ଅମରାବତୀ: ଆନ୍ଧ୍ର ପ୍ରଦେଶର ଏକ ଘରୋଇ କଲେଜ୍ରେ ଅଭାବନୀୟ ଘଟଣା ଘଟିଛି । ୩ ମହଲା ବିଲ୍ଡିଂ ଉପରୁ ତଳକୁ ଡେଇଁ ଆତ୍ମହତ୍ୟା କରିଛନ୍ତି +୨ ପ୍ରଥମ ବର୍ଷର ଛାତ୍ର । କ୍ଲାସ୍ ଚାଲିଥିବା ବେଳେ ଛାତ୍ର ଜଣଙ୍କ ବାହାରକୁ ଆସିଥିଲେ ଏବଂ ହଠାତ ବିଲ୍ଡିଂରୁ ତଳକୁ ଡେଇଁ ପଡ଼ିଥିଲେ । ଏ ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି ।
ମିଳିଥିବା ସୂଚନା ଅନୁସାରେ, ଆନ୍ଧ୍ର ପ୍ରଦେଶର ନାରାୟଣ କଲେଜ୍ରେ ଏହି ଘଟଣା ଘଟିଛି । ଆଜି (ଗୁରୁବାର) ସକାଳ ପ୍ରାୟ ୧୦.୧୫ରେ ଶ୍ରେଣୀ ଗୃହ ଭିତରୁ ଛାତ୍ର ଜଣଙ୍କ ବାହାରକୁ ଚାଲି ଆସିଥିଲେ । କେହି କିଛି ବୁଝିବା ଆଗରୁ ସେ ବିଲ୍ଡିଂରୁ ତଳକୁ ଡେଇଁ ପଡ଼ିଥିଲେ । ସହପାଠୀ ଏବଂ ଶିକ୍ଷକ ବାହାରକୁ ଆସି ଦେଖିବା ବେଳକୁ ସବୁ କିଛି ଶେଷ ହୋଇଯାଇଥିଲା ।
ଛାତ୍ର ଜଣଙ୍କ ରକ୍ତ ଜୁଡୁବୁଡ଼ୁ ହୋଇ ପଡ଼ି ରହିଥିଲେ ଏବଂ ତାଙ୍କର ପ୍ରାଣବାୟୁ ଉଡ଼ିଯାଇଥିଲା । ତେବେ ଛାତ୍ର ଜଣଙ୍କ କାହିଁକି ଏତେ ବଡ଼ ନିଷ୍ପତ୍ତି ନେଲେ ସେନେଇ ସ୍ପଷ୍ଟ ସୂଚନା ମିଳିନଥିବା ବେଳେ ଘଟଣାସ୍ଥଳରେ ପୋଲିସ ତଦନ୍ତ ଆରମ୍ଭ କରିଛି । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁସାରେ, ମୃତକଙ୍କ ନାଁ ଚରଣ ବୋଲି ଜଣାପଡ଼ିଛି ।
