ବର୍ଷ ଧରି ସଫଳତାର ସହିତ ସୁରକ୍ଷିତ ରଖିଛୁ। ଆମର ନୂତନ ବୋଇଂ ଆସିବା ପର୍ଯ୍ୟନ୍ତ ଏହାକୁ ଆମ ସରକାର ଏକ ଅସ୍ଥାୟୀ ଏୟାର ଫୋର୍ସ ୱାନ୍ ଭାବରେ ବ୍ୟବହାର କରିବେ। ଯାହାର ବିତରଣରେ ଗୁରୁତର ବିଳମ୍ବ ହେଉଛି। ଆମର ସେନା ଏବଂ ଆମର କରଦାତାମାନେ କାହିଁକି ଶହ ଶହ କୋଟି ଡଲାର ଦେବାକୁ ବାଧ୍ୟ ହେବେ ଯେତେବେଳେ ସେମାନେ ଏକ ଭଲ କାମ ପାଇଁ ଆମକୁ ପୁରସ୍କୃତ କରିବାକୁ ଚାହୁଁଥିବା ଦେଶଠାରୁ ଏହା ମାଗଣାରେ ପାଇପାରିବେ। ଏହା ଏକ ବହୁତ ବଡ଼ ସଞ୍ଚୟ ଏବଂ ଏହି ସଞ୍ଚୟ ଆମେରିକାକୁ ପୁଣି ଥରେ ମହାନ କରିବା ପାଇଁ ଖର୍ଚ୍ଚ କରାଯିବ ବୋଲି କହିଛନ୍ତି।
